Auls mien Voda daut mett eenmol, enn vleijcht toom easchten Mol em Läwe seea drock haud wea, auls hee ennword, daut hee stoawe musst. Donn fong hee mett eenmol aun pienijch too packe; aules waut ahm soo biefoll, musst em latzten Schemedaun nenn. Enn besondasch siene dietsche Schooh weare ahm wijchtijch. Enndoohnt: hee packt aules enn. Hee wull utreise, säd hee. Woahan? Doaräwa haud hee nijch väl waut too saje, wiels hee haud daut, soo auls aul jesajcht, too drock doatoo. Kloa wea, daut ahm daut hiea aulatoop ennoollent wea. Sogoa enn Jrienthol, enn em Tjoatjetjalla enn Nuadkildoona sowesoo.
Donn kaum uck etj opp Jedanke. Wiels mie daut hiea too kolt em Winta ess, enn em Somma too schwoohl, docht etj mie, eena sull vleijcht de Midjeranch hiea vetjeepe, enn sijch mol omtjitje. Leijcht jesajcht. Noh Steinbach jankad mie daut nijch: Doa woat measchtens aules ut Pappelholt, Binjabaund, enn Schnodda jebut enn dee Produkte hochjeloft enn diea vekofft. Butadem ess doa aulewäaje dee Rachull de Darpsboll, enn daut ess nijch bieblisch.
Vleijcht noh de Ooltkoloniea? Daut jankad mie, oba dann musst etj miene Messtkoa wada opp Stohl brinje, enn dee niee Gummreif, toojoah aunjebrocht, wea mie doatoo too schod.
Vleijcht Huttera woare? Daut jankad mie noch dolla, oba etj hool mie aum Desch jearn een bät lenja opp, enn ät nijch meea jearn mett Henj enn Feet toojlitjch, soo auls daut bie ahn mood ess.
Vleijcht noh de Amische? Ähre Oat lockt mie noch aum dollsten, oba mie weare äahre Pies too seet, enn äahre Air-conditioning trubbeld mie too foaken. Enn measchtens wiels see tjeene haude.
Aulso woahan? Etj haud jenuag vonne Shakers jeheat, daut dee mie noch aum dollsten toosäde. Oba see weare meist aum utstoawe, wiels see mett äahrem Senn fe Qualität nijch meea konkurrenzfähijch send. Oba see säde, wann etj äahre Qualitäts-Industrie wada oppe Been halpe kunn, kunn daut opplatzt noch waut woare. See wudde mie dann oppnehme.
Mie jefoll daut Wada enn de Laundschauft doa, aulso enn Sied Virginia enn Nuadkentucky, enn waut daut tetjere enn scheddre aunbelangt? Daut tjemmt mett dem Ellawoare sowesoo, docht etj mie, enn wann nijch, dann kunne vleijcht äahre Shaker-Drops, von Kuckeruss, Zocka, enn Wota jekoakt, metthalpe. Dee Weltlijche, woohne nijch bäta weete, nanne daut Whisky.
Oba tridj noh de Industrie. Mie word daut Biebelwuat fear and trembling doabie wijchtijch, enn etj jleewd, etj wea oppen rejchtjen Wajch, aus etj bie ahn saut.
Een poah oole Frulied mett Huwe oppe Tjapp, enn mett väl Weisheit doarunja, gauwe mie dann den needjen Schubbacks. Dee eene wea eene schoapuagje Kluck, mett eene spetze Tung. Dee Jungess doaromm vetalde mie, daut disse Fru tjeenen Büchsenopna, aulso can opener bruckt, wiels ähre Tung spetz jenuag wea, omm Blajchdoose ohptoomoake. Butadem säde dee Jungess, dee Fru wea soo jeftijch, daut wann see sijch mol oppe Tung biete sull, wudd see opplatzt aun Blootvejeftung stoawe. Disse oole Hohftje kaum mie aulso kratjcht toopauss. Wacht mau. Oh joh, dee Fuchtel heet Naomi, enn wea uck eene.
Enn de aundre oole Fru wea de Leew en Persoon: see wea "Gott is die Liebe" opp twee Been. Disse Drottje wea auls Mäadtje de Huttera derjchjegohne, enn brocht eene ooltmoodsche Leewtolijchtjait mett, dee jlitjch von Gott siene Reehmabeintj staumt. Äwahaupt wea see von dee Oat, dee de Dietsche enne Welt eenen gooden Nohme jäwe. De measchte von daut Toakel ess aufbietsch enn diesta unjre Uage vonne Seel, enn hinjeraun, enn heiwtänsch, oba dann wann de leewa Gott sijch mol dee Meiwe opptjrempeld enn sijch aunstrenjd, dann moakt hee de baste Modells aun dietsche enn mennische Frulied woohne daut jeft, dee niemols ooltmoodsch worde. Soo auls disse Becky, dee Rebecca heet.
Becky saut oppe Väaleew, sung Leeda opp Dietsch, ooda see schloof Oafte ut, enn muak bieaun Ditjemaltjch, ooda vetald de Tjinja Jeschijchte, enn tjnett Stremp, enn wea das Salz der Erde, the salt of the earth.
Auls etj mie doa eene Wäatj soo oppjehoole haud, tjannd etj miene niee Adrass, wiels etj wisst, daut daut soo musst. Gurtje enn Enjäwunge woare von bowe enjelajcht, joh? Joh.
Oba tridj nohm Jeschaft. Wiels de Jungess doa meist aule Foadijchtjeite mette Henj haude, woohnt'et gauf, enn etj uck nijch oppem Kopp jefolle wea, leet etj nu dee Clotsch rut, enn fuah mett mien Plohn loos.
Etj nauhm von Naomi enn Becky noh de längiensche Oat, aulso omme Atj, een Schwitt Bilda auf. Aulso haud etj nu Seet-Sua enne Henj, enn säd de Schäka-Jungess, see sulle de Tjnippsmassasch väahohle, enn aunfange Solt- enn Päpa-Streiasch ut dem basten oolen Holt too gnuwle. Groote, feine Streiasch. Enn een bät seea jicha, joh? "Joh!"
Enn dree Wäatj haud etj toop mett mien Brooda Peeta de easchte dusend "Salt and Pepper Shakers- the originals" toop mett Bilda von Naomi enn Becky toobowe vekofft. Enn tiendusend Ordasch lage oppem Desch.
Opp woohnen Streia, aulso Shaker, Solt stund enn opp woohnem Päpa, tjenn jie junt selwst dentje. Wann nijch, bestalt junt een poah Shaker's shakers; miene niee Adrass enn Kentucky, woa etj junt boold mettdeele, joh?