"They also serve, who only stand and wait," schreef John Milton; daut lat sich soo äwasatte:
Enn dee, dee stohnend wachte bloß,
See deehne uck.
Lisbeth Peetasch schrift enn eene von ähre vetraflijche Beatja, daut etj daut Prograum opp meahrere Schäp feahd. Etj jleew ahr daut. Een Prograum oppem Schepp ess needijch, wiels de measchte Mensche ohne Oppsejcht enn Unjahoolung nijch mett dem Läwe foadijch woare. Enn oppem Schepp send see ohne Oppsejcht. Etj späld aulso 42 Mol den Hoad von 1396 Passazheare oppem Nuadautlauntik, enn leahd too dee Tiet meist de Halft von aule Mensche oppe Ead tjanne.
Daut wea Friedach zeowents auls ver mien Büro mett eenmol eene ella-achtje schwoate Frü stund. See wacht, daut kunn etj seehne, see haud foaken jewacht. See wacht oppe Jerajchtijchtjeit, see wacht oppe Eewijchtjeit, enn vondoag wacht see opp mie. Ähre Uage vetalde mie daut, enn noch väl meea.
"Komm nenn!"
"Wann See aum Sinndach eenen Gottesdeenst organiseare welle, woa etj jearn een Leed ooda twee sinje." Daut wea aules. Etj säd: "Mol seehne. De Nohme, bitte?" "Jackson. De Kabiene-numma es säwen."
Daut wea soo: De Katholitje schetjte emma eenen Priesta oppe Foaht mett, enn dee hild dann Messen, enn leeht sijch daut noh de Oat von ähre Sort scheen gohne. Dann reisd hee drei Wäatj enn Amerikau romm, enn fuah wada bie onsem näjchsten Tridjkohme noh Europa mett. Entweschen reisd dee näjchsta reemische Ohmtje mett eenem stiewen witten Kroage, von Rom betohlt, mett.
Daut wea aules scheen enn goot bett wie eenen seea grooten Witjza mett een roodet Jesejcht von Gottes Jnod enn Irrlaund mettnauhme, dee jearn siene Messe büte oppem Achterdeck aufhild. Daut wea Sinnowent-zeowents biem Sonne-unjagang auls hee doa mett siene Schoah jäjen mienen Roht verrem Throon jintj. Hee stund soo bie twee Meeta vonne Räling auf, enn haud daut mett sien Aumt drock. Daut Schepp wea ditmol de Arosa Sun, een Schweizamodell, woohnt de Dietsche kopflastijch, aulso koppschwoa, nannde, wiels daut schwanda bowe auls enne Medd ooda unje wea.
Mott daut maunjchmol soo kohme? Daut deed. Eene sojenannde rogue Wall, aulso Schurkenwall, rolld ons lieseltjess äwa, daut Schepp hoof sijch Väre soo auls een bockschet Pead, donn sad sijch de Arosa Riese oppe Huck, enn tweschenenn pralld de meist säwenschoohja Priesta äwaroasch aune Räling naun, schoot Heistakopp, stankad mett de Been, oakad mett de Oarms, schreajch "Bozhe moi!" opp Enjlisch, enn Plumps, dann wea de Priesta nada. Etj mald daut dem Kapitän, nohdem etj dem Veeahundatpundjen eene Schwamwast hinjeraun jeschmäte haud. Dee nauhm hee mett. Donn dreid wie eene Stundlang den Nelsonkulla, funge nuscht, enn daumpte wieda. Dee Doot brinjt eenem de easchte twee bett dreemol daut Schweete bie.
Etj gauf fuats bekaunt, daut wie aum nächsten Dach, aum Sinndach aulso, eenen protestantischen Gottesdeenst aufhoole wudde. Enn wiels doa tjeen Prädja wea, enn wiels etj bie Prädja Enns enn Jrienthol, bie mienem breedajemeendschen Grootvoda enn Prädja Krüs, Leahre Schäfa, enn Eltesta Bitjat enn Gretna, enn Professasch Bultmann enn Heiler enn Marburg daut Wuat mettjetjräaje haud, läd etj mie enne Säle nenn, enn lauss dreemol Psalm 139 derjch, muak mie reed, säd Mis Jackson, daut daut morje Klock Tien soo wiet wea, stald daut enne Scheppszeitung nenn, enn Doloaj!
Doa stund etj nu, goot sass hundat Mensche tjitjchte mie aun, enn etj säd, "Friede sei mit Euch, der Friede, der da größer und mächtiger ist als alle menschliche Vernunft walte über uns!" Daut wadahold etj opp Enjlisch, enn wiels doa een poah Franzoose üt Rimouski weare, dee opp de DeGaulsche Sproak bestunde, wadahold etj daut Gaunze noch opp Plautdietsch.
Dann sung Ms. Jackson "I walk in the garden alone," enn auls see den dredden Farsch sommd, wea doa tjeen dreajet Uag verr mie. Bejleit word see aum Fliegel vetraflijch von eenem irischen Tjenstla enn Schauspäle, dee aulewäje Tüs wea, besondasch enne Nohbaschauft vonne Buddel. Uck ohne Wota wann'et senne musst. Enn daut musst bie ahm senne.
Donn sad etj loos, soo seea auls etj kunn, enn läd ahn den Psalm üt, enn dreef de gaunze Jemeend opp eene Stund jehearijch aule Dommheite ut. Wea den Psalm tjannt, weet, daut sijch David jearn too soohne Zwatje ennlohde lat.
Metteenst kaum de Klavieaspäla, Patrick O'Leary, äwadäl, enn säd, wie wudde noch eene Kollatjt fe aule Schiffsbrüchige enne Welt hoole während Ms. Jackson daut latzte Leed sung.
Etj leet mie nijch ütem Konzept brinje...loht ahm, docht etj bie mie. Etj tjand je siene Schiffsbrüchige, dee nijch em Wota vedrunke weare.
Donn sung Ms. Jackson "Just as I am" enn uck opp Dietsch "So wie ich bin" enn mie saul tjeena vetalle, daut de leewa Gott nijch sogoa oppem Schepp mettfoaht. Hee wea doa meddemang, enn auls Ms. Jackson twee Farzh von dem Leed mett tooje Uage sommd, sad Hee sich lieseltjess bie ahr enne Stemm nenn, enn jintj bie jiedem em Hoat spezeare. Bie mie uck.
Auls wie dree Wäatj lohta enn Montreal emm Howe aunläde, wea doa Post fe mie. Eene Schaulploht wea enn daut Pakeet. Etj muak daut op, enn doa stund jeschräwe: "Abide with me. Love until we meet again in the Garden, from Mahalia Jackson." Etj hab de Ploht noch.