Leewa Hauns,
Enn väle Stetja ess daut hiea emm Himmel kratjcht soo auls oppe Ead. Toom Biespell aum Sinndach verre-meddach omme Tjoatjetiet. Daut ess dem Mensch soo enn, daut hee dann noh Tjoatjch wanke well, enn waut hiea bowe de Menniste send? Dee witjze sijch de Schooh mett Kiwi-Witjs aul sogoa biem Unjabetjse äwre Lenjd streepe, wann de Sinndach zemorjess oppem Kalenda steiht.
Dann tjrijcht eenem de Jäatjch unja, enn eena haft nijch Ruh eea eena doch sogoa hiea emm Himmel loos satt, ooda fe Ersatz sorjt. Enn waut jewesne Prädjasch aunjeiht? Dee send om disse Tiet jieda Wäatjch soo wizhrijch auls wann see Warm habe, enn send uck hiea dann nijch bäta too liede auls Tus oppe Ead twesche Gortietz enn Jrienthol, ooda tweschen Tjleefeld enn Huachstaudt, ooda Aultneiw enn Roosenuat, ooda Ste. Elizabeth enn Arnaud. Dann rant jieda menschlijcha Motooah opp extra Daump, ooda soo auls wann eena eene Päpaschoot, Sinnowend fe extra Drief - wie weete je uck woa - nennjestoake word, enn noch emma wirtjcht.
Enn uck dem leewen Gott ess dochwoll uck noch emma de Schepfungsdrang enne Jlieda, wiels aum Sinndach verremeddach ess Hee noch bäta auls jeweeehnlijch too liede, wiels dann lajcht Hee noch meea von siene Menschlijchtjeit auf, enn ess frindlijch enn oppjeriemt, auls wann'a mol wada een Lotto Pries Numma Eent jewonne haft, enn Hee sijch een extra Stetjch Halvah, ooda uck een extra Kommtje Morozhna leiste kaun, ooda sogoa een Tjniepsel Iekra sijch oppem jekoakten Ei toom Freehstitjch jenne woat. Joh, dann schmustat dee Oola kratjcht soo auls donn auls Hee toom easchten Mol Jiesbrajchts Neeta ähre Tjoascheperischtjie too schmenje tjreajch, enn Hee nohäa, mett äah Rezapt toop soo een bät polluksch omme Atjch noh Hus aufrascheare deed.
Joh, dann kaun eena mett dem Oolen ruhij een poah Dommheite aunstalle, wiels aul dee Krauft enn Energie, woohnt eena dochwoll fe den Gottesdeenst oppjespoat haud, nu fe kreatiewe Zwatjche loosjelohte woare. Enn tjeen kreatiewa Zwatjch ess dem Voda emm Himmel leewa auls een Schock Resse too riete. "Enn" soo auls Hee dann emma sajcht, "doatoo leeht wie je aul emma Wiendruwe fe Gewürztraminer wausse, enn uck Joascht fe Scotch enn Beea drasche. Enn dann natiedlijch uck Hopps, dem je de Breeda enn Abbotsford besondasch goot zijchte tjenne, enn doabie soo vetrafflijch leaje: ("ons Hopps ess bloos fe Broot, Bultje, enn Tweeback Häw" "soo habe ons de groote Tjeadels daut aul emma vesproake" "enn fe daut Jucks em Beea niemols nijch, daut weet" soo säd Henritjch Thiesse, mien Onkel enn Bee Bee Jaunz sien Schwieasähn ut Coaldale enn lohta Abbotsford "sogoa de leewa Gott.")
Woamett Onkel Hein je oba nijch jerätjend haud, ess daut de leewa Gott daut emm Himmel mienem Voda, aulso Onkel Hein sien Brooda, enn mienem liefelja Voda, vetalle wudd, woo daut rejchtijch stund, enn daut ahm Wien, Beea, Scotch enn aul daut flissje Frindschauft von aul disse Buddele kratjcht soo scheen schmatjcht auls de Jrienthola aul emma hinjrem Spitja.Ooda de Steinbacha unjre Datjch.
Na joh, oba nu woat daut Tiet, daut de leewa Gtt mol wada een bät mett siene Resserietarie aunfangt, enn een bätje äwadriewe mott, soo auls dit.
