"Daut jeiht omme Worscht" saje de Dietsche, wann see daut earnst meene. See habe doamett rajcht. Wann nijch, haude Karl Josef, woohna Jie den heiljen Voda, aulso Pope John Paul II, nanne motte, enn etj ons nijch soo goot tjanne jeleaht.
Daut kaum soo: Aune 1960 wea etj en Rom, enn hee uck; daut wea too de Olympiade. Etj wea doa, wiels woa em Grooten jebuchelt, jerannt, jesprunge enn jeprietzt woat, etj aul emma medde mang wea. Enn Karl Josef Wojtela wea doa auls Veatijchjoascha, wiels ahm daut spezeare aul emma scheen jintjch, enn etj jleew uck toom Deel, wiels hee sijch siene tookinftje Heimat mol von dijchtabie beschneppre wull. Daut hee bieaun uck noch kathoolisch wea, schod je dann uck nuscht. Enn dem Stetjch wea hee mie een bätje veropp.
Enn eenem aundren Stetjch wea etj ahm veropp. Wiels daut too dee Tiet enne Welt noch spoasomma toojintjch, haud etj mie ut Dietschlaund sass Kullasch Kolbassa, ooda uck Kielbassa, ooda Schissnitjworscht mettjebrocht, enn jieden Dach bie de Olympiade läd etj mie een Kulla ommen Haus, enn knaubad soo han enn wada, wann mie hungad, een Schmatock auf.
Schissnitjworscht saul Bakterien, Viruse, enn uck Germs, wann dee aunjefloage kohme, von wieten soos vonne FLAK raufjeschohte, dootschlohne. Tjemmt soo, saj wie mol, een Baktieriea mett eene schwoare Jripp aun, enn befrodemd eena den mett een Haulsvoll Schissnitj von tien Schooh auf, dann bedieselt dee medde enne Loft enn tjeiwelt rauf. Eena klunjt den dann schwind doot, enn blifft jesund.
Oba eena helt sijch biem Schnissnitjworschtäte uck aul dee kusslostje Italienea enn daut sesstje Pack (joh, uck dee Frulied) measchten vom Lief, enn lat sijch soomett nijch aunstetje. Aulso haft dee Schissnitj sienen Roop auls Aulheelmeddel redlijch vedeent.
Oba wie send je enn Rom, aulsoo:
Aum tweeden Dach emm Olympia Stadium, auls de Italjena Levio Beruti emm Tweehundat Meeta Stuse auls easchta aum Ziel aunkaum, jintjch daut dolla enn willa too auls opp eenem MCC Utroop, wann'et Beea omsonst jefft.
Daut gauf väl Opprooah enn noch meea Wind, enn soo wea dee Duchie von mien haulwet Kulla Tschesnock dochwoll uck biem Karl Josef enne Näs aunjekohme. Enn soo langsom kaum hee vonne lintje Sied aunjeschlitjcht, wiels soohne billje Schissnitjworscht wea je fe ahm ut Polen noch emma een Luxusartitjel. Enn auls hee mie donn noch fein Polnisch aunred, enn nijch soo polluksch auls eena daut sesst vonne Weichselbreeda jewant ess, aunkaum, wisst etj je uck fuats woa hee hanwoll, enn etj reatjcht ahm von mienem aum Hauls bommelnde Worscht, uck aul fuats een goodet Stetjch Knüwel. Auls etj ahm dann noch dietlijch muak, daut etj uck noch doatoo een haulwa Pollack, aulso een Sewautztje wea, haud wie ons jefunge.
Wie schmenjde enne neajchste Doag miene Kullasch Worscht toop too Enj, enn auls hee donn nohäa, aulso näjentien Joah lohta Pope word, bleef aules biem Oolen. Oba doch nijch gaunz: Karl Josef haud dochwoll endlijch een bätje meea Fupptjejeld, enn hee schetjcht mie räajelmäßijch vom Vatican een poa Dutz Schelwatjess Prosciuto enn ajchte Salami, aulso mett Eselfleesch doabenne, enn etj schetjcht ahm hanennwada een Doostje Halvah mett eenem Breef
O joh, enn von dann aun nannd etj ahm staut Karl Josef eenfach Pappa. Daut mott soo, wann etj uck noch emma nijch gaunz kathoolisch sie. Oba wea weet? Daut hee nijch meea mennisch woare woat, fellt mie uck nijch leijcht, oba soo ess'ett.