MAX ENN MORITZ

Eene Jungesjeschijcht enn sewen Schowanacke.

Eene Äwasatung emm mennischen Plautdietsch von Thiessens Johaun

VEAWUAT

O, waut heat maun schlajchte Dinja

Von dee niedatrajchtje Tjinja!

Auls toom Biespell, sell jie weete

Max enn Moritz doohne heete!

Dee aunstaut derjch kluake Leahre

Sijch toom Gooden too betjeare,

Foaken noch doaräwe lachte

Enn noh Dommheit deede trachte.-

Joh, toom goastrijch senne emma

Reed, daut woat nu schlemm enn schlemma.

Mensche tjräajle, Tiere tjwäle,

Appel, Bäare, Tjräatjle stähle,

Daut jeiht scheen, lang nijch soo schwoa

Auls weet de Kuckuck, Joah fe Joah

Enne Tjoatjch enn enne School

Schmock too sette oppem Stoohl.

Oba weh, o weh, o weh,

Wiels etj aul daut Enj nu seeh!-

O, daut gauf väl schlajchte Dinja

Mett de Max enn Moritz Tjinja.

Dromm ess hiea, waut see jedräwe,

Aufjemolt enn oppjeschräwe.

EASCHTA SCHOWANACK

Meaj moakt sijch soo maunjchmol eena

Mett dem Hohn enn mett dee Heehna;

Aula tjanne dissen Grund

Wiels Eia äte ess jesund;

Tweedens kaun uck niemols schode

Eenen gooden Heehnabrode;

Dreddens verr'e Kold too rade

Jefft'et Dune enne Bade.

Joh, 'ne goode Fadadatjch

Halpt bie Kold enn Onjematjch.

Hiea's dee Boltsche ohne Maun

Dee uck Heehna zichte kaun.

Heehna haud see weensens dree

Enn uck een Hohn, een Stauntepee!

Max enn Moritz hinjre Schiewe

Welle wada Dommheit driewe.-

Enn gaunz jenietsch, fuats eent, twee, dree,

Schneede see een Broot entwei;

Veea Stetjcha, kauntje Dinja,

Jiedet Biet soo ditjch auls Finja.

Bunge dee aun eenem Baund

Äwa Tjriez doa oppem Saund,

Lage dee enn eenem nu

Oppem Hoff dee goode Fru.-

Stauntepee, dee deed sijch freie,

Fong uck fuats gaunz lud too tjreie:

"Kikiriki! Kikikerikih!!-

Tiep, tiep, tiep, kohmt schwind noh mie!"

Hohn enn Heehna Broot nu schlucke

Ohne tjitje, väl too flucke;

Enn auls see sijch dann eascht besenne

Goanijch wajch see ranne tjanne,

Äwa Tjriez enn äwa Tjwäa

Tratje see daut han enn häa.

Fluage opp enn enne hejcht,

Moake Loarm enn väl Jeschrejch.

Bleewe aun een Aust boold henje,

Kunne uck nijch omm'a wenje.-

Enn äah Hauls word emma lenja,

Ut nu ess'et mett dee Senja;

Dann foll uck een Ei noch rut

Enn dann wear'et aules ut!-

Oole Boltsche, nu verrejcht,

Heat emm Bad Jebloa, Jeschrejch;

Ahr ohnt aul waut, jeit derjch'e Däah,

Enn waut see sach, nijch onjefäah,

Trohne ranne ut'e Uage:

"Miene Hopning ess veschloage,

Wiels nu henjt mien scheensta Droom

Aun dissem Aust aum Aupelboom."

Voll von Trua, mett'em Tjnief

Schnitt den Baund ahn von'em Lief.

Nemmt dee Heehna schwind vom Baund,

Lajcht dee opp'et sejchre Laund.

Ohne Räd enn ohne Roht

Nenn jeiht see enn äahre Koht.

Dit wea de easchta Schowanack,

De tweeda tjemmt fuats ut'em Sack!