Enn kratjcht soo auls oppe Ead, ess uck hiea de Mensch nieschierijch, woo daut eajentlijch ess, omm mett Goethe too räde: "Was die Welt im Innersten zusammenhält" oba uck hiea, well de Mensch weete, waut de leewa Gott sijch doabie docht, auls Hee de Schepfung fuats jehearijch, enn fe aule Tiet derjchenaunda brocht, auls Hee dem Audam eene Rebb rutmurjeld, enn disse Rebb mett Dit enn Jand enn Daut beschmäad, enn ennreef, enn dann noch een bät von dee hinjaschte Buddel vonne hejchste Sproht hinjre Däah, ennriewe enn beschmäre deed, enn dann daut gaunze Packsel mett sien Odem enn Frodem besondasch em Moatjch bepuste deed, enn donn fein enn langsom goa backt, enn dann aum näjchsten Morje auls Hee de Owedäah opmuak, de Eewa foadijch, enn straum enn schmock, enn lieseltjess lejchelnd, enn aul mett lange Hoah enn huage Hacke aune Feetjess rutstolzeat kaum.
"Joh," säd de Oola, "daut haud mie eenjamohte jejletjcht, enn wann etj soo auls maunjche Mensche daut doohne, mol äwadriewe wudd, wudd etj saje, etj jleew disse straume Daum, woohne soo koasch enn "toom aunbiete schmock" ut'e Owedäah rutjewackelt kaum, räd sogoa een poah Wead Fraunzeesch, wiels see säd enn disse Sproak, wann uck mau seea nattjes: "Je suis Eve."
Na joh, dem Adam hinja mie wea je nu soo wild enn ierwrijch auls een Fahrjoasch Hinjst, haud etj boold jesajcht, enn hee trock enn kleiwd, enn pultjad enn oakad, enn ahm rannd de Tjwiel auls een Äwarannsborrem. Joh, dem Audam pausst tjeen Jebett meea, enn wea rietsch, enn wull sijch, sootoosaje, aun de fresche Pastje ver ahm vejriepe.
Oba daut bleef uck aul donn nijch biem Schmocksenne. Wäa weet, waut doa aules doamank kaum....jenuag: eenes Doages wea uck von de Noascha ähre Sort DNA doatweschen jejleppt, enn boold stund je dann uck aul daut groote "H" auls Aunfongsbuakstow von Hollywood äwre Menschheitsjeschijcht enn ähren Unjagang jeschräwe.
Wiels dee Jeschijcht doch woll mol wada een bät boajopp gohne sull, bruckt dee Oola enn sien tjlienet Publikum, aulso wie, Stoatjung, enn Hee leeht eenje Buddle Wien ut dee Jäjend tweschen Worms enn Speyer kohme, enn nohdem wie aulatoop een poah Buddle von dee Canaan Qualität jedrunke haude, haud wie jenuag Mumm enne Knoakes, wieda mett de Jeschijcht toop too piljre.
Eena mott sijch wundre, wiels etj haud niemols nijch jedocht, daut de leewa Gott uck Jeheemnisse enn sienem jewaultjen Brostkauste loagere deed, oba hee deit. Wiels, mett eenmol säd Hee: "Waut etj junt nu vetalle woat, daut bruck Jie nijch wieda vetalle, wiels daut ess soo jeheim, daut'et nijch mol enne Biebel steiht. Enn daut ess dit: Noah buhd dee Oatjch goanijch auleen doawäjen wiels etj ahm doatoo oppfordere deed, oba kratjcht soo seea doawäjen, wiels siene Fru, de Schratjschruw, Heiwtähn, Hoojohnsplum, Struckhatjs enn oole Schlorr ahm jieden Dach enn uck woll de Nacht soo vollkollbätjre, enn gromsauje, enn schindeare deed, daut Noah eenfach utwaundre wull, enn sijch too dem Zwatjch eene groote Lomme bue wull.
Daut wea kratjcht too dee Tiet auls uck aul noch ernoa väl Mensche sijch soo vehilde auls Bosche Jeat enn siene vebiestade Jemeend nohäa vehilde, enn mie nuscht nijch äwrijch bleef auls doatweschen too schlohne, bett de Speena fluage, enn de Schnodda Fiea foot. Enn donn läd etj eenfach Noah sien Plohn mett dem Mienjen toop, enn leeht daut enne Biebel stalle, wiels aul donn troff sijch Nieschiea, Theorie enn Praxis aules enn eenem Hock oppe Lomm toop, enn etj wisst je, daut mie nuscht nijch aundret äwrijch bleef. Aulso doloj!
