"Daut ess waut'et ess, eena freid sijch doch" säd Pannasch Fraunz ut Wintjla auls hee toom Bejrafnis von Hiebats Iesbraundtje jintjch, auls dissa mett sass Joah vom Heiratj foll, enn sijch daut Jenetjch opp emma vewretjcht.
Soo jeiht mie daut uck eenmol daut Joah ooda sogoa foakna wann de Oola vom Himmel bie ons emma too Wiehnachte enne Schneediehn launde deit, enn Hee toom Eggnog ooda uck too Wiehnachststollen nenntjemmt, enn dann stundelang nohbat, ooda uck äwanacht blifft.
Uck dit Joah hab wie nijch omsonst jewacht...Hee duckt mol wada opp.
Vom enjlischen Fruit Cake held Hee so väl auls etj: weinijch. Too Wiehnachte mott daut Stollen ut Dresden jäwe mett Marzipan (uck Mautzspohn von mie ut), enn Rum. Dann läfd Hee opp.
Wie haude Tjieltje mett Zippelfat enn Ruakworscht toom Owendkost jejäte, enn weare, soo auls jesajcht, bie de Läpelkost aunjekohme. Enn toom erwähnden Stollen gauf daut uck een Hupe Schlagsahne noh eenem Wiener Rezapt, enn väl Vetal.
"Weetst waut, Oola?" saj etj biem dredden Stetjch Stollen, "etj woa toom easchten Mol enn mien Läwe enn, daut etj nijch meea de Jinjsta sie," oba eea etj Tiet haud, opp too räje, waut mie aules schod, fuah Hee mie doatweschen, enn meend: "Waut saul etj dann saje, leewa Pilja? Meenst mie schot nijch uck han enn wada aulahaund?"
"Doch nijch?" saj etj.
"Oba joh," sajcht de Oola."Wann etj dann enn mienem Ella eene lenjre Foat moak soo auls vondoag hiehan, enn etj mie dann noch doabie vetjläm soo auls hiea emm Schnee, enn dann loht zeowentz nohm Himmel tridjkohm, motte eene haulwe Dutz Enjel mie tjnäde, enn riewe, enn rubble, enn mie daut lintjche Schullablaut mett Speatus enn mett Wundaeelj enriewe, doamett etj dann bäta schlope kaun."
Auls etj daut head, fong mie aul bie dem Jedanke aun too hubbre, enn etj hohld eene Buddel Braundwien äwadäl, enn de Oola enn etj langde mol wada jehearijch too. Etj saj: "Wäa haud daut jedocht?"
"Joh, joh, daut jeiht uck bie mie nijch meea soo jlei, enn daut Holthacke enn Holtspoole hab etj aul lenjst enjestallt, enn nu loht etj Goliath Holthacka späle. Dissem Hallehetta jeiht daut noch emma scheen siene Muskle späle too lohte. Oba wann diss Scherwaunda dann mol wada, soo auls jieda Wäatjch tweemol eenen judschen Fieadach earnst nemmt, dann loht etj Obraum Thiesses Peeta ut Elloag kohme ('ess dee opplatzt Frindschauft mett die?,' frajcht dee Oola soo een bät schmenjsch), enn dann tjrieselt daut Pappelholt, enn Jasch Tjwierinj kaun dann wada een poah Doag de Hall scheen oppwoame."
"Na joh, waut etj oba mau vetalle wull, ess daut eena uck emm Himmel meea Tiet em Winta haft schaubijch too senne; emm Somma haft eena daut drocka, enn dann lat daut doktre enn uck de Krankheite noh."
"Na joh, oba wann wie aul doabie send, ons äwa Krankheite too vetalle, dann sull etj noch erwähne, daut dee mie uck dochwoll een bät dolla toostohne auls Die. Emmahan sie etj je bediedend ella, enn hab uck aulnoch foaken enn miene Jugend den Darpsturbauss hiea enn doa jespält. Enn Steena nohdroat mett de Schlinj schmiete, enn uck rautze jintjch de judsche Darpsjugend aul emma scheen. Uck aul de frohme Propheete, woohne nohäa soo väl vonne frädlijche Tugende dee Tintefada soo voll nauhme, weare enn ähre baste Joahre de Räaj noh Scherniesels, Turbausse enn hunjschet Jesindel. Enn etj hab mie aulnoch eahremol wehre musst, oba ohne Buhle aum Puckel, enn vewretjchte Jlieda, enn Wehdoag aune Muskle kaum uck etj nijch doavon.
