De Hiebatsche - von Jack Thiessen

"Nu ess'et Tiet," säd de Hiebatsche aum Sinndach, fong aun em earnsten too doktere, läd sijch han, enn wea dree Doag lohta doot.

De Hiebatsche word näjentijch Joah oolt, oba ahr sach'et aul feftien Joah soo auls Nooah sien ella-achtje Fru. De latzte veatijch Joah wea see eene Wätfru enn head opp too ellre. Âah Maun wea deelwies een Grunzkujel, Suatopp enn een sturra Priejel. Auls hee noch läwd, haude de Hiebats eene Lauftje, woohnt see oba strenj Stua nannde.

Etj wea mau eenmol, aul lang, lang tridj enn dem Stua, enn daut eenmol reatjcht mie dann uck bett nu too. Etj wull Âditj toom Suregurtje ennlaje tjeepe, oba de oola Hiebat säd, dee wea sua jeworde, enn "de russlendsche Manneare wull uck tjeena tjeepe, enn dee hab etj rutjeschmäte, enn de Darpshunj fraute dee opp, enn tjreaje Liefschniedinj doavon." Dann wisst etj, woo enn woa de Fortj em Stähl stuak, enn etj muak omm den oolen Hiebat eenen grooten Boage.

De Hiebatsche wea vonne Chortietza vom oolen Stil, aulso wea bie ahr, soo auls Peeta Tjäla mie latzt vetald, tjeen Unjascheet tweschen "Läwensgang enn Gloowe, aulso Wuat enn Waundel, enn ons Tjristentum ess nijch bloos aum Sinndach wirtjsom" meend hee, enn wiels hee mett Swaut Al Reima Frindschauft ess, nauhm etj ahm daut auf.

Butadem schreef de oole Hiebatsche aul feftijch Joah fe de Steinbach Post, enn soohnt, soo musst etj jistre erfoahre, jefellt dem leewen Gott.

Soo auls daut noh de niee Mood Mood jeworde ess, jintjch etj uck nohm "Viewing" aulso noh de Leichenschau em Birchwood en Steinbach.

Wann eena maunjche Mensche, besondasch de rietsche, eentungje Menniste em Soatjch betjitjcht, dann sitte'et de uck noch emm Doot noh "unfinished Bizniss" oba nijch bie de konservatiewe Menniste. Wann see doot send, ess doa em Soatjch tjeena Tus, see send Bowe, gaunz enn goa. Soo uck de Hiebatsche; see wea, soo auls jesajcht, eene chortietsche Fru vom oolen Stil, vom oolen Kalenda.

Etj bleef weens dree Minute, soo lang auls daut dieat bett aul de hiesje Kroohnsthola eenem jeseehne habe, enn dann jintjch etj mett Bletjch haulf noh Unje jedretjcht aune rajchte Kaunt rut.

Auls etj aum Stäftje vebiejintjch wea de Däah eene tjliene Retz op enn etj, noch emma een Tucks nieschierijch, glupt doa eene haulwe Sekund nenn. Daut sull sijch dann uck meist loohne, wiels doa brennd een tjlienet Tauljlijcht, enn hinjrem Desch en Lehnstoohl saut tjeen aundra auls de leewa Gott.

Mie veschluag mol wada toom tweeden Mol enn mienem Läwe de Sproak, seea soo auls etj Leahra Schäfa toom easchten Mol too seehne tjreajch. Oba dee Oola kaum mie fuats too Help, auls etj ahm dann doch schliesslijch fruag: "Na, Voda, best Du vebiestat?"

Hee sajcht: "Wann soohne mennische Mummtjess, dee noch niemols Betjze ooda Jeans jedroagt habe, wiels see sijch mett ähre aufjeoabeide Been nijch schäme, enn dann uck noch meea auls een haulwet Läwe fe de Steinbach Post Goods jeschräwe habe, enn uck sesst eene goode Mutta enn Grootmutta enn uck Nohbasche jewast send, dann kohm etj perseenlijch dee nohm Himmel mett too nehme."

Etj nauhm mie uck fuats väa fe aule mennische Zeitunge too schriewe, waut etj kaun, bloos nijch fe den Booten wiels dissa ess vom rajchtjen Wajch aufjekohme, enn mie nijch well.

Etj saj: "Voda, waut kaun etj fe Die doohne?"

"Du kaunst mie toom Owendkost ennlohde, etj reisd een bät haustijch von Tus auf," sajcht'a, "enn hab vejäte, mie de needje Dohlasch enntoofuppre, enn hiea enn Steinbach omsonst too äte, wudd mie woll nijch jletjche, meenst nijch uck?" "Daut kaun goot senne," saj etj, "komm, well'we foahre."

Auls wie toop utem Birchwood enn uck äwrem Hoff doa jinje, tjitjchte de Tjinja mett groote Uage noh mienem Gaust, oba de ellre Mensche worde ahm nijch enn, oba doch: een Prädja mett stiewen Jenetjch, een Tjliewa, vonne Fully Independent Gospellers, meend soo biem Vebiegohne: "Dem Tjeadel sitte't judsch, waut haft dee hiea too seatje?"

Etj haud enn mienem Van soo auls jeweehnlijch onse twee dietsche Schäfahunj mett, enn disse pausse opp mie seea opp, enn brelle jiedem Framden dee Uahre voll, oba jistre zeowentz, auls dee himmlischa Oola ennsteajch, saute see soo aundajchtijch, meist soo auls wann see den leewen Gott toom easchten mol jeseehne haude.

Wie hilde noch schwind enn Bloomenoat aun, wiels de Oola doaropp bestund, een poah Worschtenja fe de Hunj too tjeepe, enn dann fuah wie wieda noh Doehners, woa'rett Giros mett Tsatziki jefft, woohnt dem leewen Gott noch ut siene Jugend auls Hee mett dem Apostel Paulus väl unjawäajess wea, bekaunt wea.

Auls wie mett dem Âte foadijch weare, woohnt je mett Ahm toop emma een bät schwinda jeiht auls jeweehnlijch, wiels eena je nijch danke bruckt, porrd Hee, weils ahm je noch mett dee Hiebatsche toop eene lange Ries, von Kroohnsthol bett Tus väastund.

Enn doa oppem Hof biem Birchwood haundreahd wie, enn dann dacht'et eenmol seea opp, enn wajch wear'a!


© 2007 Jack Thiessen