TWEEDA SCHOWANACK

Auls dee Boltsche noh dem Hiele,

Fong vom Schalduak väatooziele,

Docht see nu, soo han enn häa,

Waut nu woll daut baste wea.

Woo kunn eene noh dem Jräme

Enn Eahre von ahn Aufscheed nähme?

Vleijcht emm Stellen, goot jerohde,

Fein too tofle: eascht dee brode.

Joh, dee Trua wea doch groot,

Enn plock dee Heehna oppe Schoot.

Noch emma wea daut väl too groff,

Heehna, dee opp ähren Hoff

Koakeld, spälde, soo scheen ranne

Enn von dee mott see sijch tranne!

O, dee Boltsche hield vom freschen

Doch kaum boold äah Hund doa tweschen.

Max enn Moritz ritjte Brode

Schwind nu oppet Dack jeschote.

Derjch den Schornsteen mett Vejneaje,

Tjitjte woa dee Heehna leaje

Ohne Gorjel, ohne Kopp

Brode, schmoade ennem Topp.-

Dee Boltsche jintj nu schwind emm Tjalla

Mett dem Schleef enn mett'em Talla,

Surenkomst toop Heehnabrode

Ess ahr emma goot jerode.

Woavon see besondasch schwoarmt

Wann dee scheen ess oppjewoamt.

Doch entweschen oppem Dach

Send dee Jungess bie de Sach,

Max, dee wea soo väabedocht,

Haud 'ne Angel mettjebrocht.-

Harre Gomms, doa woat noh bowe

Aul 'ne Hahn hinoppjehowe.

Oba jicha, Numma Twee;

Wada jicha, Numma Dree;

Fuats tjemmt uck aul Numma Veea,

Halle Moss, doa sennt nijch meea.

Doch dee Spitz, dee tjitjt jeneiw,

Balld sijch jreen enn schwoat enn bleiw!

Boold aul send see unje wada

Wajch enn rauf von ähre Lada.-

Fuats daut noh Spektoakel tjribbelt,

Tjemmt de Boltsche aunjeschibbelt;

Aunjewartelt bleew see stohne

Auls see noh de Paun wull gohne.

Aule Heehna weare fuat!

"Spitz!!" - daut wea äah easchtet Wuat.

"O, du Spitz!" - fangt see too loame,

"Etj woa die daut Fall oppwoame!"

Mett dem Schleef, soo groot enn doll

Heiwt see ahm daut Lada voll;

Heiwd opp ahm soo onjeduldijch,

Spitz piepad oajch - feelt sijch nijch schuldijch.

Max enn Moritz sijch vestoake

Utem Hauls statjcht ahn een Knoake.-

Ennjeschlope unjre Datjch.

Lidje see doa verr'e Hatj!

Dit wea de tweeda Schowanack,

Dee dredda tjemmt fuats ut'em Sack!

DREDDA SCHOWANACK

Jieda enn dem Darp ahm tjannd

Eenen Maun, dee Batj sijch nannd.-

Auldachsratj enn Sinndachsweestje,

Lange Betjse, straume Scheestje,

Uck Polltoos, enn uck Gemausche,

Waste mett de feinste Tausche.

Aule disse Tjleedarie

Neihd dee Batj soo schmock auls nie.

Ooda gauf daut waut too fletje,

Auftooschniede, auntoostetje,

Ooda wann dee Tjneep loos weare,

Hinje, unje oode veare,

Wea dem Schnieda Batj eendoont

Hee sad aules schwind emm staund.-

Aules kunn dee Meista Batj

Dee Schniedarie, sien Läwenszwatj.

Dromm soo haud uck Maun, enn Tjind,

Schnieda Batj toom gooden Frind.-

Oba Max enn Moritz dochte

Woo see ahm vom Jletj aufbrochte.-

Verrem Hus bie dissem Oohm

Rannd een rietend, breeda Stroom.

West du äwa, han en tridj,

Motst du doa woll äwre Bridj.

Max enn Moritz, ohne Ploag,

Nehme sijch nu eene Soag.

Habe daut uck fuats aul spetz -

Enne Bridj ess boold 'ne Retz!