Wie drunke nochmol een Glauss Schnaups ut, enn dann frajcht de Oola: "Oba sesst jeiht daut die (aulso mie) eenjamohte?"
"Na," saj etj, "measchtens mau derjchschnettlijch, enn etj mott mie aulnoch foaken wundre, woo daut soo ess, wann eena mett jieden Dach een bät ella woat, enn eenem de Been, schient soo, tjarta woare."
Daut lachad dem Oolen, enn Hee fruag, auls wie ons dann doch langsom äwre Eewijchtjeit vetale sulle.
Etj saj: "Weetst waut, Oola, etj kaum mie bett nutoo eajentlijch niemols nijch stoawlijch väa, oba vleijcht sull uck etj langsom een bät aundre Seide too dissem Thema opplaje, nijch? Wiels, gaunz opprejchtijch jesajcht, seit miene latzte Operatsjoon, bie dee Du soo schmock doabie weascht, sie etj nijch meea de stoatjsta Mensch westlijch vom amerikaunschen Nippa, vom Mississippi, aulsoo."
"Hejchste Tiet, leewa Pilja, too eene earnste Besennung, wiels wann Du aum Perlendooah de Priefung nijch besteihst, kunn'et Die domm gohne! Enn wiels wie doa bowe emma Holthackasch enn Hallehettasch brucke, haft sijch aul soo maunjcha jewundat, wann je uck de measchte ohne disse Rebbeoabeit nennkohme, enn mett mie koldet Beea nohm Fieaowent too drintjche tjriee."
"Oola, woa etj jedanklijch han well ess waut aundret...wann eena von Väle ess, enn Väle daut äwareen lat, ooda sijch sogoa aulatoop litjchne, woo weetst Du dann äwahaupt wann etj bie Die doa bowe oppduck, wäa etj sie? Kaunst Du mie nijch een bätje aundasch be Tiet utstefeare, daut, wann etj mett eenmol enschlope sull, Du mie bie Die doa tweschne himmlische Trap enn Blottschropa bäta tjannst wann etj doa oppduck enn oppwoak?"
"O, soo meenst Du daut!" sajcht'a, "daut kaun etj, enn woa daut sogoa doohne, wiels Du hast Die de latzte Tiet endlijch dolla bemäjcht menschlijcha too woare, enn soo woa etj Die Dienen Welle entjäjen kohme, enn Die een bät äwrem Derjchschnett aufsondre. Waut feascht Du emm Senn?" sajcht'a
"Oola," saj etj, "Du hast den Noagel soo meea oppen Kopp jetroffe. Enn wiels du mie aul frajchst enn städwies sogoa vesproake hast, daut eena, wann eenem sien Gloowe soo groot auls een Sampkuarn ess, sogoa eenen haulwen Ararat vesatte kaun, dann fang wie fuats een bät emm Grooten aun. Eene Tietlang Paul Bunyan den Tweeden too heete, enn uck too späle, wudd mie goot senne."
"Doch nijch," sajcht'a. "Soo bescheide enn deemootijch fangst Du aun?" "Joh," saj etj, enn measchtens wiels mie eenfach nuscht nijch aundret biefoll...aulso noh de Melodie: Wann aul, dann aul...
Jenuag...aum näjchsten Morje auls etj hiea emm Jaumadohl oppwuak, wea etj soo meea eene utjewossna Paul Bunyan, waut dann so väl heet meea auls noch soo groot auls etj jistre wea, enn uck miene gaunze Mondua, enn uck de sestje Enrejchtunge omm mie weare doanoh. Aulso een bät em Grooten, enn meist soo groot enn forsch auls etj daut aul lang von miene eajne Fantasie enn uck enn miene Jeschijchte jewant wea.
Enn seeht mol aun...daut died tjeen Dach, enn etj haud mie aul gaunz aun miene niee Roll jewant, enn kaum mie meist gaunz Bunjansch väa: etj wea äwabrestijch, fong aun väa too saje, enn wea mie nijch jehead ooda jehorsam wea, dem behaundeld etj soo auls Donald Trump: etj leahd ahm oppe Städ domm. Enn buta too mienem Oss, Babie natiedlijch mett Nohme, dem etj biem Holtmoake bruckt, wea etj woll een bät sturr enn groff, enn Mensch enn Boare enn sogoa väle Steinbacha muake omm mie eenen grooten Boage.
