Jistre gauf daut zastijch veschiedne mennische Jemeende, vondoag vleijcht aul eene ooda twee meea. Ut eajne Erfoahrung kaum etj saje, eena es nijch opp jiede mennische Tjoatjebeintj Wellkohm. Du enn See enn Jie uck nijch.
Aulso woa ess eena dann auls Mennoniet, auls Mennist eajentlijch Tus? Arnold Ditjch meend biem Arbuseäte Plautdietsch rede, doa ess eena auls Mennist Tus. Daut meen etj uck.
Wie Menniste driewe enne gaunze Welt jewaultijch Missjoon, enn daut ess goot. Oba wie derwe de Ennere-Missjoon nijch vejäte. Jesus haft selden doavon jeret, daut Hee Jud wea; daut haud Hee goanijch needijch, wiels ahm daut selwstvestendlijch wea. Daut mucht ons, joh daut sull ons Väabild senne: Sproak, Wesen mett aulem Toobehea.
Daut Wuat Fieastäd ess ons dochwoll bekaunt. Wann nijch, dann foht doch bitte toom Weadabuak, ons Weadabuak, enn tjitjcht daut Wuat noh. Fieastäd meent, daut de eewje Waundaschauft too Enj ess; wie haude daut Nomadentum aufjelajcht, enn haude eene eajne Städ, woa daut Fiea emm Hus gauf, eene Städ endlijch, woa wie tusijch weare. Wie weare doa too Hus. Tus.
Daut ennere Äquivalant fe de tjarpalijche Behusung fehld ons, enn auls wie dann enn Praisse saute, enn dann lohta en Russlaund, schmiead wie nijch bloos Woohlstaund noh bute, oba uck onse gaunz eajne Sproak, enn dee wie ons em Auldach waut too saje haude, enn dee wie spezeade, enn dee wie ons goot weare, enn dee wie lachde, enn enn dee wie hielde, enn dee wie seide, enn dee wie eiwste, enn dee wie jebuare worde, enn enn dee wie storwe. Enn enn dee wie ons tusijch feehlde. Enn enn dee een jieda Mennist von aulewäje enne Welt ons vestund. Enn wie ahn.
Oppe disse Doagung, onse Plautdietsche Jast-tjast, send wie endlijch mol wada Tus. Enn wie freie ons.
Jun besondra Frind,
Hauns Thiessen