daut easchte Mol auls miene Breeda mie de Wohl aunboode, entweda den Kopp oppem Heiwklotz too laje, ooda mie aum Scheitahupe faust too binje, enn een bät de Spiele aun miene Hacke auf too senje wea auls een breedajemeendscha Prädja, Henritj Baerg vonne Portage M.B. aune Uni. aunkaum, enn mett Schum verrem Mul enn twee Massasch aum Hoat biem Unipräsident Dokta Wilf Lockhart, uck Prädja, bestund, mie sulle se kratjcht soo auls Rudy Wiebe enne kolde Loft satte.
Etj säd Rudy Wiebe, enn daut dooh etj mett Fliet, wiels etj haud kratjcht donn auls sien Romaun "Peace shall destroy many" rutkaum dee Jaunz-Cowboy-Evangeliste, dee etj enn Dietschlaund goot tjanne jeleaht haud, enn eene hiesje Zeitung tjritisead. Bitte: etj haud mett tjeenem Wuat daut Tjristentum enn den Gloowe aunjejräpe, bloos dee Taktitje von dee Cowboys mett ähre Bible auls Revolvasch, enn mett ähre emma utjehungade Jeldbiedels bedacht.
Mie wulle miene "Breeda" donn daut Hus toop mett mie doabenne aunstetje. Wiebe jintjch daut tjeen Dripps bäta. Enn aules enn dem Senn vonne groote Leew, dee de Prädjasch soo aun sijch habe, wann see eenen Radasenn auls perseenlijche Missionoare tjriee.
Äwre Joahre wadahold sijch diss earnsta Sposs vonne Prädjasch enn mienem Läwe noch een poah Mol, enn de Jack Thiessen Weat oppem Menno-Aktienmoatjt wea boold unjre Luck emm Tjoatjetjalla aunjekohme.
Oba eena läwt je wieda, dochwoll wiels dee Leew, enn de Haund von bowe stoatja ess auls de irdischa Kotadaunz, jeweehnlijch vonne "Breeda" enjefädemd.
Oba, stalt junt väa, nu fange miene Breeda em Bootenvorstaund unjre Leidung von mienem langjoahjen Frind, noch ut Dietschlaund (weens soo docht etj) Johaun R. Friese wada aun mett Schwävel too späle, soo's eena daut deit, wann eena eenem Brooda dee Leew mett Lijcht enn Fiea biebrinje well.
Dit wudd je eajentlijch aulatoop een prostet Jaumareahre senne, wann dit Kapitel nijch von eene butajeweehnelje Fru sienatiet aunjeschnäde worde wea.
Daut kaum soo: wie saute mol wada, auls soo foaken, em Himmel oppe Ead bie Viktor Peetasch aum Desch enn aute, enn vetalde, enn sunge, enn drunke enn vetalde. Enn haude väl too saje, enn dann noch meea.
Dee Schreftleida vom Booten, een jewesna Leahra (uck miena), enn een Prädja sowesoo, enn siene seea oppjewatjchte Fru vetalde mett eenmol vom Krut enn Gottes Goade. Na vom Kurrei, Burjaun enn Schwienskrut em mennischen Paradies tjann etj je dit enn jant, enn dann vemuhld etj mie, wiels mie daut scheen jeiht, wann de Fadre enn uck de Duhne fleaje, enn sijch dann enn miene Toodatjch soo auls jeweehnlijch saumle enn fe Droomstoff sorje.
Enn donn läwd mett eenmol disse oppjewatjchte Fru, woll toom easchten Mol aum mennischen Desch opp, enn säd: "Joh, enn dee latzte Joahre wea je eene Konferenz noh de aundre, meist soo's wann se aulewäje, enn measchtens wiet auf, Konferenze aufhoohle omm noch meea Konferenze too plohne, enn doaräwa seea puchaje Berejchte too schriewe. Meist soos eene wankende Krankheit, disse eewje Konferenze! Enn vonne schratjelje Koste enn Onkoste fe aul de Reiseprädjasch enn äah Aunhenjsel, well etj eascht goanijch aunfange!"
Na joh, enn nu äwa twintijch Joah lohta hab etj kratjcht dit Thema aum Raund aunjeschnäde, wiels miene sesst veninftje mennische Kollege daut noch emma soo drock, oba soo drock met ähre Konferenz habe. Wohlgemerkt, soo's de Dietsche saje, eea etj enne Zeitunge enn besondasch emm Booten irjendeene Kritik aunbrinj, loht etj verhäa emma miene Fiea-Vesejchrung aum Hus een bät oppstocke, wiels mett mennische Prädjasch ess nijch too sposse!
Aum 19 Juni tjreajch etj von dee mie seea leewe Sessta, dee etj eajentlijch goanijch tjann, dee Schreftleidarin Ingrid Janzen-Lamp eenen Breef, dee mien Hoat tooschnead: Etj sie von toojoah aun aul persona non grata em Booten.
Etj wull je daut noch beräde, etj docht daut musst dochwoll Sposs senne, oba aule Däahre weare tooh. Tjeena haud Tiet. Tjeena Tus. Bloos: "Wäah mennische Prädjasch enn äahre Konferenzsenn tjritiseat, dee tjritiseat den leewen Gott!"
P. S. Übrigens befindet sich Prediger Johann R. Friesen als Vorsitzender des Botenkomitees in durchaus gleichgesinnter Gesellschaft. Denn: vor bald sechzig Jahren stand das Botenkomitee in Rosthern vor einer Wahl in Sachen Schriftleiter. Entweder Arnold (ehemals Abraham) Dyck oder Walther (ehemals Jascha) Quiring.
Zur Sache befragte ich meinen Namensvetter J. J. Thiessen auf einer Menno-Konferenz im Juni in Clearbrook 1965. "Wie haben uns für Doktor Quiring entschieden weil Dyck für manchen Geschmack zu viele spassige Geschichten geschrieben hatte. Zweitens, er rauchte.
"Und für Quiring weil er sofort mit uns ein frommes Gebet sprach."
Dass Quiring der ausgekochteste Schurke, Judenhasser und Massenmörder in der Geschichte der Mennoniten war, übersah Thiessen & Co. beflissentlich obwohl sie genau Bescheid wussten, bzw. Bescheid wissen konnten.
Hat sich in dieser Gesinnung überhaupt ein Jota geändert? Wenn ja, dann sollte sich der Vorsitzender eigentlich mal ehrlich zur Sache melden.
Mit Grüssen gewohnter Herzlichkeit,
Jack Thiessen