Leewa Hauns,
Daut kaum soo: Wiels daut uck hiea emm Himmel Hoawst ess, enn de Wiendruwe tweschen hiea enn Odass aul lenjst measchtens enne Buddle send, enn uck toom Deel em Faut, leet etj mie een Tonntje "Nippadreppe" kohme, enn daut taupt dee Oola enn etj jistre zeowendz aun.
Wie haude jrods goot mennisch jejäte, aulso Hollopzee enn uck Heehnabrode met Eadschockebrie enn jeschmuade Jalmäahre, enn doatoo gauf'et eenen freschen Wien toom drintje. Wooväl wie drunke, woa etj leewa nijch vetalle, wiels wann daut enn Steinbach, enn tweschen Nuad- enn Oostkildona bekaunt woat, daut dee Oola enn etj litawies zeowendz, wann'et senne mott ooda uck nijch, drintjche, dann kohme de ditjschalje Donnasch doa bie junt opplatzt opp domme Jedanke.
Wie haude aul verrem Äte jieda een poah stiewe Sturacks Kruschtjeschnaups auls Cocktails jedrunke, enn diss Schnaups schmatjcht soo vetraflijch, daut sijch daut aul doawäjen loohnt oppe Ead schmock too senne, doamett eena em Himmel tjemmt omm den too drintjche. "Bozhe moi!" sajcht de Oola emma noh dem Hee mol goot Spatj jemäte haft, "daut schmatjcht goot!" Enn wann dee Oola sijch besondasch freit, heiwt Hee sijch foaken selwst eent äwre Ladabetjze, daut'et stift, enn wiels daut soo lud knault, kohme dann uck emma fuats een poah Nohbaschhunj, auls Dach ooda Nacht äwadäl, wiels see jleewe, bie ons woat biem jäjre jeschohte, enn see welle, soo's jeweehnlijch, jearn doabie senne, enn metthalpe.
Hauns, etj wull die noch vetalle woo daut hiea em Hoawst , aulso biem Ooltwiewasomma ess, wann wie dee Wiendruwe enn eene groote Bett nennschedde, enn wann dann aules reed ess, dann lat de Oola väle tjlandere mennische Jungess kohme, enn dee motte sijch eascht fein de Feet wausche, enn sijch de Betjzelempe opptjremple, enn nohdem see vesproake habe, nijch too väl Wiendruwe biem Traumple too nausche, enn see uck vesproake habe, bloos Plautdietsch too räde ("Wie brucke ons hiea nijch domm habe, wie send je nijch enne Tjoatjch!" sajcht de Oola emma bie soohne Aunlausse), dann jeiht daut loos. Uck de tjliene Mejahltjess derwe Wiendruwe utklunje, enn uck doabie hanennwada jrettre, enn dann diead je daut uck nijch lang bett de Sauft derjch eene Sieh unje enn eene groote Komm nennrannt, enn dann enn een grootet Faut nohm aundren jegohte woat.
Natierlijch send de Jungess hiea kratjcht soo ooltnäsijch enn uck een bät goastrijch auls oppe Ead, enn biem Wiedruwe utklunje sinje see, wann de Oola enn etj nijch jrods doabie send, ut vollem Hauls: "Horch der Heiland, lässt Dich laden...", enn dann schriee see ut vollem Hauls den Choral "Komm, Komm enn Sieh!"
Etj sull noch erwähne, daut de measchte von disse boafte Traumplasch utem Darp Druve-Klunja kohme.
Oba wie habe nu aul too Enj jejäte, enn dee aunjeschnädna Owent kaun nu siene Been enn eene aundre Rejchtung ennschlohne.
Etj sull uck noch erwähne, daut dee Oola entweda mett een Peadsfoatijch reist, ooda oppem Pead ritt, wiels Hee fe aule Technik emm gaunzen Himmel nuscht nijch meea äwrijch haft, wann Hee uck hanenwada, wann'a daut seea drock haft, ooda, soo's Hee selwst sajcht, "wann etj mol mienen mennischen drocken Dach hab" loht zeowendz opp siene Motooaraud rommbrommd.
Etj goot emma wada pienijch den gooden Nippawien enn, nohdem daut Enjeltje Neeta, onse Tjäatjsche aulso, schlope jegohne wea. Wann wie dann soo scheen toop sette ess daut aulatoop meist soo scheen auls fräajoah em irdischen Elloag. Woa etj mett disse Vetal hanwell, ess seea eenfach: wann de Oola enn etj biem Piepschmeatje enn Wiendrintjche soo goot enne Vetall kohme, dann blift Hee jeweehnlijch äwanacht, wiels Hee een goodet Biespell satte well, enn nijch mett sien BMW-Harley de Nacht foaht. Butadem vetalt Hee toom Freehstitj toom Koffe dann uck noch eene Schnett besondasch goode enn niee Resse, wiels Hee sijch de Nacht utjereiwt haft, enn ddoabie opp fresche Jedanke tjemmt. Wann Hee dann aul gaunz tiedijch hiea enn miene Lautekoht aum Nippa-Eewa biem Zigarillo-Schmeatje niee Jedanke bie de Dutz oppdescht, mott eena sijch doch wundre. Soohn himmlischa Voda haft een gaunz aundret Repertoire aun Jedanke ooda uck Melodiee auls sogoa Mozart, Dostoevski ooda Goethe toop. (Enn uck Verdi, wiels Reima well soohnt emma fuats weete). Eenem tjemmt maunjchmol de Jedanke, auls wann aule Konst oppe Ead von dem Oolen siene Seel, ooda sien Hoat, ooda sien Kopp ooda von aule dree himmlische Darpa biem Oolen ennalijch aunjelajcht, tjemmt
Oba etj jriep väa, wiels wie noch emma biem Wien sette, enn ons vetalle. Dem Oolen jeiht daut nijch goot, wann eena bloos räd omm too räde, ooda om Loft, aulso Suastoff, woohnt jie opp Ead dochwoll noch emma Oxygen nanne, too vebrucke. "Dann leewa biem Jeschijchtevetalle een bät äwadriewe, wann nijch sogoa een bätje flunkre, auls reinet Domms uttoopuste," sajcht Hee emma.
