Joh, daut stemmt, etj sie noch niemols opp'em Calgary Stampede jewast, oba daut bediet noch lang nijch, daut etj nijch weet, woo daut sijch doa aulatoop vehelt, ooda waut doa väajeiht, enn sijch aufspält. De Fantasie ess toovelessja auls de soojenannde Wertjlijchtjeit, enn wann jie mie daut uck aul mol wada nijch jleewe welle, dann froagt doch bitte den leewen Gott. Dann weet jie, enn etj sowesoo.
Oba eent weete sogoa aul de krommbeenje Cowboys mett ährem grooten Datjsel oppem Kopp, woohne se doa eenen fiefgelloonjen Hoot (ruhm twintijch Lieta), aulso eenen omjestelpten Drankamma, leijcht oppjeweppt, nanne. De Cowgirls doa sitt'et nijch väl aundasch, bloos daut see doa mett eene hejchre Stemm "Yippie!" dach enn nacht schriee, uck wann ahn tjeena nijch tjniepe deit.
Sesst ess daut doa soo meea äwareen: den gaunzen Dach äwa riede see, ooda säle sijch em Stoff, enn zeowends drintjche se biem Faut Calgary Redeye, waut soo väl ess, auls Beea mett Bocklezhanesauft. Daut saul den Kota, aulso daut Ruzhe emm Kopp von tooväl Beea supe, vedriewe.
Noh Calgary toom Stampede kohme uck väl, seea väl Texauna, enn dee ertjant eena doaraun, daut see daut Scheetiesa benne enne Betjze droage, enn niemols nijch von Beea eenen Kohta em Kopp tjriee, wiels see measchtens eenen ladjen Bähn habe. Enn daut mott soo, wiels see doa bowe aulejemeen seea väl Domms spitjre.
Oba daut aules mau soo bieaun, soo auls de Einleitung too de Predijcht proper.
Woa etj oba hanwell, ess dit: näajchstet Joah woa etj enn Calgary oppducke, enn daut fuats een bät em Grooten, wann aules nohm Plon jeiht. Wiels? Joh, wiels etj hab mien Auftrett doa von lange Haund jeplohnt, enn daut heet, eene Grupp enn etj welle doa, sootoosaje, mett een Stetjch toom Freiwilliges opptrede.
Miene Poatnasch enn etj habe tweschen Kaumplaups enn Shushwap Lake, enn een bät ooste doavon, endlijch een Sasquatch Nast jefunge, woohnt'et soo meea noh eene Kolonie von disse Sort litjend. Daut finje diead ons lang, seea lang, enn wie musste väl Opfa brinje. Oba wie tjreaje vonne Mormone aulnoch jehearijch Jeld fe onse Expeditsjoon, dee wie seea jeheem den Code Nohme Klatsch enn Quatsch gauwe. Enn Opfa musst wie uck brinje, wiels wie musste je Wäaj enn Meddel finje omm de Sasquatch noh ons too locke enn too taubre, aunstautt, soo's auls aule aundre, dee wille gruselje, buzhaja, zulltaje Donnasch Joahrelang hinjeraun too ranne, omm ahn psychologisch bietookohme.
Enn eenem Stetjch wea wie onse mennische Missjoons-Konkurrenz wiet veropp: wie jinje mett Beea auls Lockmeddel nijch spoasom omm, enn wie rede je, emm Jäjensautz too de George Bush-Jinja Mennoniete, aula Plautdietsch, aulso eene Uasproak, woohne sijch, soo auls sijch daut rutstalle sull, de Sasquatch väl bekaunda enn uck vetrulijcha auls Texas Englisch ess. (Wann jie enn dissem Stetjch meea Informatsjoon habe welle, dann froagt enn Nuadamerikau bitte bie Al Reima ooda Reuben App noh, enn enn Europa bie Peeta Pota Wiens, enn enn Asien Karl Peetasch; dee weete; see send em Bild, soo's eena sajcht.) Oba waut ons aum measchten too Good kaum wea seea eenfach; wie jinje bieblisch väa. Ons Motto? "Eene Staudt oppem Boaj watjcht den Janka"; enn soo wohnd wie doa opp eenem Anboajch een haulwet Joah, rede bloos Plautdietsch, bleewe bie de mennische Manneare, trocke ons ooltkolniesch aun, enn schmeatjte entweda goanijch, ooda Piep. Hanenwada leet etj eene Piep oode de aundre toop mett Baby's Bottom, Parson's Pleasure, ooda uck Barnyard Pleasure Tobak bute äwanacht lidje. Enn boold nauhm mien Tobak auf enn mien Erfoljch too. Enn, soo's auls jesajcht, kunn de Sasquatch-Jemeend emma bie ons aum Beeafaut schwalje. Enn daut deede se je dann uck schmock noh de mennische Oat: eascht han enn wada de Nacht een Schluckstje ute Buddel fippse, enn boold ernoa utem Faut supe. Jeseehne hab wie daut nijch, oba wann een Ammavoll Schum noch oppem Deiw em Graus tieidjch zemorjess bruddelt, dann weet je eena, daut entweda een Steinbacha, eena ut Bayern, ooda een Sasquatch Eltesta aum Woatjch jewast ess.
