"Evangeliste ohne Biebel" - von Jack Thiessen

Auls etj jistre miene baste Freundin oppe Welt, nämlijch Lisbeth Peetasch, mol nohm Phoon kroagt, enn see aul boold twee Wätjch doamett jerätjent haud, daut etj Bowe wea, vefeahd see sijch gaunz morschijch mett ähre näjentijch Joah enn fruag: "Jack, oba woo scheen, oba woo scheen Diene Stemm too heare. Oba woa best du, saj mie bitte, woa best Du?"

Etj saj: "Daut Du uck noch froage motst; etj sie em Himmel, enn drintjch hiea mett dem leewen Gott een Glauss kolde Ditjchemaltjch enn uck Bottamaltjch." "Kratjcht soo haud etj mie daut jedocht," säd see soo leeftolijch, auls bloos see daut saje kaun. "Schmatjcht dee Bottamaltjch noch bäta auls sienatiet enn Elloag, ooda lohta enn Jrienthol?"

"Wiels hiea em Himmel de Loft reina ess, enn dee Viren hiea aula doot verre Däah lidje, schmatjcht aules bäta. De Bottamaltjch ess nijch raunzijch, boasch ooda gaulstrijch. Komm ons doch mol beseatje, joh?"

"Daut dooh etj, wann etj endlijch mien Schemedaun jepackt hab,"sajcht see.

Donn gauf etj endlijch too, daut etj noch emma een Opfa vonne Gravitas sie, enn jrods utem Bethesda Krankenhus en Steinbach noh Hus jekohme wea.

Waut wea? Etj räd jeweehnlijch nohm Meddachschlop mett miene lintjche groote Tee, enn tjräajel ahr measchtens een bät doabie.

Aum achtienden Oktoobah säd etj too disse Tee: "Heea, Schildtjrät, Tiet opptoostohne!" Oba see schleep wieda, enn räajd sijch nijch.

Donn säd etj: "Kaunst mie mol fief Dohla liehe?" See schleep wieda.

Daut word earnst. Etj saj: "Wellst Du von mie tien Dohla habe?" Oba see muak bloos een Uagtje op, bleef oba soos de weise Op, dee nuscht nijch head, nuscht nijch sach, enn nuscht nijch säd gaunz stelltjess lidje.

Etj vesocht mett ahr Jriepa too späle, enn aune Uahre too tjniepe, oba see bleef haulf em Schlop.

Auls etj donn endlijch oppstund, muak weda dee Tee noch dee Fooht, noch daut Been mett, enn etj tjeiweld lang han.

Em Krankenhus veleet etj mie gaunz opp den Nohme Bethesda, aulso daut "Hus vom Wunda" enn schlooht de Hiestjedäh von Benne tooh, enn dann pessead je dann uck daut, woamett een studja Russlenda von miene Sort nijch jerätjend haud. Etj drascht mol wada lang han, enn auls see schliesslijch de Däah von bute opjeschlohte haude, stund äwa mie mett eenmol eene Doktasche, enn dree Krankeschwestre, enn aule dree muake seea groote Uage. Daut heet "groote Uage" muake see bett opp dee Dokta Trinh ut Vietnam, dee de Uage soo meea siedwoats vetrock, daut's bie dem Volkstaum soo mood, wann see groote Uage moake welle. See haude uck fuats een Säl too Haund, enn läde mie daut omme Oarms enn Been, enn dann noch eene Plautform unjrem Hinjarenj. Etj deed doa uck fuats mien gaunz bastet auls see mie mett Batteriekrauft enne Tritz huachhoowe, enn sung doabie "Von der Erde reiss mich los" enn wiels twee von Veea von miene Halpasch uck huachdietsch-trjistlijch weare, sunge see mett. Oba auls wie donn een Rett nohleete omm fresch Odem too schape, sad dee Batterie ut, enn etj bleef tweschen Himmel enn steinbachsche Ead bommle. Dann holde see eene Batterie ute Nohbaschauft, von Funk's Livestock Company, enn disse Batterie dreef jeweehnlijch dartijch stock prods, aulso elektrische Tjeaj-Prätjlasch, enn auls disse Batterie aunjelajcht word, wea etj uck enn eenem Nu dijcht aum Bähn aunjekohme.

Jenuag, nu deede de Mediziena waut ahn aul emma aum scheensten jintjch enn jeiht: see piesackte, see forschte, see nauhme mie een bätje Bloot auf, soo meea dartijch Lieta, enn räde mie Moot too. Enn dann noch eenmol, enn nauhme Bilda von mienem bennaschten Menschen auf, enn taupte mie nochmol een Amma Bloot auf.

Während etj? Etj hild mett miene Tee, mett miene lintje Schildtjrät Unjaräd, soo auls dit: "Wann Du meijeenja Schledonz Die nijch boold enn Pluche lajchst, jeiht ons daut domm."

Enn donn späad sijch daut auls wann twee Buddle Champagner mie derjche Jlieda strullde, enn etj word lenjdhan wada läwendijch.

Fe dee phantasieloose Lesasch, dee sijch meea fe mien Tjarpa auls eene eenjemohte goode Jeschijcht intresseare, doaf etj noch saje: Aule Tests, aulso aule näjendartijch beweese nuscht, enn nu ess noch een MRI Scan faulijch, dee bewiese saul, daut daut Gaunze von dem Tumooah enn mien Ridjstrang ver veea Joah häareaht. Mol seehne. Daut woat uck aulatoop langsom Tiet, wiels Koffe ut kalorieoamet Wota em Hoospitol schmatjcht oppe Dua seea jlitjwajch, dann noch leewa Postum, Pripps, ooda Zachuje.

Bett nu ess bloos ons Schäfahund Mista mett mie ontoofräd, wiels hee haud sijch daut enne Tweschentiet, aulso auls etj enn Steinbach krank späld, enn mienem Bad macklijch jemoakt.

P. S. Nijch too jleewe, oba mien Badpoatna em Bethesda wea Peeta Tjäla, een Cousin von Al Reima. Dissa word eascht dann jesund auls etj ahm den Roht gauf, hee sull mau tweehundat Tjälaschjast aun eenem Dach empfange. Auls etj ahm fruag, als hee jleewd, daut de leewa Gott Plautdietsch rät, säd Peeta: "Bloos seea vebiestade Mensche weete soowaut nijch."

O joh enn noch eent: wäa eene Tabun von disse Tjälasch biem Spezeare erläwt haft, dee jleewt aum Himmel wiels see send ohne eene Wuat von Gott too saje, de baste Evangeliste, dee daut hiea oppe Ead jefft.


© 2007 Jack Thiessen