Auls de Wetjeltjapp, aka Muselmanna, mehrere Joah tridj eenen vonne jewaultijchste, vondoagsche Schrefstallasch, Salmon Rushdie aulso, den Kopp aufgnuwle ooda sogoa aufhacke wulle, wea de mennische Welt omm mie 'romm seea oppjrereajcht. "Stall Die mol väa, Thiesse, waut daut fe eene hunjsche Jemeend ess; Mensche, woohne ahn nijch pausse, welle se eefach de Feet bett hinjre Uahre aufsäble. Kaunst Du sowaut väastalle?"
Wiels etj selwst een bät een Aunjeschnädna sie, docht etj mie soo's dit: "Wacht mau, leewe Jeschwista, well wie mol een bätje von langa Haund de Reatjnung enn soohne Sache toopstalle. Woo sach'et mett Predja Joakob Jaunze, den tjlienen Dramatika mett sienem steilen Bruschcut, auls hee aufong äwa dee Meßordnung enne stiewe mennische Ordnung noch enn Rußlaund too schriewe. Wulle onse Breeda ahm nijch toodoak gohne? Haude dee ahm nijch aul meist too dem Zwatjch de Burrsteewle utjetrocke? Rade deed ahm bloß, daut hee noh Kanada kaum, woa hee too wiet auf vom Heiwklotz wea."
Enn Arnold Ditjch haude se uck aul meist de Schlenj omm'en Hauls jelajcht, oba donn schreef hee sijch derjch spoßje Jeschijchte von Koop enn Bua frie.
Nijch gaunz soo jlei jintjch daut Rudy Wiebe auls hee aune 1962 mett sien Woatj "Peace shall destroy many" dee breedajemeendsche Bieeromp soo derjchenanunda brocht, daut se ahm de Steewel aum Hinjarenj satte, enn ahm derjch haulf Amerika rut schliesade?
Auls dann Al Reima mett sien Romaun "My Harp has turned to Mourning" feftien Joah lohta rutkaum, wea de Oppreajnis nijch meea soo groot, wiels de Demokratie haud sijch aul ver George Bush too seea derjchjesat. Enn see leehte Reima ranne, oba wea hee donn aum mennischen Bibelkalledge jewast, wudd Reima uck mehrere Free Rides vom Steewel jesat, jetjräje habe.
Miriam Töws haud Jletjch: fiewenzäwentijch Dusend Lesasch enne wiede Welt säde: "Hotz Donna, joh soo ess 'ett!" enn donn trocke de mennische Steewelhelde ähre Steewle tridj, enn säde aulatoop bloß: "Oh mai!"
Dann tjemmt oba noch waut aundret, nämlijch dee Tjapp, woohna eena nijch mett dem bloßen Uag seehne kaun. Enn wann Exupery enn siene aune bibelaunjelehnde Jeschijcht vom Tjlienen Prinz sajcht: "Eena sitt bloß mett dem Hoat rejchtijch; daut Wesentlijche kaun daut Uag nijch seehne," dann mott eena dochwoll mol wada gaunz aundre Seide opplaje, wiels daut Hoat enn uck de Seel uck noch jieda eenen Kopp habe.
Enn doawäjen doohne de Russe waut gaunz aundret, wann see äahre eajne Oat von eenem Salmon Rushdie, dee onaunjenehme Woahrheite von sijch jefft, dee Polietitja, daut veloagne Toakel, enn Tjriste noh de Oat von George Bush, ooda Jerry Falwell, ooda nohm Reform-Mosta toojeschnäde nijch vedroage tjenne. Joh, de Russe schniede ahm nijch den Kopp doa bowe auf, sonda gohne den Kopp von siene Seel toodoak, enn joage ahm utem Laund, enn doa vewaltjcht dann uck boold soohn Tjenstla von selwst, wiels hee sijch too Dood bangt, wiels hee nijch ohne dee Maltjch vonne rusche Seele utkohme kaun.
Daut ess sondaboa, oba uck Menniste tjenne noch emma enn toom Deel nijch ohne Rußlaund utkohme enn sijch trajchtfinje. "Wie" kohme von onse rusche Heimat tridj enn gohne aundasch, enn onse Uage seehne aundasch enn onse Ennsteallung too Lewe haft sijch von benne je-endat. Nijch bloß Al Reima kaum betjeat, aulso too niee Besennung von doa tridj, sonda hee ess Stellvetreda fe hundade aundre.
Enn wiels onse Erfoahrung enn Rußlaund soo deep wea, enn wie nijch meea de seelische Deepheit habe doamett foadijch too woare, loht wie dee eenfach toch. Daut ess onse seelische Schwoatbroak; onbeoabeit.
Woo aundasch kaun eena daut ertjläre, daut aune mennische Bibelkalledsches, dee sijch sogoa Universitäte nanne welle, nijch eenen Kurs äwa daut Kapitel Mennische Jeschijcht enn Rußlaund jebode woat? See woare doa mett dem Kapitel foadijch, endem see daut ignoreare. Sesst habe see fe aules enne gaunze Welt Roht enn Jelt, enn mische sijch jearn enn, oba enn ähre eajne Jeschijcht? Doatoo habe see nuscht nijch too malde. Enn wann eena ahn frajcht, woo ess sowaut meajlijch, dann leaje see noch auls Polietitja. (Fleiwe Utred send uck Läjnisse). Ooda see saje, daut ess goanijch pesseat, wiels see je doch tjeene Menniste meea send.
Daut jefft Sex-changes, auls Sex Enderung, enn dann jefft daut uck Identitätswaundel, enn dee ess je uck leijcht jedohne, wiels doa wea von Aunfong aun nijch väl von eajne Identität too späre ooda too seehne.
Oh joh, enn disse Bibelriedasch weare je dann uck dee easchte, dee Rudy Wiebe daut Lewe too eene Hall muake; see säde, see wudde, wann'et senne musst, dissen aufjefollnen Brooda too dood leewe, wann'et senne musst.
Daut Rudy Wiebe enn siene poah enje Biepritschasch väl dijchtret Frindschauft mett dem Psalmist David, von dem see jieden Sinndach pienijch schwietade, wea, worde disse meijeenje Huppupps äwahaupt nijch enn.
De groota Novellendijchta Theodor Storm lat aum Enj von siene baste Kortjeschijcht "Dee Schimmelreiter" dee Autorität, aulso den Darpschoolleahra dit saje: "Soo ess daut, Harr: Sokrates gauwe see Jefft too drintjche, enn onsem Harrn Tjristus schluage see aun daut Tjrietz! Daut jeiht enne latzte Tiede nijch meea soo leijcht; oba - een Turbauss, ooda eenen beesen, stieakoppjen Predja toom Heiljen, ooda een tijchtjen Tjeadel, bloß wiels hee eenen Kopplang hejcha ess auls wie, toom Nachtjespanst too moake - daut jeiht noch jieden Dach."