O joh, enn onse Frulied druage bloos Ratjch, enn niemols nijch Betjze ooda Jeans, wiels Sasquatch, soo docht etj mie, habe weinijch Vestendnis fe bedajchte Fruesbeen. Woaromm wudd ahn daut aundasch gohne auls mie, ooda dem leewen Gott? Etj sull mol wada enn dissem Stetjch Rajcht habe.
Na oba, oba etj hab daut mett disse Jeschijcht vetalle too drock, omm mie mett Nebensejchlijchtjeite opptoohoole. Etj bedd omm Vestendnis.
Dee Red wea von Opfa brinje. Enn doamett ess daut uck mol wada soo: een jieda weet waut daut meent, oba meist tjeena weet nijch waut daut eajentlijch bediet. Bie ons wea daut soo, enn daut vetall etj uck mau bloos, wiels de Missjoonare, woohne noh ons bie de Dusende manke Sasquatch aunkohme woare, sijch väl Meaj enn Jeld spoare tjenne, wann se schmock tooheare woare.
Aulsoo: Wann Mensche too Menschefrätasch woare tjenne (enn daut hab etj selwst opp Sulawesi erläwt; etj kaum uck mau mett Tjniepameaj mett mien Läwe doavon, enn doawäjen sie etj Experte, enn earnst too nehme), dann tjenn jie junt dentjche, waut de Sasquatch soo aules väa habe, wann see zeowends mol aum Raund von eenem Darp spezeare gohne.
Een poah Universitäte habe dree Milljoon Dolah enn tien Joah Tiet jeopfat, om uttoofinje, wem de Sasquatch emm Mieagrope nennschmiete enn goah brohde, enn mett Hoot, Hut enn Hoah oppfräte, enn wem nijch. Enn ditmol habe see sogoa rajcht: De Sasquatch fräte aum leewsten fleeschfrätende Mensche opp, oba dee woohne sijch meea mett Jreens enn Jetjätjs bejneaje, lohte se jeweehnlijch mett eenen Dentjzadel ranne. Aulso haft toom Biespell een Texas Missjoonoa, woohna sijch emma fein rund enn saut aum B.B.Q. frat, doa tjeen Chance. Dee veschwinjt fuats mett den Buckvoll Beef, mett Steewle, Jeans enn eene grooten Smile em Mieagrope, enn woat oppjegnaubat. Dee Survival Rate mank disse ess bett nutoo .005%, enn doawäajen hab jie niemols nijch jeheat, waut doa emm kenaudschen Bosch enne Sasquatch-Provinz pesseat.
Aulso säd etj fuats too meine Forschungsgrupp: "Wäa nijch reed ess Vegetarier too woare, kaum fuats noh Hus gohne. De Alternative ess Fooda fe den Sasquatch Mieagrope. "Aulso: Joh ooda Nä?" Enn dann wea Fräd. Bett opp een Bubba Jaunz, een tjliena Vada vom Jaunz Team, läw wie aula; Bubba schmenjd foaken hinjaridjsch Schwiensfleesch, enn nu ess hee manke Jreewe. Wie funge emm Zelt eenes Morjess sien ladjet Bad, oba ons Tjeelschaup wea noch ohp; dee Sasquatch haude ahm beluaht, ahm jeleewat jenohme, enn ahm eenfach emm Miagrope unjajeduckt. Wiels dem Bubba daut Jeld emma soo wijchtijch wea, de Sasquatch oba nijch wisste, waut see doamett doohne sulle, haude see zemorjess bie ons oppe Oppfoaht sien Tjnippsbiedel mett äwa fiefdusend amerikaunsche Dohla Boajeld doabenne hanjelajcht, enn uck een Kommtje Jreewe, dee ons bekaunt ritjchte. Aulso een Kommtje Dank enn Aunertjanung, woohnt wie feierlijch emm Frostschaup bett vondoag oppbewoaht habe.
