Trubbel enne Jemeend - von Jack Thiessen

Auls jie daut weete ooda nijch, auls jie daut jleewe ooda nijch, dit ess de Woahrheit: Etj sie aul een poah Joah Eltesta von eene Jemeend. Wann uck eene Hunjsjemeend. Dee Probleeme, oba uck de Freid send deeselwje auls wann eena eene Mennische-Jemeend unja sijch haft. Na vleijcht een bätje aundasch, wiels de Hunj send uck lestijch, oba nijch hinjalestijch. Oba daut de Hunjsseel doch een bät bätre Vitamiene haft, weet een jiedra, dee Gott vesteiht, ooda vestohne haft.

Etj hab veea Metjlieda enne Jemeend: Fang wie biem jratsten aun. Daut ess Ankh, eene hundatpundje Drottje, eene Schäferhunjsche, - gaunz ajcht mett eenem dietschen Voda - stoatjch enn jlitjchut. Enn baussijch auls een Kohnhohn. Dann tjemmt äah Maun, enn dee heet Mitzvah, lat sijch oba jearn Mister nanne. Hee ess een Ooltdietschaschäfa-Oohmtje, aulso een bät zulltrijch, oba tjläatja auls mien Nohba schrohts äwre Stap. (Dis Onschuld heet Sonny). De dredde enne Jemeend ess Reeschtje, een jremmelja Glommskopp: see ess haulf Diakoon, haulf Plautzaunwiesa. Aulso wijchtje Positsjoone, oba eajentlijch nijch needijch. See ess enn eenem Stetjch seea begoft: see haft Hupewies Onschuld mettjetreaje. Enn dann tjemmt Ljuba, een Beagle, dee Ziel enn Jäjenstaund von disse Jeschijcht. Beagles send enjlisch: habe aulewäje de Näs benne, enn lohte sijch jearn spitjre, sogoa maste. Enn jäajre doohne see auls amerikaunsche Soldohte: aulewäje dootscheete, dann schmunzle. See ess opp äahre Oat leeftolijch, enn äah Jesejcht sitt'et soo auls een Schmaundduftje, oba see litjent em äwajen eenen klutanoaschjen Hohn opp veea Been

O joh, enn dann ess je de Eltestasche: miene Fru, enn dee haft väl mett dem leewen Gott äwareen: beid weete se aules, oba see doohne measchtens seea weinijch, mische sijch oba jearn enn, wiels see soo propheetisch send. Enn lohte opp sijch wachte.

Oba aul dit weet jie soowesoo, aulso waut jeft daut äwahaupt too vetalle? Gaunz eenfach: onse Ankh, dee mett Tjind, eajentlijch Tjinja ess, ess sensibel, enn kratjcht soo auls tweebeensche Frulied weet see foaken nijch waut see em näajchsten Moment doohne woat. Daut wisst sogoa Giuseppe Verdi auls hee siene Aria "La Donna I Mobile" aulso "Frauen sind trügerisch", enn noch schmocka opp Englisch "Women are fickle", oba aum basten opp Plautdietsch "O see send flautahauft!" schreef. Enn butadem haft see, enn haud aul emma, met Ljuba waut de Talk Shows "marital problems"foaken enn jearn nanne. Ooda opp Dietsch: see tjenne sijch nijch liede. Oba tjläatja auls Mensche: see rede nijch doavon, see räajle daut Problem mett Rosmack hoole.

Aulsoo soo auls aunjediet oba noch nijch jesajcht: Wann Ankh, daut studje, straume, kluake, enn stohtje Frumensch den Beagle, den utjewossnen Schoothund enn Ditjbuck sitt, dann benemmt see sijch soo auls een Brooda vonne Breedajemeend, wann dee eenen Ooltkolniea sitt: Dann schwalt ahm de Betjearungskaum aun, dann stohne ahm de Hoah too Boajch, enn dann satt sien Drief von 0-60 enn 1.2 Sekunde loos, enn dann moakt hee, waut de Enjlenda Doughnuts oppem Wajch dreie nannt, enn dee bie de Dutz; aulso Kullasch mett de Feet iewrijch oppe Stroht laje. Enn dann jefft daut tjeen Tridj meea. (Äwajens, wann wie aul vonne Betjearungswutt manke Menniste rede, mott etj junt vetalle, waut een oola, tjristelja, aufjedankta, dommjeleahda Predja vonne Holdemanna enn Tjleefeld mie foaken vetald. Hee sajcht: "Soo iewrijch auls een Holdemaun wann dee eenen Tjleenjemeenda, ooda een Rudnaweida wann dee eenen Reinlaunda sitt.")