Wäa mie nijch vestohne kaun, ooda well, dem bedd etj sijch doaraun too besenne, daut etj mie physisch soo vehilt auls een ritjcha Mensch daut jieden Dach deit, enn dann weet jie, joh? Enn wann disse Ertjlärung nijch tooreatjcht, dann kohmt mol mett noh Steinbach, enn wie woare doa dann boold eenen ritjchen Prädja mett noh bute utjebuhlde Fuppe, aulso soohn vebiestada Mennist traffe, enn dann woa jie boold weete, woo sijch daut späad, wann grootet Jeld aunfangt rundommendomm, noh aule Siede aulso, too buchle.
Enn schlemma, nä bäta noch, daut Butajeweenelje wea mie too Räjel jeworde, enn waut etj jistre noch auls 'domm habe' betätjent haud, wea mie nu miene Oat enn mien Wesen.
Daut Väasaje jintjch mie aul emma scheen, enn foll mie leijcht, oba nu daut de Ooltnäsijchtjeit miene Natua jeworde wea, jintjch mie de Äwabrestijchtjeit nijch bloos goot, oba dee stund mie too.
Seea wundad etj mie auls tjeene Wätjch lohta, de Oola mie wada beseatje kaum, enn mie fruag, auls etj nu endlijch toofräd wea.
"Soo meea," saj etj, "oba wann du mett Die noch lenja enn wieda räde latzt, wudd etj opplatzt opp noch wiedre enn niee Jedanke kohme?"
"Doch nijch!", sajcht'a, enn tjitjcht een bät vewillat. "Soo auls waut?" meend Hee dann noch schwind hinjeraun.
"Wann du mie de Fuppe mett Boajeld een bätje dolla utfoodre wuddst, wudd etj mie soo deemootijch auls etj noch senne kaun, bedanke."
Jenuag, aulwada deed Hee waut etj wull, enn waut mie dann uck aul aum näajchsten Dach toostund. Etj haud de Fuppe volla Jeld, Fiea enne Fuste, enn eea de Dach too Enj wea, wulle se mie en eene groote, niee Tjoatjch doa dijcht ver Steinbach aul toom Prädja moake.
Doatoo säd etj, seea deemootijch: "Bitte, oba eenen Dach Bedentjtiet," aulso mol wada eene utjekoakte Heichelei, wiels etj ennalijch aul tien Mol dem nieen Aumt toojesajcht haud; nijcht toolatzt doawäjen wiels Krauft, Jeld enn Prädjasenne ons Menniste meist soo goot jeiht auls mienem Hund twee Stetjch enn dree Strämels dietsche Worscht.
Dee Dach Bedentjchtiet wea noch nijch vebie auls sijch aulwada dee Oola diretjcht mald. Wie weare noch nijch mett dem easchten Braundwien foadijch auls Hee sijch enne Säle soo auls dit läd: "Na, waut wesst Du noch meea? Stoatja best Du nu auls een Oss, Jeld hast soo väl auls Trump, enn daut Prädjaaumt ess uck aul omme Atjch."
Wie drunke eene Buddel Bitburger Beea, enn juage dem Beea mett noch eenem Schnaups hinjeraun. Sull etj mie biem Oolen bedanke, ooda seehne, waut Hee noch fe eene Koat enn siene ditjche Dumes hild?
Hee nauhm mie mol wada de Auntwuat auf. "Weetst Du, Pilja, noch emma nijch woa daut aulatoop bie de Mensche, oba besondasch bie de Menniste hanjeiht? Enn wiels Du opp Dienem Schockelstoohl emm Kopp enn enne Seel han enn häa jenjelst, woa etj Die de Auntwuat jäwe: Aule dree Aunjebotte kaunst Du habe, oba wann Du Die fe dee entscheide wellst, woare de Frind, woohne disse Post tjriee, mett Die enne Eewijchtjeit nuscht too doohne habe. Uck Mozart, Ohm Beethoven, Hayden enn Schubert udgm.woare die enne Eewijchtjeit den Ridje dreie, enn de himmlischa Stammtisch, aulsoo de plautdietscha Staumdesch haft dann tjeen Stoohl fe die frie. Diene Entscheidung, bitte?"