Aulsoo, nu weet jie mien Jeheemnis, nu goht schmock han enn tut dasgleiche.
Jenuag, de lange Tiet von onsem jewaultjen Missjoonsenn haft sijch jeloohnt. Aulsoo: Näajchstet Joah, aum latzten Dach vonne Calgary Stampede, soo jäjen Owend, wann de Mensche sijch aul aunfange too freie, waut'et näajchstet Joah vleijcht aules jäwe woat, enn aundre sijch aul ve luta Langewiel aunfange too schobbe, enn endlijch Tiet habe Frindschauft noh too fädme, dann woa wie dree Menniste mett eene Famielje Sasquatch opptrede.
Heete woat de Tabun Obraum, Joakob enn Isaak, enn dee twee Oolasch Saulmoon enn Eadmaun.
De Fruees Sort, woohne wie mett korte Ratjch enn eenen rooden Hoot, aum Raund uck een bät noh de latzte Mood oppjeweppt, utstraume woare, heete: Sarah (ooda uck Susch), Mitsch, Rebecca, enn Trien.
Twee tjliene Sasquatch, woohne sijch noch, sootoosaje, enne Broodstatsjoon befinje, selle dann Nooah enn Mooah heete. See woare mett rutjche Schaldeatja, oba uck boaft, rommzauble.
Dee Bood, enn dee wie dee Kolonie rommfeahre woare, woat gaunz eenfach: Elloaga-Nippaenja heete.
Na joh, oba soo's de fraunzeesische Mejalles nu aul dusend Joah saje: Eene Maun ohne Schnurrboat ess soo auls eene Supp ohne Solt, enn soo, sootoosaje, hab wie uck eene Schnurr reed, nämlijch: etj woa mie mett Obraum fohte, aulso rautze. Wie woare beid eenen Pojas äwre Schlaubbetjze droage, enn ons veseatje too schmiete, ooda sogoa unja too nehme. Daut wie dit Proowstetjch aul tweenhundat Mol, wann nijch foakna, je-eewt habe, brucke de hundatdusend Mensche doa nijch weete. (Enn jie eajentlijch uck nijch, oba daut endat aune Sach weinijch, wiels de Resslasch oppem TV, doohne je daut selwje, enn uck dee, jleewt tjeena nijch, mau Sposs em Groffen eewe.)
Na joh, oba Obraum enn etj woare enn een Drohtklotje mett acht Atje, dartijch Schooh em Derjchmäta, ons hinjeraun satte bett Fall, Schweet enn Schnodda fleaje woare. Wie woare doabie uck soo's de Grunzkujels schindeare, wiels sesst kohme de Amerikauna nijch.
Etj wudd seea jearn wieda vetalle, woo dee Schluss utfaule woat, oba daut dooh etj nijch, wiels sesst kohm jie nijch too de jratzte Show on Earth. Oba eent kaun etj junt aul nu verohde: toom Schluss woa wie aulatoop daut Leed:
"Hab oft im Kreisen der Lieben
Im duftigen Grase geruht"
sinje, mett besondre Betoonung opp Duft. Wann disse noch emma een bät wille Bonsch doabie aunfangt de Hacke enne Loft too tjriesle, daunze aulsoo, dann hoolt ons daut bitte too good; see send noch emma nijch gaunz mennisch. Daut tjemmt noch.
N. B. Brinjt ruhijch jun Frindschauft mett. Bett'em näajchsten Stampede hab wie de Willasch sowiet, enn dann kaun de Tabun aul schriewe. De easchte fief Dusend Jast tjriee von Saulmoon Sasquatch een Autogram. Omsonst. Oba loht bitte de Worscht enn uck daut sesstje Fleesch Tus; etj kaun Backsliders nijch vedroage. Butadem: Eena saul Freschbetjeade nijch enne Versuchung brinje.