Daut hiea aunjeschnädne Probleem lijcht deep: daut saul witte tjristlijche Amerikauna jäwe, dee doa meene, daut de Schwoate deep unja ahn send, sogoa seelisch. Daut saul Menniste jejäwt habe, dee doa meende, daut de Chocholle ähre Pauslockasch weare enn send, daut saul Dietsche jejäwt habe, dee doa meende see weare eenes Hauptes hejcha, enn daut gauf sogoa mol een Apostel Paulus, dee doa meend, de Frulied sachet schmocka, wann see daut Multjche, soo auls eene Perieschtjie, toohilde (vetald daut nijch wieda, oba etj jleew Paulus haud enn dissem Stetjch nijch gaunz onrajcht). Aulso well wie Mensche schmock oppausse, eea wie den easchten Steen noh de Hunjsjemeend schmiete, joh?

Aulso, woa well etj han? Nu aul äwa twee Wäatj tridj jintjch miene Fru mett de Hunj wiet noh Meddanacht oppe Oppfoaht spezeare. Daut wea bute soo diesta aule enn Stalin siene Seel, enn etj schleep soo omme säwen Schooh deep auls etj mett eenmol Jejauma, Jepracha, Jestähn, Jebäd, enn Jaumereare head, woohnt noch tjeen menschlijchet Ooah jeheat haud. Etj moarachd mett een Been enn eene Betjzelemp loos, enn reatjend mett dee Entretjung em plus quam perfectum, enn daut dee Tridjjebläwne nu soo lud hielde, enn aunjinje, wiels see nijch haude mettkunne, enn nu aun Seelenangst, auls Mensch ooda Hunj, leede.

Weit gefehlt! Daut sach em Growe oppem Rose bie ons schlemma auls en Bagdad wann de Amerikauna doa mol een poah Nasta manke Wetjeltajpp utjenohme haude. Ankh haud sijch aun Ljuba vejräpe, enn dem Tjlienen hong de Kopp mau aun eenem Twäarm. Ankh, dee Schutzhund, wea soo doll, daut see dreehundat Pund wuag enn äahre Kleiwe weare meist säwen Zoll lang, enn waut Tung heet? Dee reatjad, enn wea noch emma soo heet, daut dee eenjefäah soo väl Lijcht spend auls een tjliena Duracell. Enn äahre Tähne weare soo spetz enn soo iewrijch auls eene Redwood-Soag. Mista wea soo iewrijch auls een Moata fief Minute verrem Fiea aum Pohl; hee wull Fräd stefte, oba de Jemeend muak nijch mett. Enn Reeschtje bäd eendrajchtijch opp Plautdietsch, enn tjneep doabie de Uage too. Enn waut miene Fru wea? Äahre Betjze enn äahre Narwe weare aum Enj, kaput. See haude vesocht Ljuba too rade, enn wea doabie uck selwst meist toom Opfa jeworde. Toom Jletjch haud etj aul verhäa bie eene Broodaschauft oode de aundre enne Tjoatjch Schermetzel erläwt, aulso wea mie disse Schlacht nijch gaunz nie. Etj bload enn knufft, enn schreajch enn toobd bett de Ead bebbad, enn de Hunj aulatoop oppe Tjnees lage. Daut sogoa Hunj soo menschlijch woare kunne? Doaräwa wundad etj mie dann doch. Enn kratjcht soo auls bie ons Mensche, deede see je aules ut luta Leew. Een Schutzhund ess soo brow auls een Tieja, enn woat ut Leew toom Merda.

N. B.

Wie leete noch de selwje Nacht Ljuba den Kopp enn Steinbach wada aum Lief aunprune, enn de aundre Hunj tjreaje aula Dreppe enn Pelle, doamett äahre Narwe sijch berujde. Donn laus etj ahn eenje Bibelvarzh äwa Leew enn Eintracht enn Fräd väa. Bett opp Ankh betjeade see sijch aula vom freschen, oba Ankh gauf too vestohne: "Wann sijch eene fresche Mäajlijchtjeit finjt, dooh etj daut wada! Miene Leew auls Schutzhund ess bedinjungsloos, enn haft tjeen Enj, enn een missaja Hunjsgorjel woat mie uck nijch doatweschen kohme."


© 2007 Jack Thiessen