Wellem Niefeld kaum aune 1926 noh Kanada, enn weet Jie woa hee han trock? Doa woa hee eajentlijch goanijch hahn wull, noh Gopherville. Gopherville lijcht tachentijch Kilomeeta waste von Musdarp, aulso opp Jantsied. Niefeld siene Nobasch weare uck Menniste, "oba mau Kenädja," säd Niefeld. "Wann see nijch bocksheilijch send, dann sen see hunjsch," säd Niefeld, enn mett'e Bildung wea daut mau "hejchstens dree Zylindasch von acht." Etj säd Onkel Niefeld, hee sull soo waut nijch saje enn donn säd'a, daut wisst hee, oba hee säd daut trotzdem. Well, dommleahre lat sijch tjeena, uck nijch de Kenädja, enn dee deede opp ähre Oat mett Niefeld äahre Reatjnung enne Dommleahrarie bejltije.
Auls Niefeld eene Garazh buhd, klunjde de Junges emm freschen Zement nenn, wann hee
Klucke satte deed, läde de Nobaschjunges Steena manke Eia. Siene Pead schneede de Junges de
Zäjel auf enn vekoffte daut Hoah; daut oajad Niefeld morschijch. Hee säd: "Woo lat'et bloos miene Schrugge? Mett de korte Zäjel sitt'et dee auls fatte, oole Tauntes mett korte Ratj.
Besondasch dem kluaken Kunta Orlik, dee schämt sijch jrodentoo mett sien Schebrientje aum Pludaenj."
Nu froag Jie aul aula woor'et Niefeld woll Hallowe'en jintj; enn de Froag ess uck berajchtijcht, wiels? Joh wiels dit easchte Mol schmeete de Junges mett Niefeld doabenne oppe Sett daut Setjreet toop omm. Enn donn word hee doll: "Waut Schinda ess mie dit, de Kommuniste kunn eena bandje oba disse Tjräte nijch. Mol seehne!" Niefeld rejcht sijch mett Setjreet toop opp, musst sijch dann oba aundre Schlaubbetjze auntratje, enn donn wacht hee emm Staul bett'et diesta word. "Joh, doa send see," schreajch Niefeld, "Komm Mopps", enn nu rannd hee enn de Hund de Jungess hinjeraun. Enn, joh, hee jreep Jiesbrajchts Wellem enn heiwd dem schratjlijch de Huck voll. Mett de Haund, froag Jie? Mett waut, woat de Jeschijcht junt vetalle; etj noch nijch.
Well, Oole Jiesbrajcht phoond de Polizei; hee wull nu doch mol "eent fe aulemol aundre Seiden opplajen" säd hee. Enn de Polizei fung biem Jungen-Wellem schwoate enn bleiwe Placke, leete dem Niefeld eenen Warrant tookohme, enn veea Wäatj lohta gauf'et Court. So waut gauf'et nijch jieden Dach enn de Courtroom wea voll; doa saut Ziepa-Uagja Buhla, doa saut Supa-Sewautztje mett siene Head, doa wea Peeta Wiela mett siene hasselje Tjinja, doa saut uck Plume Panna von Plum Coulee, enne tweede Reaj saut Resserieta Johaun Jaunze, bie ahm saut de Dolla Thiesse, enn dann noch Gurtje Wieb enn Kuhne Wiens. Hinje saute Peiwel Peetasch Auna mett Netjsche Netjels Fraunz enn gaunz väare saut Solmoon Schreeda, de Väasenja.
Nu jintj'et loos. Dee Rejchta kaum nenn, "schwoat auls bille een Huttatola," de Lied stunde opp enn dann kaum noch de Lohme-Foot nenn jeschurjelt. Linjsch vonm Rejchta saut Wellem Niefeld, rajsch von ahm saut Jiesbrajchts Wellemtje mett'e Schildmetz enne Haund. Enn wieda auf, soo's etj aul säd, de jniesaje Bonsch Kenädja.
"Soo ess daut mett junt wäahloose Churchgangsters," säd de Rejchta. Ut Rußlaund wajch, wiels jie nijch faite welle, enn hiea lidj jie junt enne Pluche! Dann woa wie vondoag mol een bät opprieme motte. Aulso, See, Mista Niefeld woare von disse Kids jeoajad, jepiesackt enn jetualied?"
"Yes Sir," säd Niefeld.
"Enn die Wellem, haft Onkel Niefeld eent mett'e Fust, vleijcht sogoa mett de Tjiel eent äwajeresst?"
"Nijch eent, weens tweemol, enn donn säd'a, daut hee uck miene Paupe eent aune Näs barschte wudd enn mie wudd'a daut näajchste Mol weens fe dree Watj daut Gohne aufwahne. Enn etj jleew ahm daut uck, wiels dis rußlendscha Oohm Niefeld ess je meist soo groot enn stoatj auls een Bibelheld," säd Wellem.
Niefeld wisst, daut'et nijch goot stund enn hee wrunscht han enn häa, enn plintjad enn dreikoppt.
"Well, Mista Niefeld, etj woa Junt biebinjre motte, daut See nijch enn Rußlaund manke Jesatzesbräatja send. Enn dissem Laund mott eena nijch fuats loostjiele, vestohne? Well, etj woa Ahn ditmol noch nijch emm Klohtje schmiete, oba hunjsche Eewstunde woa etj Ahn aufwahne."
Enn nu freid Jiesbrajchts äah Wellm sijch morschijch.
"Oba, just a minute, Mista, woaromm send See so nervees, enn woaromm plintjre See soo pienijch?"
"Daut tjemmt vom latzten Tjrijch," säd Niefeld. "You see, etj fait fe de Witte jäajen de Kommuniste, enn mie spitjade see enn, enn leehte mie hungre enn tjwälde mie. Von donn aun sie etj nerwees!"
"By golly, what do you know. You fought those damn Communists? Listen Niefeld, dann sitt de Sach nu doch gaunz aundasch, komm mol häa!" enn jintjch mett ahm noh hinje enn eene tjliene Stow. Doa musst Niefeld dem Rejchta de gaunze Jeschijcht tweemol vetale; see schmeatjte sijch eent, de Rejchta wisst nu uck kratjcht woo daut stund, enn see jinje tridj emm Courtroom nenn.
"Wäa haft daut jeseehne, daut Oohm Niefeld dissem goastajen Plästa Wellem Jiesbrajcht Junior daut Lada vollheiwd? Tjeena? Daut docht etj mie aul! Listen, Willy Junior, du mett diene kommunistische Jrille, dis Onkel Niefeld meent daut goot mett die enn du saust ahm vondoag noch Dankscheen saje! Enn wiels du nijch weetst, woo daut mett dem Jriepa-Spell eajentlijch wea, woa etj die daut saje motte. Onkel Niefeld musst die jriepe enn daut Lada vollheiwe, wiels diene Leahrasch enn diene Ellre daut vesiemt habe. Daut Ohmtje Niefeld doabie de Hohma ut'e Fupp foll wea een Accident. Nu saj, 'Sorry!' enn 'Thank you, Mista Niefeld', enn een bät jicha!"
"Enn Niefeld, etj gratoolea, See send de Ridjstrang vonne Demokratie. Yes, Lied, enn wann June Tjinja uck soo ooltnässijch enn soo hasslijch send auls dis misaja Willie, dann heiwt ahm mau tootiet daut Hinjarenj voll sesst woare dee uck noch Kommuniste, enn dann mott Onkel Niefeld kohme. Enn dem fellt ahm vleijcht wada de Hohma ut'e Fupp, vestohne?"
"The court is dismissed: Daut Jerejcht ess ut."