Auna, lidj stell! - von Jack Thiessen

"Sat junt mol aula han,"säd de Jasch Kloße latzt. "Joh, enn du Pa, holst mol schwind noch Knacksoht, enn dann woa etj junt mol de Jeschijcht vom Oolen Peeta Hiebat, woohnen wie emma Betschla, ooda Pieptje Hiebat nande, vetalle."

"Hiebat wea noch enn Rußlaund jebuare, oba auls achtjoahscha Tjnirps kaum hee mett de gaunze Famielje noh Kanada. Enn fuats jintjch daut mett dissem goaschtajen Onnoosel loos, wiels? Joh, wiels auls see bie Moorhead oppem Schepp emm Red Riefa aune 1875 fuahre, feld hee mett eenmol enn aulemaun socht Hiebats Peetatje. Taunte Hiebatsche hield aul, Oole Hiebat speajch ut, tjwelstad em Riefa nenn enn säd: 'Sukensien!'

:Well, nu stund daut Schepp emm Red stell, dee Schabräda oakade langsom enn latjte enn stunde dann gaunz stell. Taunte Plume Sewautsche vetald aul, woo Happnasch Obraumtje uck mol emm Nippa vedrunke wea, enn säd, dem Peetatje haude se aul lang goot 'siene druggelje Bultjes' vollheiwe sullt. So säd de Sewautsche. Oba Peeta wea nijch too finje, enn nu jintjch Oohmtje Hieba selwst opp earnst seatje. Enn mett eenmol head daut gaunze Schepp dem Oolen Hiebat loosrescheare. 'Enn sure enuff.enn toom aulen Donna, enn toom Kuckuck manke Klucke, enn Schietreiasch emm Suaromp, doa ess Peetatje!' Em Red schwomp'a doa emm Wota romma. 'Toom aulen Donna!' schreajch Oole Hiebat, 'fuats tjemmst du rut, enn dissem schatajen Puddel lohnt sijch daut goanijch too bode. Enn butadem mott wie noh Kanada, foa fehle opplatzt aul een poah Indiauna auftooladre, enn du murchelst hiea em Blott romma, emm deist hiea de Beffeldrentjch ennschwiene. Enn tratj die uck fuats de Betjze aun, enn een bät jicha sonst woa etj die noch de Stars enn Srtipes emm Hinjarenj nenn stample! Enn du, Panna, goh saj dem Capten, hee saul aul Stiem jäwe, wie well fuats noh Kanada foahre!'

"Joh, joh dis Peetatje kaum noh Kanada, oba hiea leete siene Schoose nijch noh, hee wea een hasselja Bädel, enn 'goaschtaje auls Adam, dee sijch uck emma enne Aupelberstaund rommadree" säd Oole Hiebat. Peetatje säd bloß, hee deed mau prektesse Indiauna too späle, wiels dee sent willa auls de Wille Wiens ut Niegortitz, soo haude de Lied vetalt.

Well, Hiebats Peetaje, boold Hiebats Peeta, dann Peeta Hiebat enn schließlijch Oomtje Betschla Hiebat bleef een Spuchterieta. De Lied säde emma, hee wea goastrijch,oba dauts goanijch soo, hee wea maua utjelohte, enn hee säd 'Joh'too jiedrem Wintjel emm Läwe, "Na, etj weet uck nijch", säd Taunte Kloße wieda, "enn nu kohmt mol aula een bät noda, wiels waut etj nu vetale woa, vetalt nijch wieda, nä, daut vetal etj mau auleen wann'et needijch ess, vestohne? Joh? Na, dann mol wieda; weet jie äwahaupt woarom see Betschla Hiebat ute Jemeed rutschmeete? Nä? Na kohmt noch een bätje nohda, enn du Pannasche, vetal ditmol uck nijch wieda, enn du Krohnsche, vetal uck nijch, wiels diene Jeschijchte vom jnodenfeldschen Peeta Thiesses Haunsa send morschijch äwadräwe. Oba mei, mei, tridj nohm Onkel Hiebat. Oh yes, daut wea soo: Stald junt väa, de Betschla Hiebat wea je goanijch befriet, enn wie wißte uck goanijch, waut hee nohm Fieaowent deed. Oba waut jedohne woat hee woll habe, enn 'Det's fe schur' säd de Boatelsche. Well, eenes Doages saut hee aum Sinndach enne Tjoatj, enn boold schorrd hee een bätje toop, enn mett eenmol schnoatjcht hee uck aul. De Predja vetald nu noch luda, woo Kain dem Abel eent mettem Koohfoot äwrem Tjriez jeresst haud, enn dann noch eent, oba Onkel Hiebat saut tweschen Peeta Leewe enn Tobias Jaunz enn schnoatjt. Joh, schnoatjt soo's ne jestritje Bausfiddel ohne Seide, schmustad emm Schnurrboat neen'a, enn hohld noch eenmo derjche Näs enn opnet Mul Loft, enn schmustad, enn hohld wada ut opp siene Bausfiddel, enn frinteld enn pust 'PIRRRHHH!'. Enn donn bucheld Jaunz dem Hiebat doch eent mett'em Alboage enne Rebbe, enn waut säd Hiebat? Joh, waut säd'a donn bloß? Well, yes, Betschla Hiebat säd bloß: 'Auna lidj stell!'"


© 2007 Jack Thiessen