Auls etj feftijch Joah tridj mol mett Kauspasch Hein enn Schallenboajs Johaun enn Bemidji wea, enn dee Jungess sijch aulnoch wundade, waut daut mett Bunjans Peiwel soo aules opp sijch haud, wundad etj mie uck, oba bloß äwa ahn.
Enn eea junt Delbert Plett vetalt, daut dee Peiwel ut Bemidji een Tjleenjemeenda ut Haulfstaudt enne Molotsch wea, ooda doa weens dijchtet Frindschauft haud, woa etj schwind daut Wuat erjriepe, enn de Sach rejchtijch stalle.
Oba tridj nohm wundre. Mien Onkel Haus Sewautstje, Mutta äah Brooda aulso, wea een derjchschnettelja Maun. Daut sull etj oba fuats tridjnehme, wiels? Joh, wiels Onkel Hauns een seea jescheida Mensch wea, enn jescheide Mensche kohme soo selden väa, daut see nijch derjchschnettlijch send.
"Na joh, oba waut haft aul daut mett Bunjan's Peiwel too doohne?" frajcht Al Reima doatweschen. Bitte langsom! Onkel Hauns enn Taunte Jreeta wohnde too eena Tiet enn Balmoral, hinja Stonewall, enn eenmol auls etj dree Joah oolt wea, fuah wie mett Eltesta Töws vonne Chortietsche Jemeend enn Jrienthol sien Model A Fuurd noh Wienepetj, steaje enn St. Vital opp eene Strietkoa omm, enn steaje noch eenmol dree Miel verre Wille Hundat omm, enn noh eene Stund wea wie enn Balmoral aunjekohme.
Enn doa linjsch oppem tjlienen Boajch wohnd ons Frindshauft. See haude dree Tjinja, twee Mädtjess, enn een Jung, aula een bät bleed, enn aula lang jewosse, enn seea ontlijch. Joh, dee Tjinja benaume sijch uck aum Woatjeldach soo auls wie ons bloß enne Sindachschool vehilde. Mie kaum daut aul donn vedajchtijch väa, daut Mensche, enn sogoa Frindschauft, soo schmock weare.
Etj haud mie noch nijch too Enj jewundat, auls bie mie daut Sijch Wundre noch gaunz aundre Seide oppläd. Wiels too Meddach aut de gaunze Sewautstjess Jemeend toop, enn uck Taunte Jreeta äahre Ellre.
Daut wea em huagen Somma, oba auls Taunte Jreeta äah Voda nennkaum, word daut stockdiesta emm Hus, wiels de Oohmtje Kloße - joh, soo heet dee Oohmtje - wea soo groot, daut de Husdäah ahm mau affens fohte kunn. Een vejneada Tjeadel wear'a enn utjelohte, enn hee freid sijch väare enn hinje. Auls hee mien Voda, dee aul donn noh de Nippa-Elloagsche-Thiesses-Oat tweehundat Pund wuag, toom easchten Mol seit Rußlaund sach, freid Oomtje Kloße sijch soo seea, daut hee ahm nijch bloß omfooht, enn dretjcht, sonda uck soo auls een Tjind opphoof enn enne Oarms schockeld. Etj docht, wann irjend eena soohnt äwahaupt kunn, ooda sijch sowaut woage wudd, dann wea daut hejchtens de leewa Gott. Oba nijch een Mennist ut Kanada, ooda sogoa enn Balmoral enn Manitoba, wiels daut lach vleijcht nijch mol en Kanada, wea weet? Sogoa miene Mutta, dee aul aulahaund Wunda utem Oolen Testament jewant wea, wundad sijch enn säd opp ludes: "Na oba, Mein Zeit!"
Daut jintjch biem spezeare aum Desch doll too. Wie haude Worscht enn Schintjefleesch mettjebrocht, Sewautstjess haude Wrenitje mett Schmaundfatt, enn Plumemoos jemoakt enn jekoakt, enn Oohmtje Kloße haud noch em lohten Farjoah nuade von Balmoral, doa dijcht bei de Eskimos, soo säd'a, eenen Hersch jeschohte, enn dem em Iestjala jelajcht. Aulso gauf daut uck noch eenen Bosch-Brode, soo auls hee säd.
Nohm Äte word von Rußlaund vetalt. Na, eajentlijch biem Äte uck aul, oba nu nauhm de Vetall eene aundre Rejchtung.
