Daut wea aum säwenden Juni aune vearentachtenijch, aune Tweedusend auls mien Frind Viktor Peetasch enn etj enn Israel rommdwaulde. Daut de Jude noch meea Helljedoag habe auls wie mol haude wisst wie, oba daut wie aun dissem Dach diretjcht enn eenen grooten Heljedach meist soo onverhoffts auls enn eenen Koohplautz nenn stiee wudde, wisst wie nijch.
Oba daut deed wie.
Soo's jesajcht, de Jude habe meea Helljedoag auls een Eatjekohta Nät enne Tjeewe, enn dee eensja Grund woarom see sijch soo väl Tiet toom sijch offiziel Zanke enn Rommsette leiste tjenne ess wiels ähre Nobach enn Frindschauft, dee Wetjeltjapp aulso, dee Meddasatjeit noch earnsta nehme auls see.
Enn soo auls daut bie de Jude mott, send de measchte von äahre Helljedoag vonne earnste, joh vonne truje Sort. Enn dann hiele see noch dolla auls mennische Mumtjess wann see vom Triebsaul enn Russland vetalle.
Etj docht emma, Mensche hiele bloos wann see opp earnst trurijch send, oba dauts goanijch soo, weit gefehlt! Nä, see hiele uck toom Scheengohne, enn habe daut A Capella-Hiele rut auls een mennischa Chooa bie K. H. Niefeld daut Sinje. See hiele dree ooda uck veeastemmijch, enn hoole doabie schmock Wies. Enn wann see dann veea bett fief Stroophe vom selwjen Leed jehielt habe, dann lohte see noh om Wota, Pepperminttee ooda uck Arbuseslurpies too drintjche, sonst rannt ahn de Trohneborm dreajch. Enn dann jeiht daut Leed von Väahre loos, daut sogoa de Meistasch em Jule, de Wilw, sijch hansatte enn opp niee Hieljedanke kohme.
Oba tridj noh Israel: Eenjefäah dartijch Kilomeeta nuadoost von Beer Sheba, de Obraumstaudt.aulso (Beer Sheba ess äwajens soohn schatajet Darp, daut daut tjeen Wunda ess, daut Voda Obraum emma rommrannd enn met siene Fru enn äah Aunhenjsel aulewäje jieden Dach dree bett veea mol Koffe drunk), doa lijcht mol wada een strauma Tjoatjhoff, enn dissa ess woll fiefdusend Joah oolt oba stendijch em Jebruck, wiels daut Voltj Israel emma von Gott Ordasch tjrijcht dissem ooda janen mett siene gaunze Famielje toop de Tjapp auf too säble, enn dann säble dee Wetjeltjapp tridjaun, enn schlohne uck de Jude han enn wada de Feet bett hinjre Uahre auf, enn dann jeiht daut Trualeed von Väare loos. Soo auls vondoag.
Oh joh, enn wiels daut uck Jude jefft, woohne daut Hiele nijch besondasch goot jeiht, oba see doch hiele motte, haft daut aul emma Kloagwiewa jejäwt, dee fe goodet Jeld reed send een Unjaspaun ooda uck twee too hiele enn sijch doabie aune Lunze too pletjche, enn trurijch too senne, soo lang auls Mensche ahn doabie tootjitjche enn bewundre.
Etj tohld soo meea ut Sposs een noch tjlanderet Mädtje aun dissem Dach, noch verr Klock Tien zemorjess tien Dohla - mett Gott auls Troost doabowe - wiels etj docht, daut daut Mejaltje ut Sibirien ver kortem jekohme wea, enn mie daut om ahr jaumad. Oba see docht, etj meend daut earnst, enn dann sung see, etj meend, hield see loos, soo auls oppjetrocke. See hield soo meea Tchaikovsky Melodiee, enn doawäjen kaum etj opp Russlaund too räde.
