TACK, Tack... - von Jack Thiessen

Mensche woohne sienatiet nijch eenen John Deere Trakta jeheat habe, weete dann uck nijch, daut een Trakta een Hoat enn uck eene Seel haft. Daut jeheat bie eenem ellren John Deere opp twee Zylindasch soo toop soo auls de Fadre oppe Gauns, ooda Hoah opp een Kaulf, ooda Schlaubbetjze opp eenem Ooltkooloniea.

Etj sie de measchte enn dit Stetjch een bät veropp, wiels? Joh wiels onse Nohbasch Töwse haude eenen John Deere Model D, enn dis Tjätel kunn räde, Toon aunjäwe, enn hee haud uck Jrimse, Mucke enn uck Zoote. Oba measchtens wea hee een gooda Oohmtje opp veea Stohlräda: wea schratjlijch stoatjch, kunn tratjche, eene gaunze Draschmaschien bedeehne, enn doabie uck emma noch bieaun Seelenmusitjch moake.

Kratjcht soo auls Jie nu, docht etj auls Benjel, daut diss Tjätel bloos eene Maschien wea, oba auls etj donn enword, daut Töwse Joakob, wann hee hanenwada nijch enschlope kunn, rutjintjch, den Trakta opp Gaus stald, enn dann daut Schwungraud oppe lintjche Sied enne Medd loos dreid bett de Trakta aunfong sijch too veschlucke, enn dann läwendijch word, enn wacka word, enn stähnd, wiels ahm noch schleepad, oba dann dreemol hoost, enn dann aunfong too puttre, enn boold "Tack, tack, tack, tack..." enn donn sijch enne Fuste speajch, enn "TACK, TACK, TACK, TACK Utem Stijch!" säd, enn dann gaunz wacka enn toofräd soo auls eene Kluck mett Tjitjel aunfong - nu aul opp Diesel rannend - treestend em Takt too kurre, wisst etj, daut Töwse Joakob enjeschlope wea. (Daut jeheat hiea nijch han, oba auls Töwse Joakob Joahre lota sienen John Deere stohne leet, enn eenen Furdson Trakta mett Hiedraulitj kofft, veleeht ahm dann uck de gooda Jeist, enn dann vebiestad siene Seel, enn hee word Jehovah's Witness).

Oba tridj nohm John Deere...

Auls etj soo oolt wea auls een Mensch ess, wann hee noch fe George Bush wählt, dann wea etj, soo auls aule Joah, bie eenem Frind. Goode Frind send soo selden auls eene Buddel enne holdemaundsche Fupp: beid kohme väa, oba nijch foaken. Ooda, wann wie aul be de Menniste send, goode Frind kohme soo foaken väa auls een Brooda vonne Briederjemeinde ohne eene Biebel enne jieda Fupp.

Oh joh, auls etj soo oolt wea auls soohne, auls beschräwe, wea etj soo auls jiedet Joah bie mienem Frind Waulta Schmiedehuse enn Cauauhtémoc, een Mensch von Gottes Jnohd. Too Nacht schleep etj emma opp sienem Rancho Sans Soucie, aulso Ohnesorje, enn doa wea daut too dee Tiet soo stell auls biem David siene Red: "Meine Seele werde stille vor Gott."

Zemorjess jintjch daut doa dann loos, enn wiels daut mol wada de Aupeleiwst wea, lach bie Schmiedehusen oppem Hoff een groota Klompe toojesoagdet Holt, daut too Korftjess toopjenoagelt worde musst. Weens twintijchdusend Holtstetjcha musste Tjarw woare, enn doatoo hohmade twee Jungess, een Mennist enn een Mexa, twalv Stund den Dach opp eene

Reemabeintjch dee Tjarw toop. Wooväl doa weare, weet etj, wiels Ohmtje Schmiedehuse mie eenmol vetald, daut em Derjchschnettsjoah, opp siene Ranch jenuag Appel weare omm den Sindefaul von Audem enn Eevtje, fe jieden Ooltkoloniea enne Sierra Madre dusendmol too begohne. Daut heet aulso: dartijch Dusend Ooltkoloniea enn dee mol dusend jefft dree milljoone Appel. Ooda uck dartijch Milljoon von mie ut. Oba daut ess nijch de Senn von disse Jeschijcht.

Aulso tridj noh de Oabeit...Jiedem tjlienen Jerest, woohnt Korf woare sull, stunde acht Näjel too. Daut jintjch loos. Jiesbrajchts Fraunz schluag de Näjel mennisch enn. Utem ladanen Schalduak fippst hee de Näjel rut, enn schluag mett eenem Schlag, maunjchmol twee, de Näjel enn, enn boold stund uck aul noch een Korftje reed. Schluag too bett de Schnodda Fiea foot, schwind, ielijch, pragmautisch...

Während de Mexa? Soohn Mexa, woohna meea Rhythmus enne Jlieda, enn enne Seel, enn ennem Hoat haft deed daut gaunz aundasch. Dee schluag em Takt de Näjel enn, enn daut soo's dit: "Takt, takt, takt, takt, takt, takt, takt, takt, TAKT, TAKT, TAKT, TAKT, TAKT, TAKT," uck wann de Näjel aul aula lang benne weare, puttad hee mett dem Hohma emma sein Veatientakta too Enj. Kloppat eenfach opp siene tjliene Reimabeintjch wieda, doamett dee Takt stemmd.

Etj stund, enn horchd too, dann sad etj mie han, enn head too, wiels mie sien Takt soo fassenead. Waut wea daut bloos mett dissem frindlijchen tjlienen fetjzen Mexa, daut sien Hohma auls een Barabanstock soo eendrajchtijch biem hohmre emma siene eajne Melodie haud?

Hee word daut enn, daut etj mie fe siene Oabeit intressead, enn wiels etj soo väl Sponsch auls hee, Fernando heet'a, Plautdietsch kunn, wacht hee bett mett eenmol een Ladawoage volla Menniste hundat Meeta auf vebie fuahre. Daut Heirack word von eenem John Deere Model B, een Tucks hejcha auls emm Eidel jetrocke, enn diss Tjätel gauf ahm den Takt aun: "Takt, takt, takt, takt...und so weiter und so fort..."


© 2007 Jack Thiessen