Shake - von Jack Thiessen

Auls Taunte Ina noh Kanada kaum wea äahre Sproak aul enne fauste Jleis. See haud woll uck meea opp äahre Oat Huachdietsch auls Plautdietsch jeret, wiels wann see een Stetjch Worscht wull, een Schmatock aulso, dann säd see opp Enjelsch "een junk sausage". De Dietsche doohne soowaut aulnoch foaken, enn meene noch, wann eenem daut steat, dann sulle aule aundre uck eenfach junk aunstaut chunk saje. Waut mie aunbelangt? Mie ess daut aulatoop soo langsom gaunz worscht; etj tjann soohne Sproakjemeend aul lang enn uck perseenlijch.

Enn noch waut aundret: Mensche, enn uck Menniste enn Haulfmenniste, soo auls Taunte Ina, wohne nijch jearn opp Ditsied ooda opp Jantsied, sonda enne Niagara-Jäajend, wiels doa weinja Domme utem Waste rommdwaule.

Enn soo kaum daut je dann uck, daut Taunte Ina foaken von eenem sondaboaren, truoatjen enn uck truhoatjen Tjeadel Shake enn äahre Jäajend red. Eenfach Shake, soo heet'a. Enn dis Shake wea een Pauslocka enn Schetjbenjel meist von Gottes Jnod, soo säd een jiedra.

Shake wohnd doa enne Virgil-Jäajend, enn wea gootmootijch, enn jewesse Mensche nutzte je ahm dann uck ut. Uck siene Famielje, oba wiels daut de Tjaisa Rampels weare, säd tjeena nuscht nijch. Daut wea eenfach soo. Zastijch enn noch meea Joah wea daut eenfach soo.

Enn donn auls de Tjaisa Rampels seea oolt worde, enn endlijch sogoa storwe, bleef Shake wieda em Hus vonne Ellre wohne, enn deed uck wiedahans waut Mensche wiet enn breet von ahm habe wulle. Hee wea aulewäje enn emma reed too halpe, oba besondasch Taunte Ina hild ahm opp Trapp. Shake drebbeld emma, hee wea emma reed toom halpe. Enn wann hee uck utjenutzt word, enn sogoa noh de mennische Oat hanenwada dommjeleaht word, tjeen Mensch haft Shake niemols nijch doll jeseehne. Hee wea emma frindlijch enn jescheit, enn hee kunn meist aules buta dollwoare.

Woarom Taunte Ina soo väl enn jearn von Shake vetald, weet etj nijch. Oba uck de aundre wundade sijch, waut fe een gooda Jung hee wea. Enn toom eachten Mol em Läwe kunn eena meea Goots von eenem Mensch heare auls Domms, enn Niedatracht.

Enn soo auls aul aunjediet, wea daut aulatoop noch dolla toom wundre, wiels Shake siene Ellre, nijch bloß Tjaisa Rampels weare, nä, see haude uck Rachulje Rampels mett goodem Rajcht haude heete kunnt. Oba dem Shake wea daut dochwoll eenfach goot soo; daut wea ahm eendoont. Vleijcht wisst'e se nijch bäta, haft hee sijch dochwoll jedocht.

Oba während etj dit vetall, haft Shake aulwada fe Taunte Ina daut Enjekofte nennjedroacht, dee Botta enn de Maltjch enn de Eia em Ieschaup jestalt en jelajcht, enn den Wien enn daut Beea em Tjala vestoake, enn den Mell enne Tjäatjch toopjefäajcht, enn den Onroht rutjedroacht. Doabie, soo auls jesajcht, huppad hee emma full spied veropp, woabie ahm maunjchmol fe luta Iel enn Iewa sogoa daut unjaschte Jebiss rutjleppt. Daut hoof hee opp, enn noch biem ranne, wescht hee daut mett'e Meiw auf, stoppt sijch daut wada em Mul nenn, enn huppad wieda. Oba uck doabie wea hee frindlijch enn schaftijch; Shake freid sijch besondasch, wann hee Mensche waut toom Jefaule doohne kunn; dee Dach kunn ruhijch sasstien, uck achttien Stund lang senne, Shake wea unjawäajess, pienijch enn jenietsch.

Etj head mie daut gaunze Loobesleed von Shake aulnoch foaken aun, oba jeseehne hab etj Shake niemols doa bie Virgil romm, wiels hee je emma fe aundre Mensche unjawäajess wea.

Enn donn mett eenmol pessead daut, woamett tjeena jerätjend haud: Shake kunn Koah foahre, enn eenmol auls hee wada doa bie Niagara-on the-Lake enn siene Eajenschauft auls Pauslocka unjawäajess wea, tjreajch hee eenen Hoatschlach, enn fuah mett tachentijch Sache, soo auls Taunte Ina säd, jäjen een Boom. Oba Shake word daut nijch enn; hee wea aul verrem Opprall doot.

Mie word daut aules meahremol von väle Siede vetald. Mensche welle dochwoll, daut eena ahn dit enn jant too Auntwoat jefft, doamett see daut mett dem Doot enn mett äahrem Jewesse leijchta habe.

Taunte Ina tjitjcht mie bie aul äahre dralle Vetall vonne Sied aun enn meend mett eenmol: "Mista Thiesse, habe See den Shake nijch jetjannt? Hee kaum je von Jrienthol."

Enn donn heiwd mie de Erinnerung eent mett dem Peseatjel äwrem Pedaumtje-Datjsel. Joh, etj haud Shake enne School goot jetjant. Hee wea enn Grade Twee auls etj enne School kaum, enn hee wea enne fefte Grade auls etj mette School foadijch wea.

Enne School, enn uck enn Jrienthol, word emma enn foaken jesajcht, dee Jake wea een gooda Jung, oba een bät tridjjebläwe, ahm haude de Schop auls Tjind jekluntjt. Oba daut wea nijch soo: daut Gotteslaum haud sijch ahm uzhend auls Biespell fe aule een langet Läwelang utjesocht.

Oba daut word wie eascht väl, väl lohta enn.


© 2007 Jack Thiessen