Eent mott eena dem Reima doch lohte; oppjeriemd, sachlijch enn veropp auls hee aul emma wea - auls enn Steinbach, enn Winnipeg ooda en Phoenix - wann hee waut nijch gaunz jeneiw weet, (enn daut tjemmt seea selden väa ) - frajcht hee dee Experte sogoa wann daut Jrienthola send.
Toom Biespell fruag hee jistre, woo daut tjemmt, daut de mennische Mejalles nu mett eenmol Medauljess bie de Fuppvoll oppe Olympiade jewenne (unja ons jesajcht: etj jleew Reima wisst daut, oba soo's aul jesajcht, wann hee waut nijch gaunz jeneiw weet, dann dentjcht hee sijch nijch eene Auntwuat ut, woohne ahm pausst ((soo auls Predjasch)) sonda hee puttat dann aune Däah vonne groote Weetenschauft, omm opp Numm Sejcha too gohne, aun).
Soo's jistre:
Daut hee mie sienatiet eajentlijch aul oppem Stijch vonne Rajchtschuldijchtjeit enn disse Sach leid, haft hee vleijcht sogoa vejäte, oba hee deed daut. Daut send nu aul äwa dartijch Joah tridj auls hee mie mol fruag, auls etj wisst, waut eene Schmaundjoop wea. Etj säd: "Oba joh!" haud oba tjeene blausse Ohninj.
Enn donn vetald Reima mie, daut daut de Maltjtjleedie wea, enn daut soohne bloos vonne mennische Frulied jedroagt woare durf, enn daut daut aul veea hundat Joah, wann nijch meea, soo wea, enn uck nijch aundasch senne durf, wiels hinjre Kooh ooda uck unjre Kooh habe mennische Maunsmensche nuscht nijch too seatje. See derwe de Tjeaj foodre, enn utmeste, oba doamett ess dann uck Schluß: maltje ess Fruesoabeit.
Enn wiels de measchte Mensche uck nijch fetjza vom Bejriep send auls etj, woa etj junt daut woll vetalle motte, woo disse Traditsjoon sijch mette Tiet soo fruchtboa erwiese woare sull. Soo auls vondoag zemorjess, ooda uck jistre, ooda aul de gaunze Wäatj.
Fang wie noch eenmol een bestje von Väare aun: Wea toom easchten Mol enn besondasch bie de Klosses enn bie Rampels bestemmd, daut de Frulied de Schmaundjoop auntootratje haude, enn eenen jestuckten Blajchamma tweschne Been too tjlamme haude, enn sijch bie Mollie, Dollie ooda Langbeen oppet Maltjbeinstje hantoosatte haude, enn doa biem "Mit dem Herrn fang alles an" sinje daut Ieda ladijch moltje, ess nijch bekaunt.Waut oba bekaunt ess, ess daut de Frulied biem maltje sijch soos een Predja hinjre Kaunze vehilde: eena, enn uck de Kooh, wisst fuats wea doa Baus wea. Enn wiels de mennische Tjeaj aul emma väl Maltjch gauwe, tjreaje de Frulied seea straume Bowaschintjess. Äahre Muskle, soo wiet eena dee too seehne tjreajch, weare eene Lost, enn uck de Wode weare een Saundhocktje fe eene jesunde Fantasie, enn beides toop eene Uageweid.
Joh, enn soo jintjch daut dann gaunz schmajchtijch, wann uck seea langsomtjes wieda soo auls bie aule Prophetie: daut dieat seea lang bett dee endlijch aum Wollm vonne Tiet aunjebunge woare kaun, oba opp soohne Prophetie ess Veloht.
Enn daut wisste dochwoll de mennische Manna, enn hilde sijch tridj waut maltje aunbelangt. See äwaleehte daut äahre Frulied, wiels see nijch enn de Entwetjlung von ährem grooten aunjelajchten Plon hindalijch ooda enmischend senne wulle ooda sogoa durwe. Mette Prophetie ess nijch too sposse.
Na joh, enn daut Äwaje hab jie dochwoll uck aul lang jerode: Cindy Klassen enn de Rampels Dochta, beid ut Nuadkildona enn beid Dajchta von de oole, groote Traditsjoon vonne Schmaundjoop send nu Weltmeistach emm Schlädschooranne enn Turin jeworde. Opp disse Oat ess de Prophetie enn Erfellung jegohne, wiels ohne den langsomen oba lang aunjelajchten Obbu vonne Muskalatur von de Muttaschkaunt vonne Klosses enn de Rampels, aulso biem maltjche aunjelajcht, wea daut mett disse Mejalles nuscht nijch jeworde. Aulso: tjeen Wunda, daut disse Mejalles, nu Mädtjess, mett eene Olympische-Medaulj enn jieda Fupp boold enne plautdietsche Darpa enn Winnipeg heleie woare.
Daut bie aul dem de Mensche mol wada de Propheete enn äah Woatj doabie vejäte, ess kloa; daut send wie nijch aundasch jewant.