Haude affens daut verejcht,

Dann moake see uck aul Jeschrejch:

Komm mol rut, du Kosebatj!

Schnieda, Schnieda, metj, metj, metj!!"

Batj, dee kunn aul väl vedroage,

Nuscht nijch jintj ahm unjren Kroage.

Oba nu bie disse Posse

Musst hee sijch doch seea bosse.-

Mett dem Stock fuats enne Haund

Sprinjt hee opp von hinjre Waund,

Enn hee tjrijcht noch mol een Schock

Auls hee head: "Hä, Kosebock!"

Enn hee fuats flucks enn oppe Bohle.

Dee bräatje twei ahm unjre Sohle;

"Kosebock!" see roopte wada,

Plumps, nu ess dee Schnieda nada!

Jrods, auls dit wea nu pesseat

Enn de Batj sijch soo vefead,

Schwomme Jantjess opp daut Wota,

Aune Feet hee schwind ahn foht'a.

Tjrijcht dee Batj dee enne Haund

Enn flucks ess hee opp sejchren Laund!

Batj, daut tjenn jie junt voll dentjche,

Siene Schräd noh Hus deed lentjche;

Enn aum Enj von dee Jeschijcht

Hee doatoo noch Buckweeh tjrijcht!

Doch dee Batjsche ess ahm goot -

Enn rad ahm ver dem sejchrem Doot,

Prasse deed se ahm de Tjnäp

Mett dee Haund aum Iesajräp.-

Boold em Darp heat eena Wunda:

Schnieda Batj ess koasch enn munta!

Ditt wea de dredda Schowanack.

Den veaden hohl wie ut dem Sack.

VEADA SCHOWANACK

Aule Mensche selle heare

Daut se uck waut motte leahre.-

Nijch auleen dee Alphabeete

See utwandijch motte weete.

Nijch auleen em Schriewe, Lese

Eewt sijch een veninftjet Wese;

Nä, uck räatjne mott hee tjenne

Wann hee well de Welt jewenne.

Uck waut ons de Weise leahre

Saul dee Mensch sijch jearn aunheare.

Daut dit mett Vestaund pessead

Jintjch derjch Leahra Laumpels Read,-

Max enn Moritz eewde Fluse

Kunne Leahrasch nijch veknuse;

Schowanack enn ährem Kopp

Enn pauste nijch bie Laumpel opp.-

Laumpel goot, schwind vom Bejriep

Schmeatjcht uck jearen eene Piep.

Soo's uck eena ohne Froag

Noh aule Meaj enn aul dee Ploag

Eenem gooden, oolen Maun

Gaunz von Hoaten jenne kaun.

Max enn Moritz, nijch too jleewe,

Wulle wada Dommheit eewe,-

Proowde flucks derjch siene Piepe,

Leahra Laumpel auntoojriepe.

Boold doaropp aum Sinndach tiedijch

Saut de Laumpel schmock enn schmiedijch

Enne Tjoatj mett väl Jefeel

Word dee Orjel ahm toom deel.

O, soohnt kaun tjeen Mensch nijch lowe,

Dee Jungess sent enn siene Stowe,

Woa Laumpels Piep lijcht opp'e Kaunt,

Max aul haft se enne Haund;

Moritz ohne väl Jemulwa

Schett doa nenn vom Flintenpulwa.

Dann den Tobak doa enopp,

Enn den Meerschaum-Piepekopp,-

Enn donn seea schwind bloos rut

Dee Klock ess twalw, dee Tjoatj aul ut.

Laumpel ess soo fein toofräd

Noh Musitj enn nohm Jebäd,

Enn mett Buak enn Nootehaft

Haft verejcht sien Aumtsjeschaft.

Enn soo schaftijch, Gott zum Gruss,

Laumpel aumpelt aul noh Hus.

Enn voll Dankboatjeit, dee Maun

Stetjcht sijch siene Piep aul aun.

"O!" - säd hee - "dee jratzte Freid

Blifft doch dee Toofrädenheit!"

