Dr. Phil., Project Bottom Line - von Jack Thiessen

Latzt saut wie emm Tjoatjetjalla romm, enn dochte, wie sulle ons doch mol waut Nieet, waut Originalet utdentjche. "Joh!" säd een jiedra, enn dann jintjch daut loos: "Joh, oba waut?"

Wie send je een bät vewahnt, habe meist aules jeseehne, meist auls jedohne, enn meist aules jeheat. Waut jefft'et noch Nieet? Mett eenmol sajcht Rampels Hauns, wie sulle vleijcht veseatje Dr. Phil. entoolohde, daut ess een kohlkoppja Kluagschieta, enn wann hee uck mau von Texas ess, ess hee dem President Bush emmahan omm een poah Miel veropp, enn hee steiht enn Oprah ähre Deenste, enn dee krushoaje Lady haft meea Kepietjess em Biedel auls Mejchel, ons oola Boll (soo säd Blocke Peeta, nijch etj).

Wie worde ons eenijch, meist nijch too jleewe, oba wie worde ons eenijch, daut Dr. Phil. woomäjlijch kohme wudd, wann wie ahm de Mennoniete, de Huttera enn uck de Amishe aulatoop schmackhauftijch moake kunne. Enn een gooda Fundraiser fe goode Zwatjche kaun niemols nuscht schode, aulso sull daut Heritage Center enn Steinbach daut Ziel von ons goode tWoatj woare, mett Dr. Phil. auls Gaustredna biem Bankett.

Hoolt junt faut, oba diss Donna säd too! "Feftien Dusend Dohla" aun Boajeld, enn nu deed mie daut doch meist leet, daut etj dem wijchtjen Maun vom T V. eenen kohlkoppjen Kluakschieta jenannt haud.

Nu stund diss Texauna mett eenmol ver ons, enn wie wisste meist nijch, waut wie buta Rommwriddjle enn Wrunsche doohne sulle. Daut wie aulatoop aulnoch Väl Dit enn Jant äwa ahm hinjaridjsch jerät haude, wudd diss Tjeadel ons dochwoll aunseehne tjenne. Hee ess je een Psychologe, oba nijch gaunz domm, soo säd Brune Peeta emma. "Oba mett ernoare Dommheite mott wie rätjne" säd deeselwja Peeta, "wiels Amerikauna ess hee derjch enn derjch, enn dann uck noch ut Texas, woa aules lenja enn jrata ess," doabie jniesad Peeta een bät biem frindle, enn dann meend'a noch: "If you know what I mean?" Wie wisste. Wäa Elloaga tjant, ooda toom Frindschauft haft, ess opp de Texauna reed enn jefoht.

Wie brochte aulatoop den Dr. Phil noh sien Hotel, natierlijch daut Baste, enn daut dieaschte, enn während wie vesochte mett dem langbeenjen Oprah Bewundra woam too woare, tjitjcht Dr. Phil sijch soo een bät bieleifijch de Äteskoat toom Owenkost, enne Hotelstow utjelajcht aun. "Jie send je hiea moderna auls etj jedocht haud," meed'a, "Hiea stohne je sogoa Steaks oppem Menu."

Wie haude doa enne Stow jrods bie de tweede Reaj Cocktailjläsa de Näse een Zoll benne, auls Dr. Phil sijch den Hauls rauspeld soo's een Väasenja, eea hee meend: "Wann Jie nuscht nijch doajäjen habe, well etj bieaun manke Mennoniete, de Huttera enn uck de Amische een psychologischet Experiment hiea enn Kanada derjchfeahre. Enn wiels sijch daut aulatoop een bätje prost aunheat, wull etj daut eascht mett junt beräde."

Donn muak hee uck aul sien Attaché-Schemedauntje ohp, enn läd ons uck aul sien Väanehme ut enn väa. Doa stund jeschräwe: "Project: Bottom Line."

"Wiels eena niemols weet, wäa von ons de näjchsta Columbus ooda Copernicus ooda Thomas Addison senne woat opp dem Jebiet vonne Psychologie, sull wie vleijcht diskreet mett dit Experiment ommgohne, joh?" "Joh!"

"Eena weet je niemols nijch waut fe Walle soohn Experiment schlohne woat. Enn wäa doavon enne gaunze Welt nijch aula groote Jeneete tratjche woat."

"Amen!"

Oba auls Dr. Phil ons dann vetald, waut hee gaunz schlijcht enn eenfach väa haud, stelpt Jaunzess Jake meist vom Stoohl, enn Wiebe Bernie stritjcht sijch mett dem Dume diskreet äwre Luck, wann uck vestoake. Wiels etj vonne Psychologie kratjcht daut hool, waut dee judscha spetznäsja Biekrupa ut Wien, aulso Sigismund Freud, vedeent haft, foll etj nijch mol vom Maltjchbeinstje, measchtens wiels etj daut nijch mett haud. "Wäa sijch lenjre Tiet oppe Uni oppjehoole haft, mott opp Dommheite jefoht senne," säd een steinbachscha Prädja vonne oole Sort. Dee Maun haft Rajcht.

Oba tridje nohm Openboarungsjeist Dr. Phil enn siene Schemedauns-Weisheite enn sien grootet Experiment mett dem Froagetätjen "Wäaweet"?