"Meen Jie?" soo fong Oohmtje Kloße aun, "daut woat sijch loohne, daut etj mie hiea noch een poah Schooh aunschauf? Wiels bie miene Size Achttien ess daut nijch soo leijcht jedohne. Enn wann etj uck hoatlijch sie, soo freare mie doch biem jäjre em Winta hanenwada biem Boaftgohne de Feet. Etj hab mie von oole Koahrereife aul twee Sautz Schooh jemoakt, oba toom enne Tjoatj gohne, mucht etj mie weens een bät strauma de Feet betjleede.
"Aulso, waut meenst Du, Thiesse, sull etj mie von eenem Schusta enne Staudt een poah Schooh reemre lohte, wann etj daut needje Jeld doafäa oppdriewe kaun, ooda send wie bett dann wada tridj enne Ooltkolnie enn Rußlaund, woa wie hanjeheare?"
"Wann Hitla enn Dietschlaund aune Macht tjemmt, send wie boold wada tridj aum Nippa," prophezeid Voda seea stolt, enn aundajchtijch. Hee wea daut nijch jewant, daut Mensche ahm noh siene Meenung fruage.
Eea wie oppe Koah mett Eltesta Töws opp jant Enj Wienepetj wada noh Hus fuahre, kaum Oohmtje Kloße mett oppe Strietkoa, wiels daut gauf noch soo väl von Rußlaund too vetalle. Jeweehnlijch wann wie manke huage Jesallschauft weare, fuscheld wie hejchstens opp Plautdietsch, enn hilde ons tridj, enn weare väasejchtijch. Oba nijch Oohmtje Kloße. Hee schmeatjcht Piep, enn wann'a nijch daumpt, dann vetald hee, enn maunjchmol deed hee beides toojlitjch: vetald enn reatjad. Enn bloß opp Plautdietsch. Stund enne Strietkoah - dee Fenstre weare je aula ohp, daut wea Juli - enn vetald enn fuchteld. Mensche von beide Bohnsiede, leete aules stohne enn lidje, enn tjitjchte, woo diss Oohmtje - säwen Schooh enn veea Zoll groot, enn dreehundat enn feftijch Pund schwoa - Kloße vetald. Hinja ons fonge de Mensche dann wada langsom oba mett opnem Mul aun too oabeide, oba doa weare je emma fresche, dee aun beide Siede vonne Bohn wohnde auls wie soo omme twintijch Miel de Stund delenjd noh Wienepetj enn dann derjch Wienepetj fuahre (vleijcht dree Miel de Stund langsoma auls jeweehnlijch wiels Oohmte Kloße soo schwoa wea), dee sijch de Metze aufnauhme enn den Kopp schobbde enn kreiwelde, auls see Ohmtje Kloße heade, donn sage. (Miene Sesta Neeta vetald mie latzt, daut see jeforscht, enn utjefunge haud, daut dee Mensche, woohne aun disse jenande Strietkoajleis wohnde, enn aul dee Joahre auls Ohmtje Kloße doa hanenwada mettfooah, väl foakna noh Tjoatj jinje, auls äahre Nobasch wieda vonne Bohn auf; etj jleew ahr daut).
Na joh, oba wie weare aul väl too schwind bie onse Koah aunjekohme, enn musste wada tridj noh Jnodefeld, bie Jrienthol, eea wie tridj nohm Nippa, aulso noh Hus utwaundre kunne. Eea wie ensteaje, treajch Oohmtje Kloße den Model A aum Bompa too hoole, enn hoof de Koah eascht väare dree Schooh enne Loft, enn dann hinje uck. Mensche kaume fuats toop enn säde opp enjelsch, wann hee daut noch eenmol doohne wudd, treajch hee fief Zent, ooda uck tien. Enn eea wie auffuahre, haud Oohmtje Kloße sijch äwa een Dola vedeent. Enn daut wea meea Jeld auls de measchte Mensche too dee Tiet aun eenem Dach opp eenmol talle kunne.
Too Wiehnachte daut Joah schetjchte ons Onkel Hauns enn Taunte Jreeta soo auls jiedet Joah een Wiehnachtspaket. Enn wie, soo auls jiedet Joah, ahn uck. Oba enn ährem Paket wea uck noch een Breef von dem Oohmtje Kloße vonn'e Kaump. Enn doa stund jeschräwe, daut hee twee groote Bolles enn een Kunta latzt nohm Fieaowend biem Nohba jeschlacht haud, enn doafäa haud hee dree Sautz Lada jetjräaje, enn hee wea aul biem Schusta jewast, enn haud sijch doafäa twee Poah Schooh toom noh Tjoatj gohne bestalt.