Rums!! - nu flijcht daut Fiea enn Gloot

Dee Donna wea soo schratjlijch groot,

Koffetjätel, Wotaglaus,

Tobaksdoos enn Tintefaus,

Schlopbeintj, Desch enn Oweschitz,

Aules flijcht emm Pulwablitz.-

Nu vetratjt dee Daump, Jestank,

Doa lijcht Laumpel, Gott sei Dank,

Läwd noch, o daut ess een Säajen,

Doch haft hee waut aufjeträajen,

Näs enn Haund, Jesejcht enn Ohre

Sent soo schwoat auls bie de Moohre.

Enn de Hoah bett opp'e Ohre

Sent vebrennt enn schwoat jeschoare.-

Wäa saul aul dee Tjinja leahre

Enn de Weetenschauft vemeahre?

Enn fe Laumpel woat nu leide

Aul de väle Drockijchtjeite?

Leahra Laumpel - oama Maun,

Wiels hee nijch meea schmeatjche kaun.

Mett de Tiet jeit daut vebie,

Doch dee Piep, dee woat nijch nie.

Dit wea dee veada Schowanack,

Den feften hohl wie ut'em Sack.

FEFTA SCHOWANACK

Wem oppem Darp, vleijcht oppem Laund

Eenem Onkel ess bekaunt,

Dee sie schmock enn uck beschiede

Wiels soohnt kaun een Onkel liede.-

Tiedijch sajcht maun: "Gooden Morje!

Kaun etj waut fe junt besorje?"

Brinjt ahm dann uck seea jearen

Zeitung, Piep, een Spooltje Twearem.

Ooda deit hee sijch biem betje

Foaken sijch een bät vewretje,

Fuats dann ess hee oppe Städ,

Reed too halpe ohne Red.

Biem Schnuftje-Ritje mott hee schnucke,

Roop "Jesundheit!" dann mau flucke.

Ooda tjemmt hee lot noh Hus

Roop mau scheen dien basten Gruss.

Satt den Onkel maklijch trajcht,

Hol ahm schwind den Steeweltjnajcht,

Dann dee Metz enn Rock enn Schlorre

Enn lot die uck nijch eegol porre,-

Joh, du motst uck stohts bedentje

Waut dem Onkel Freid wudd schentjche.

Max enn Moritz niemols dochte

Aun soohne Dinj, dee Freid ahm brochte.

Dentjcht junt bloß, woohn schlajchten Witz

See eewde aun dem Onkel Fritz!-

Jieda weet em tiedjen Mei

Väajel fleaje, enn emm Hei

Tjniepasch fange sijch too räaje

Oppe Beem enn aulewäaje,

Max enn Moritz seea fliete

Dee vom Boom nu raufa schmiete.

Enn dee Tute mett Jepiepa

Voll aul send mett aul dee Tjniepa.

Fuat doamett, enn eene Atj

Unja Onkel siene Datj!

Onkel Fritz, dee ess aul meed

Enn fe sienet Bad aul reed.

Siene Uage volla Saund,

Maklijch dreemt emm Pooselaund.

Oba boold de Tjniepasch krautze

Kohme rut ut dee Medrautze.

En dee easchta nu veraun

Foot dee Näs vom Onkel aun.

"Donna!" - schrijcht hee - "Wauts dit hiea?"

Enn graupscht schwind noh daut Onjetiea!

Enn soo groot daut Onjematj

Daut Onkel Fritz huppst ut'e Datj.

"Autsch!" - nu haft hee veea Stetj

Aune Been, enn aum Jenetj.

Han enn häa enn rund heromm

Kreiwelt, flijcht daut mett Jebromm.

Onkel Fritz, enn disse Noot

Heiwt enn traumpelt aules doot.

Nu seet mol aun, daut ess vebie

Mett dee Tjniepa-Kaublerie.

Onkel Fritz nu han sich läd -

Endlijch haud hee wada Fräd.

Ditt wea de fefta Schowanack,

Den sasten hol wie utem Sack.

