Mett Enjelstunge räde - von Jack Thiessen

"Onkel Peeta, welle See waut von mie? Wiels wann Menniste spendowelijch send, welle see jeweehnlijch waut besondret. Enn soo väl jerätjaden Wels, soohn scheenet Huptje Kavier ooda rejchtja jesajcht, Iekra, hab etj aul lang nijch jeschmenjcht. Enn dann noch dee Jreena Borsch mett Suaramp doabennne (wea daut mol wada de Harry Leewesche äah Rezapt?) auls Väaspeis mett hoatjekoakte Eia doabenne, wea kratjcht soo goot auls enn miene Jugend auls etj mie han enn wada oppe Dwäagaus enn Elloag verrem Djneperstroj-Bu opphild.. Aulso, Onkel Peeta woa welle See han?" froag mie daut Enjeltje Neetatje jistre zeowends biem Owendkost

Hauns, hiea em Himmel woat nijch jeloage, enn wann eena mol een bät oppschniede deit soo auls de Oola enn etj biem Jeschichtevetalle, jleewe de Mensche eenem aules, wiels daut hiea tjeene Polietitja jefft, enn doawäjen send de Mensche daut Läaje nijch jewant.

Oba omm aule Messvestendnisee väatoobeaje, ooda uttooschlute, schetjcht de leewa Gott, dee Oola aulso, de poa nieschieje Predjasch woohne daut hiea jefft enn ons twee Honijch aum Schnurr schmäare welle, noh Tjoatjch, woa see sijch mett noch weinja Biznesmanna, dee Planners & Developers Co. Very Limited, toop opphoole.

Aulso hab etj mie uck ommstalle musst, enn mien Enjeltje Neetatje toop mett een goodet Äte de Woahrheit oppdesche, wiels see haud daut jerohde, etj wull waut. Enn bie de Läpelkost, aulso de baste Arbuse oppe Ead ooda em Himmel, de elloagsche, toop mett Morozhnaja leet etj miene Nieschiea soo langsom utem Hock, enn fruag soo auls dit: "Neetatje, waut heet daut wann Paulus von 'mett Enjelstunge räde' schrift?"

"O, daut kaun etj Ahn jearn saje, wann mie daut uck noch emma een bät oajat, wann etj aun dissen fiestnäsjen Kluakschieta noch oppe Ead dentjch. Nijch bloos daut, dann frei etj mie, daut etj een Enjel sie, wiels Paulus enn Frulied, send soo meea auls George Bush enn daut Tjristentum, ooda Hunj enn Kaute: see tjenne sijch nijch veknuse.

"Aulso, Ohm Peeta, wann See mie noch eene Schnäd Arbus toop mett een utjewossnet Stetjch Obraumtje opp miene Meissner Schiew laje, enn doatoo een Glausstje Braundwien ennjeehte muchte, vetal etj Ahn mol waut Paulus doamett meent."

Na, dann spood etj mie meist soo seea auls een Diakoon biem Kollatjtetalla-Jeld talle noh eene Erntedankfast Predijcht, wiels nieschierijch ess je eena uck noch sogoa hiea em Himmel, besondasch wann daut waut mett de Pohpswohl enn Rom too doohne haft. Joh, daut ess Grund doafäa, daut de Oola sijch mett Jesus enn dem Heiljen Jeist dann enne Oohmtjestow tridjtratje, enn iewrijch berede, woo enn wanneea see äahre Weisheitsduwe looslohte woare. Enn doa sette dee Dree mett een poah Rohtjäwasch, drintjche entweda Rum enn Coke, aulso Cuba Libre, ooda Bitzburger Beea, oba measchtens Single Malt Scotch, mett ooda ohne Ies em Kristallglauss vonne Moatjch Spode. Enn Moselwien sowesoo. Enn Grappa, wiels daut en Rom enn em Himmel uck soo mott. Piep woat dann nijch jeschmeatjcht, oba Havanasch bie de Dutz, uck measchtens Cohibas. Enn waut sesst den Jeist toom Gooden aundrifft."

Waut enn woo see doa berede, vetalle see eenem nijch, oba dee Oola tjemmt dann doch maunjchmol zeowents noh de groote Broodaschaufte oppem Wajch noh Hus vebie, enn wann etj dann Braundwien ute Tjrimm mett Arabica Boohnekoffe oppdesch, lat Hee dann doch dit enn jant derjchjleppe. Enn wann etj dann fe ahm eene Piep mett Latakia reed hab, dann vetalt Hee aulnoch meea auls eena jleewe well, wiels Hee weet je waut de Katholitje aul aules jedräwe habe, enn den Martyra Speajel tjannt je de Oola soo goot auls utwendijch; doafäa haft Johaunes Hoada jesorjcht.

