De oola Gerstein tjemmt nu mau eenmol em Joah vebie. Hee ess, sajcht'a, nijch meea de Jinjsta, enn daut jleew etj ahm jearn. Oba spoßijch, enn vejneajcht, enn utjelohte, enn spendobel, enn frindlijch ess'a emma noch auls een Eeljscheijch. Enn Plautdietsch red hee bäta auls Bosche Jeat ut Texas Enjelsch kaun.
Oba hee haft noch emma, soo sajcht'a uck, "Nachholbedarf" waut soo väl heet, ahm jankat sijch aun Schwiensfleesch han enn wada saut too äte, enn daut jletjcht ahm bie ons. Daut tjemmt doavon, daut de Gersteinsche enn Sache Schwiensfleesch sijch bie ahn Tus suregurtjsch vehelt.
Oba fe jieda Portsjoon Jreewe, Rebbspäa, Ruakworscht, Kassler, enn Kotelette, woohne de Enjlenda pork chops nanne (bloß, daut de enjlische weinja Fatt habe, enn nijch soo goot schmatje), vetalt dee Oola emma Jeschijchte, dee jiedet Joah erstaunlijcha woare.
Hee haud sijch jistre noch nijch daut Schwiensfatt vonne Tjeewe nohm Äte aufjewescht, auls hee mett siene Vetall loosläd..
"Daut de oola Obraum, dee junt vleijcht uck vom Oolen Testament häa bekaunt ess, mett onse Gersteinlinje Frindschauft wea enn ess, ess dochwoll bekaunt. Enn wann etj siene Breew, sien Kauftaun, sien Schlachtmassa, siene Tobakspiep, enn siene Schnaupsbuddel, enn uck sien latztet Poah Ladasteewle nijch dee Ben Gurion Universität vom Negev vemoakt haud, haud etj dee mettbrinje kunnt.
Ohmtje Gerstein läd sijch noh eenmol een Kulla reiwe Ruakworscht opp een Stetjch Groffbroot, plenjad doa dree Ätläpel Äditj nopp, dann schneet hee eene haulwe Zippel, fustgroot, doanopp, enn beet soo enn, daut sien haulwet Jesejcht doabie veschwung, oba sien Boat stuak unjrem Schmatock doch noch weens sass Zoll väa.
"De measchte vonne Breew habe mett Wind enn Saund, enn dräjet Wada, enn noch meea Hett, enn Schop, enn Kozze, enn oppstoarnoasche Fruees enn goastaje Tjinja too doohne, oba dann vetalt hee uck von Sodom enn Gomorrah, enn daut ess je dann uck nijch wieda vewundalijch, wiels daut Sindenfuhl ess je wiet enn breet bekaunt, oba woa etj hanwell, ess daut mang de Twintijch, dee sijch Obraumt bie dem leewen Gott enschachad, uck een Reima mett Nohme väatjemmt.
Oohmtje Gerstein wea oba mett dem Tofle noch nijch gaunz foadijch, enn hee fruag auls wie noch vleijcht een bät "Zujbotta" toom oppschmäre haude. Doamett meend hee je Jreeweschmolt, wiels Zujbotta ess je soo meea de Sproak vonne Nippaenja, aulso mienem Voda siene Sproak.
Wie deschde aules opp, waut ons ennfoll, wiels dem Oolen Voda Obraum sien Frindschauft tjemmt je nijch aule Dach vebie, enn wann soo eena auls Gaust ver Wiehnachte oppduckt, saul eena doch ruhijch den Desch knoare lohte, meen etj.
Endlijch wea de Oola soo meea foadijch, enn schoof sien Glaus väa, wiels ahm eene "dobbelde Portsjoon Vedeiwsel" jankad, woohnt bie ons measchtens auls Sturack bekaunt ess.
Etj gauf ahm fuats twee, wiels etj je, kratjcht soo auls aule aundre Theologe, opp Obraum siene Breew nieschierijch wea, enn dee Weetenschauftspomp ver mie jearn oppjeete wull.
"Joh, aun dem Morje verrem grooten Fiea bie Sodom enn Gomorrah, mott Obraum woll ernoa wijchtijch väajekohme senne, wiels hee aule Nohmes oppjeschräwe haud, woohne dann doch too goot weare omm enntooschmelte. Doa stund een Rabin, een Cohen, een Davidoff, een Saulmoohn, een Rothschild, een Unga, een Peetasch, een Cantor, een Schachter, een Mendelsoohn, een Rappaport, enn uck een Reima auls Numma twalf. Schallenboajs, Rampels enn Sewautstjess jleew etj kaume doa nijch väa, dee hab etj entweda vejäte, ooda dee kaume lohta. Gaunz muzhrijch emm Jedajchtnis wea doa vleijcht dann doch een Wiens, enn vleijcht sogoa een Thiesse..." hiea unjabruak etj Ohmtje Gerstein, enn goot ahm noch schwind eenen Sturack enn, enn schoof ahm noch eenmol eene Kommtje Jreeweschmolt noda, vleijcht wudd doabie dann doch noch de Nohme Thiesse rutjleppe.
Oba daut bleef doabie, de Wiense enn Thiesses bleewe soo meea emm Haulfdiestren enn sien Jedajchtnis lidje.
"Na joh," sajcht Ohmtje Gerstein wieda, "oba ons Nohme, aulso de Gersteins, stund uck doabowe; wie bleewe onjeschoare. Oba woaräwa wie ons nijch striede brucke, ess je dochwoll gaunz kloa: Jun Jesus, auls Jun Messiahs ess von mien Staum, enn wann onse Oolasch rajcht habe sulle, dann tjemmt uck Onsa noch, enn dee woat dann uck mett mie Frindschauft senne, enn mett de Reimasch uck, wiels opp de List vonne twintijch, dee aum Läwe bliewe sulle, soo steiht bie Obraume jeschräwe, wea aules sien Frindschauft.
"Enn waut blifft mie noch wieda äwrijch, buta mie bie junt fe daut Vebietsel too bedanke, enn junt eene freelijche Wiehnacht too wensche," säd Ohmtje Gerstein. Enn donn "Opp Wadaseehne!" Enn wajch wear'a.