Daut aundre woohnt mie donn aul dietlijch word, enn uck mett jiedem Dach dietelja word ess: Mett Eva haud mie daut Fruesmosta jejletjcht, oba daut wea nijch doabie jebläwe, enn manke Frulied wea de Heiwtänijchtjeit utjebroake.
Enn nu mott wie fuats noch eenmol too de Buddel jriepe, wiels nu ess daut tweede Jeheemnis reed to de Vetall: de Noahsche enn ähre Oat dreewe mie aul donn den Jedanke mie too befriee eent fe aulemol ut. Enn wann nijch fe aulemol, dann weens opp lenjre Tiet.
Enn eea jie Tjeadels mie nu woll uck fuats froage woare, waut fe eene Fru, wann äwahaupt, etj väaschlohne wudd, well wie noch mol een Glaussvoll vom Rhein hinjre Tjeewe veschwinje lohte, enn dann jäw etj Roht.
Wie drunke, enn donn läd de Oola mol wada mett de Vetall loos: "Joh, enn etj hab daut aulatoop noch gaunz goot em Dentjch, wiels eena lat je uck nijch jiedes Mol wann eena sijch äwa daut vebiestade Pack jeoajat haft, de measchte Mensche, auls daut Wetjeltjapp, Moloschna, Texauna, Breedajemeendla, ooda Templasch send, vesupe. Oba wann eena sijch aul verrem Freehstitjch joahrelang schweetijch oajre mott äwa de menschlijch Dommheit, enn ähre onveschämde Rachullijchtjeit, dann saul eena sijch ruhijch enne Grauje spiee, enn een bät em Grooten dentjche, woo eena sijch daut Onjezeffa enne Menschejestault vom Liew hoole kaun.
Enn daut deed etj, wann etj uck bie de Vetall fuats toostohne sull, daut Noah tjeen besondasch gooda Temmamaun wea. Nä, daut wea hee nijch. Hee schluag sijch de easchte Tiet biem Bu dree bett veea Mol de Stund mettem Hohma oppe Dumes, enn de Noascha sommd enn brommd mie de Uahre voll, waut äah Maun doch fe een onbeholpna Heltabless wea, soo's see säd, dee nijch mett Hohma enn Beitel ommtoogohne vestund."
Na joh, auls daut donn mett dem grooten Räjen loosjintjch, enn de Mensche vespruake, schmock too senne, docht etj mie aul, disse Vesprätjnisse send nijch von lange Dua, enn etj woa, wann wie nohm grooten Bejrafniss wada Tus sette, doch noch mol gaunz aundre Seide opplaje, enn opplaje lohte, enn dann woa etj uck Katholitje nijch bloos enn Rom satte lote, enn dee woare sijch je dann uck wada soo domm habe auls jane daut Verre-Lomm-Tiede deede, oba dann woa etj mol eene Jäjenreaktsjoon enn Menschejestault, auls Sonnebloome mett Been wausse lohte, enn dee woare Mennoniete heete. Enn mett de mennische Frulied woa etj mie soo aunstrenje auls mett Eva, aulso dee "Je suis Eve" Sort, enn dann ess Hohpninj.
Doamett well etj je nijch saje, daut mie daut emma soo goot flausche woat auls mett de Perischtjie Jiesbrajchtsche,, ooda mett de Lisbeth Peetasche, ooda de Appe Katerina, ooda mett Wilmer siene Strieptje, ooda mett Harry siene Trudie, ooda sogoa de Tjälasch Judy, oba proowe woa etj. Enn wann mie daut endlijch flausche sull, dann hea jie Jungess wada von mie.
"Hauns, enn nu well etj Die uck mol vetalle, waut mie vondoag oppfoll. Wiels de Oola bie de Vetall, doch een bät vekolleare deed, jleew etj, daut Gaunze kunn boold, sogoa omme näajchste Atj opp ons wachte, enn wann daut sowiet ess, dann woa etj Die enn Junt eenen biebelditjchen Breef schriewe."