SASTA SCHOWANACK

Enn dee scheene Oostatied

Wann de fromme Batjalied

Välet Seetjebackniss moake

Zockasaund enn Honijchkuake,

Max enn Moritz gaunz vesäte

Seetijchtjeite jearen äte.

Boold dee Batja jeiht noh bute

Vegaut nijch aules tootooschlute.

Wann hiea eena vleijcht well stähle

Mott sijch derjch den Schornsteen tjwäle.

Doa sitt eena disse Pracht

Ditj voll Room, schwoat auls de Nacht.

Puff! Doa sent noh disse Schoos

Beide Jungess enne Doos.

Doa, nu sent see äwadäl,

Vom Kopp bett Tee-es witt von Mehl.

Enn uck fuats mett väl Vejneaje

Sage see woa Pretzel läaje.

Knacks! wea haud woll daut jedocht?

Nu lidje see emm Deajch emm Troch.

Enn see habe utjefiestat

Vom Kopp bett Tee voll Deajch jetjliestat.

Enn nu tjemmt dee Meista Batja

Enn bemoatjcht dee Zockaletja.

Eent, twee, dree, hee rollt ahn goot

Enn moakt ut ahn twee Klompes Broot.

Enn dem Owe jleajcht daut noch

Ruff! Doamett emm Oweloch!

Ruff! - hee tratjcht ahn ut dem Gloot

Wiels see sent aul brun enn goot.-

Jieda jleewt, daut ess jescheit,

Dee Tjlienasch enne Ewijchtjeit.

Oba doch, de Jungess biete

Derjch dee Tjarscht, enn seatj'et Wiete;

Enn dee Batje, fuats bloat hee:

"O, Harre Gomms! Doa ranne see!"

Dit wea dee saste Schowanack,

Den latzten hol wie utem Sack.

LATZTA SCHOWANACK

Max enn Moritz nu's vebie

Mett jun Domms, daut weete wie!

Motte see aun aule Siede

Lajcha enn dee Satj uck schniede?-

Tjitjt, doa drajcht dee Bua Matj

Eent von siene groote Satj.

Haft den Sack opp Ridjes-Medde

Fangt dee Joascht aun uttooschedde.

Hee woat fuats doll, "Wauts dit aulwada?

Dissa Sack woat emma ladja!"

Ha, doa sitt hee volla Freid

Max enn Moritz emm Jeträajd.

Rabs! - enn sienem grooten Sack

Scheffelt hee daut Lumpepack.

Max enn Moritz jintj'et schwäl

Wiels nu jeiht'et enne Mäl.-

"Meista Mala, doaf etj bedde,

Schwind ditt enne Mäl too schedde?"

"Häa doamett!" - enn ennem Trejchta

Nu veropp mett dee Jesejchta.

Enn dee Mäl mohlt tjlien enn fein

Maxtje enn daut Moritzlein.

Toom latzten Mol noch äwadäl -

Doch feinjeschroot, fresch ut'e Mäl.

Enn dee Ente fräte opp

Du Jungess rauf enn äahre Kropp.

SCHLUSS

Auls emm Darp dee Lied daut heade,

Von groote Trua, tjeena Weada.

Dee Boltsche säd, "Na heat etj saj,

Joh, soo jeiht'et soohne Balj!"

"Joh, joh, joh!" säd Meista Batj,

Dommheit ess tjeen Läwenszwatj!"

Dann säd uck dee Leahra Laumpel:

"Seet, daut ess uck een Exaumpel!"

"Woaromm uck!"- säd Onkel Batja,

"Ess dee Mensch soohn Zockaletja?"

Säd dee gooda Onkel Fritze,

"Dauts daut Enj von domme Witze!"

Doch dee staumja Buaschmaun

Docht: "Waut jeiht soohn Domms mie aun?"

Kort, emm gaunzen Darp jeiht omm

Een vedeelet Dankjebromm;

"Gott sei Dank! Wajch ess daut Pack

Enn vebie dee Schowanack!"


© 2003 Jack Thiessen;  ne Äwasatung von Max und Moritz von Wilhelm Busch 1865.