Oba vondoag haft je Neetatje daut Wuat, enn see läd loos: "Daut Prophezeie doohne de Propheete measchtens, oba een poah Enjel vestohne uck een bät von dee Konst. Aulso waut nu aulewäje daut groote Thema ess, ess je de niea Pohp, enn daut woa etj dann soo auls de leewe Gott mett siene Biehutschasch deit uck veseatje, nämlijch mett dem Prozass vonne Eliminatsjoon. Enn wiels de Nuadamerikauna measchtens aun meist nuscht jleewe, enn daut bätje, waut see jleewe mett äahre schataja Social Scientists noch vedemple, tjemmt niemols nijch een Pohp ut Amerikau aune Macht. Uck wann ahn daut seea jankat, enn uck nijch wann see twee Milljarde ooda noch meea tohle.

"Enn wiels daut aune groote Klock hiea emm Himmel aul eene Minut verre latzte Twalw steiht, daut aulso aulatoop seea porrt, enn wiels de witte Mensche sijch soo lang aune Schwoatasch vesindijcht habe, woat de leewa Gott, woohne See emma den Oolen nanne, ditmol daut Stiea enne Haund nehme, enn lentjche, enn eenem daut Fiea enn Rom em Vatican aunstetjche lohte, enn een Schwoata woat mett eenmol derjche Gardiene - oba eascht woat hee sienen Cuba Libre schmock opp eenem Desch vesteatje - doabowe ruttjitjche, enn de niea Pohp senne. Eena kaun bloos hohpe, daut de Wohl nijch de Nacht pessead, wiels em Diestren eenen Schwoaten utmoake ess je nijch soo leijcht jedohne. O joh, etj haud meist vejäjte too erwähne, daut biem Ruakmoake enn dem tjlienen Schornsteen em Vatican, de heilja Jeist emma dee Finjasch em Spell haft, wiels Hee ess em Ruakmoake ons Expert. Nebenbie jesajcht, Hee ess je dann uck dee Jansja woohna de Zigoarekonst entdatjcht haft, kratjcht soo auls de Oola de Easchta mett de Arbuse aul emma wea. Enn soo auls bekaunt, wea Jesus opp dem Jebiet vonne Wiemoakarie aul emma de Eachta auls Bowe ooda Unje. Enn doawäjen wea Hee dann uck de Easchta woohne aulewäje de Tjastmoakarie ennfeahd. Enn daut ess bett vondoag dann uck soo jebläwe: wann daut opp eene Tjast tjeen Wien jefft, dann ess Jesus bett nutoo de Meddachschlop leewa. Aulso steiht: Pater, et Filius, et Spiritus Sanctus fe Arbuse, Wien enn Havana.

"Enn wiels en soohne Sach wie daut em Himmel earnst meene, halpt je daut dann uck wann de neajchsta Kardinal nijch fe Saint Louis spält, soo auls de Amerikauna meene, sonda daut mett dem Arbuseäte, mett Wiendrintjche, enn Havanaschmeatjche earnst meent, enn doawäjen ess Rom dee Kapitohlstaudt vom Tjristentum. Joh, enn doawäjen säd je dann uck sogoa de heilje Suregurtjch Paulus, eena sull enn Rom doohne waut de Reema doohne, wiels Paulus doa jearn toolangd; enn Jerusalem jachte enn zankte dee Jude sijch aul emma auls eene Hupe Menniste enn meende uck aul emma: waut dem Mensch scheen jeiht, daut ess Sind.

"Joh, Onkel Peeta soo steiht daut omm disse Sach, enn bloß wiels sijch daut aulatoop scheen heat, meent daut oba noch lang nijch, daut daut nijch soo ess. Enn waut soo ess, ess je dann uck measchtens sogoa de Woahrheit.

"Aulso: de näjchsta Pohp woat een Schwoata senne, enn daut ess dann uck de Latzta, wiels wann dee aufdankt, schleiht de Klock emm Himmel Twalw, enn dann ess de Spohs too Enj, enn wea dann hiea ess kaun mett dee Eppaschte toop Arbus äte, Wien drintjche enn Havannasch, ooda Piep schmeatje, enn daut tridjjebläwne Toakel ooda uck Peebel jenannt, mott dann wiedahans oppe Ead Reboabastenjels gnaubere, sijch aun McDonald's Schwienskotlette maste, Ditjche Maltj läple ooda Coca-Cola drintjche."


© 2007 Jack Thiessen