Joh, enn disse Mejall juhld soo schratjlijch loos, daut fuats dartijch Hunj enn noch meea sijch om ahr hansade, de Näs noh dee Stearns puschte, de Poote verre Uage hilde, enn uck looshielde. Dis Chooa word mienen aul emma spendoblen Frind Vietja dann doch too väl, enn hee gauf daut Mädtje fuats fief Dohla, daut see oppheare sull. Oba see haud mett ähre Stemm Väs jefoht, enn hield nochmol gaunz Sibierjen voll.
Wie leehte den aunjeschnädnen Chooa stohne enn toom Deel uck lidje enn muake ons oppe Socke, wiels vondoag musst wie je eenen Huagen Helljedach fieahre.
Oppe rajchte Sied vom Wajch, dijcht biem Tjoatjhoff, stunde jewaultje Trocks mett hundade Dusende Näjeltjess ooda uck Roose doabowe, enn eena kunn sijch von dee soväl omsonst nehme auls eena wull, omm de fresche Bloome oppe Jräwa too laje. Enn daut deed wie dann uck. Wie sochte ons jieda een Grauf ut, enn daut ess je nijch wieda schwoa, wiels de measchte Graufsteehna doa een Photo habe, daut eena weet, wem eena Blooma ritjchwirtjend hanlaje well. Daut oppem Tjoatjhoff enn Israel veraun too kohme ess je nijch soo leijcht wiels eena sijch emma tweschne Maschienejewehre derjchbuchle mott, enn uck aune Bajonette vebie, mett dee see eenem egol enne Rebbe poakre.
Wie weare aunjekohme. Doa word jekloagt enn jehielt auls wann de measchte daut mettem Truajeschrejch enn mett dem Trohnevejeete daut noh de mennische Oat drock haude.. Oh mai!
Enn eena steiht doa, enn weet nijch rajcht auls eena metthiele saul ooda sijch wundre saul. Eent woat je eenem opp Städ dietlijch: wann Menniste toopkohme, dann sinje see fuats ähre Leedaspitjasch ladijch, oba Jude hiele sijch saut. Han enn wada sinjt dann uck noch een Cantor, oba daut kunn etj too eena Tiet uck. Eena mott sijch dann bloos dijcht bie eene Bieeromp opphoole, enn wann dee dann loosprätjle, woat eena stauntepee too eenem utjewossnen Cantor.
Bie aul de groote Trua aun dissem Dach, aun dem de haulwe Welt toopkaum omm ähre väle Doodes too bekloage, foll Frind Viktor enn mie oba doch eenem soo een bätje aum Raund vom Tjoatjhoff opp, wiels dis Mensch, enn straum aunjetrockna Tjeadel, omsonst hield enn Trohne utem Hoat vegoot. Eena woat ajchte Trua nijch soo schwind loos, enn soo trock ons dee Eensaumtjeit von siene deepe Trua dochwoll nohda.
Dee Tjeadel word ons jewoah. Hee wescht sijch de Uage enn säd: "Bitte haben Sie Verständnis: ich bin zwar Jude, und sogar gebildet, aber ich spreche nicht zehn Wörter Hebräisch, und nicht viel mehr Englisch, aber einmal im Jahr komme ich aus Berlin an diesem Tag meine tiefe Trauer kund zu tun." Enn dann hield hee noch eenmol twee Schneppeldeatja voll.
Wie weare deep jereaht. Viktor dretjcht ahm de Haund mett Mettlied, enn etj uck. Dann säd Viktor: "Das tut uns aufrichtig leid; Sie haben Ihren doch durchaus ansehnlichen Freund, - enn wees doabie opp daut Photo oppem Graufsteen - offensichtlich sehr geliebt."
"Es liegt anders, lieber Freund!" säd dis jinjra Einstein. "Ich habe ihn nie gekannt. Der Grund meiner ungeheueren Traurigkeit ist: Dieser Mann, Moische Gerstein, da auf dem Bild, ist leider viel zu früh gestorben. Er war nämlich der erste Mann meiner Frau."