Auls de Vetall mett eenmol lang word, saj etj toom Oolen (wobie mie fuats dietlijch word, daut Hee vleijcht oppe Städ sien Packtje Koahte, sootoosaje, nehme wudd, enn sijch trotz veea Buddle Dreppe aun eenem langen Owend, aules enfuppre wudd, enn opp sien Harley loosputtre wudd). Mol seehne, soo docht etj mie; etj woa daut mol dropaun kohme lohte. Etj saj: "Oola, wann Du die, saj wie mol, eene mennische Jemeend oppe Ead aunschlute wullst, woohne wuddst du die utwähle?"
Daut wea meist soo auls wann de Oola sien haulwet Läwe aun nuscht nijch aundret jedocht haud, auls Hee fuats oppe Städ dissen Jedanke, enn uck eene niee Buddel Wien toodoak jintjch.
"Wiels de Prosperity Tjoatjche mie nijch tjristlijch jenuag send, kohme dee auls easchte nijch enn Froag. Enn waut blifft eenem dann noch äwrijch? Eenem bliewe dann bloos dee äwrijch, enn dee aum weinijchsten Sind jedräwe woat. Enn bie aul de jeistlijche enn jeistje Ditjchbuckijchtjeite mang ähre soojenannde Leahrasch rät meist tjeen Prädja niemols von dee Bediedung Sind.
Sind ess nuscht aundret auls wem ooda waut weeh doohne.
De Psalmist David wea, enn ess, een butajeweehnlijch groota Ooltnäs, oba etj leet ahm sijch een jeheajet Strämel vonne Läwensworscht aufschniede, enn doaräwa haft hee je dann uck meea enn bäta berejcht auls daut de measchte Mensche pausst. Enn wann Doft aulso emm näjentienden Psalm en mienem Senn sajcht: "Die Himmels vetalle von de Eah Gottes ,enn de Faustunge von dem Woatjch von siene Henj" dann haft hee daut rejchtijch vestohne. Wiels auls etj daut Gaunze junt bekaunte Weltaul mett Firmament, enn Himmelszelt, enn Stearns, oba uck Otboasch, enn Tijasch, enn Nilpead, enn besondach de Hunj äwa Milljoohne, enn Milljoohne Joah aunlead, enn buhd, enn muak, wea daut gaunze Universum een Leed vonne Harmonie, enn Leew, enn edla Jeist. Enn jieda Hund, enn jieda Wulf juhld daut Leed von disse Harmonie, enn jieda Voagel, milljoonewies, äwa milljoone Joahre sung dee Wies von dee Schöpfung enn mienem Senn.
"Hea Die mol wada Hayden's Schöpfung aun, enn dann weetst Du waut etj ahm toom Thema engauf. Aulso, aulewäje wo Mensch Respatjcht fe daut Läwe habe, wiels daut Läwe ess Deel von miene Leew, doa sie etj Tus.
De Oola enn etj drunke noch mol een Kroos mett de baste Dreppe ladijch, enn dann noch eent, enn auls Hee wada mett daut Thema aunfong, schweet ahm dann doch een bätje auls Hee säd: "De Nieschiea enn besondasch de Eahjiez, vonn'e Mensche soo huach jelowt, haft aulahaund Goodet jebrocht, oba measchtens wea daut de Wajch toom Enj, toom Diestren, toom ennalijchen Doot. Enn auls etj dann sach, woo schendlijch de Mensch veaunloagt wea, enn ess, eascht donn läd etj den Himmel hiea aun, wiels de Ead auls Himmel wea je mie nijch meea good jenuag, wiels de Menschheit, soo auls jesajcht, de Ead derjche Sind soo schratjlijch vekujelt habe wiels see sijch emma wada jäjensiedijch enn uck de gaunze Natua weh deede, doohne enn wiedahans weh doohne woare, bett etj een fe aulemol opprieme woa."
Wie lage aul, enn etj haud jrods de Laump utjepust, auls de Oola mie von sienem Bad enne Gauststow noch mol tooroopt: "Daut heat sijch vleijcht nijch scheen, oba de measchte Mensche woohne noch emma Plautdietsch räde meea von dem Nijchwehdoohne weete, enn meea von dem Respatjcht fe daut Läwe enn doamett fe mie äwrijch habe. Enn wiels Du, Petro weetst, von woohne Jemeend etj räd omm Diene Froag too beauntwoate, mott daut dochwoll soo goot senne.
"Enn nu well wie Plautdietsch schlope, wiels soohn Schlop tjrijcht emma eenen extra Schulps von mienem Säjen enn miene Jnod! Enn saj Dienem Hauns, hee saul uck Kimberly Miller enn de aundre en Madison daut vetalle, joh?