Wie haude jejäte, enn nu kaum uck aul de Nohdesch, dee Läpelkost, vom grooten Meista selwst utjedeelt. "Aules waut etj weete well, ess: Etj woa aule dree Gruppe, aulso de Menniste, dann de Huttera enn dann de Amische froage: 'Mett woohne Haund wesch Jie Junt?' Enn wäa doatoo auls enn Ontario, enn dann, oba ohne Amische enn Manitoba, Saskatchewan enn Alberta de rejchtje Auntwuat jefft, tjrijcht fe daut gaunze wiedre Läwe de Sort Weschpapie, dee hee ooda uck see enne Setjreet aum leewsten bruckt: entweda Purex ooda Charmin, ooda Softly and Tenderly, joh?"

"Joh!"

Daut gaunze Experiement wudd vleijcht omme dreehundad Dusend Dohla koste, oba groote Entdatjunge weare noch niemols billijch, enn wäaweet waut fe eenen weltwieden Nutze vom rejchtjchen Wesche kohme kunn.

Wie sade em Senn von "Project Bottom Line" loos. Aule veea: Jaunzes Jake, dee aum basten den Unjascheet tweschen Väare enn Hinje wisst, Wiebe Bernie dee "do Bible" doohne sull, wann'et senne musst, enn etj auls Dolmetscha, enn Väabild, enn dann de Eppaschta, dee Starschie Dr. Phil McGraw, dee rajchte Haund sootoosaje von Oprah, dee koasche Daum mett dee utjefoodade Haundtausch.

Wie moake hiea eenen jewaultjen Sprung aun Tiet enn Entfarnung: Wie habe weens dartijch mennische Famieljess enn Siedontario besocht enn befroagt, ooldmoodsche Menniste, niemoodsche, enn uck eene Reaj doatweschen. Wann soohne Menniste stockte, dann gauf Dr. Phil, weens de moderne Menniste too vestohne, daut Gott oppe Sied von Texas, enn doamett fe Bush wea, enn doamett fe den Tjrijch, enn dann läde sijch de Sorj. Doatoo säde de Ooltkoloniea oba tjeen Wuat, nijchmol wann Dr. Phil ahn een ditjchen Steak enn Eadschocke mett Schal betohld.

Noh eene Wäatjch haud wie onse Breeda enn Ontario soo mea mett onse Froage beobeid, enn doabie jinje dem Dr. Phil jieden Dach de Uage dolla ohp, woo groot de Welt doch buta Texas wea, enn daut "onse" Mensche, toom jratsten Deel soo oopjewatjcht weare, enn woo weinijch Schwoatbroak een Psychologe-Missjoonoa bie ahn eajentlijch too beackre haud.

Wiels etj doaropp bestund, enn Jaunzes Jake uck een bät, säd Dr Phil dann doch endlijch too, daut wie uck enn Jrienthol, enn mien Heimatdarp de Bottom Line tjreise lohte sulle, enn Mensche em Red Wing Café froage kunne, mett woohne Haund see sijch weschte.

Wann Mensche saje: "Daut Ei vom Columbus" dann meene see enne gaunze Welt, daut Columbus jesajcht haud, see wudde mett dee Scheppsnäs daut Laund Amerikau aunsteete, wann een Heehnaei opp Enj stohne wudd. "Dann send wie doa," säd Christopher Columbus. Enn jieda Dach vesochte sass Wätjlang de measchte Matroose enn uck de Offiziere auls daut Ei aul stund.

Daut Ei stund oba emma noch nijch. Kullad sijch dieslijch, oba stund nijch.

Zeowentz verrem Dach Numma 43 unjawäjess tjitjcht de Kapitän Columbus mett sien Spektiev soo lang bett hee oppe Kommandobridj meist ennschleep; gaunz fientjess wann uck seea muzhrijch haud hee een tjlienet Lijcht em Waste jeseehne. Schwack oba emmahan.

Columbus leeht fuats een Ei koake, enn gauf dem Easchten Offiziea een Orda: "Morje tiedijch, Klock Sass selle aulemaun opp Deck Freestitjch äte kohme. Etj jleew, daut Ei woat stohne."

Fief ver Sass, tiedijch, saute see aulatoop, räde Sponsch, enn Italjenisch, enn uck een bät Portugiesisch biem Koffedrintjche, enn dann auls se aulatoop holluagijch enn schluddabuckijch aum Desch saute, nauhm de Kapitän daut Ei enn tuckst daut lieseltjess kopp veropp oppem Desch, enn daut stund. Tjeene fief Minute lohta bummst daut bute, enn Amerikau wea entdatjcht.

Enn daut Ei vom Columbus kaum dann eeajistre enn Jrienthol toom tweeden Mol toom stohne. Wiels Dr. Phil opp mie helt, wull hee enn Jrienthol eenen besondasch gooten Endruck moake. Hee fruag seea heeflijch, enn soo väanehm auls een Texauna daut aungohne kaun: "Enn mett woohne Haund, woat hia jewescht?"

Mensche, sogoa Jrienthola send je aul aulahaund jewannt, oba ditmol odemde see dann doch seea deep enn, eea de Auntwuat kaum enn daut Ei stund: "Wie Jrienthola send noch ooltmoodsch: Wie wesche ons nijch mett de Haund. Wie brucke Papiea!"


© 2008 Jack Thiessen