Moses "Moische" Gerstein wea enn Siedmanitoba bekaunt. Hee haud dartijch enn noch meea Joah tridj doa Veeh jekofft enn vekofft, enn wiels hee opprejchtijch, oba nijch oppen Kopp jefolle wea, enn Jletjch noh de Oat von sienem Jeschlajcht jehaut haud, wea hee too Jeld jekohme.
Hee vestund doa mett ommtoogohne. Hee gauf fe goode Zwatje aulnoch ernoa Dukate ut, enn wiels hee wisst waut Mennoniete imponead, kaum hee dreemol daut Joah derjch Steinbach mett sien schwoaten Cadillac - mett Ladasette - jestritjcht. Daut deed hee noh dee Oat soo aus daut maunjche, wann uck weinje Mensche, vestohne... enn wann hee kaum, heade de latzte, äwajebläwne Hohns enn Steinbach opp too tjreie. See stunde dann opem Mensthupe enn tjitjchte jrall. Uck de Hunj, verre Däah, heade sijch opp too schobbe, enn too balle. See saute, aus wann'et boold een Stejtch Worscht jäwe wudd.
Moische wea "won of de boys" wiels enn Steinbach aut hee ruhijch Foarmaworscht mett Wrenitje enn Schmaundfatt enn too Läpelkost "räd hee Plautdietsch."
Aus hee aune näjentijch mett eemol krank word, fuah hee fuats noh de Mayo-Klienitj, enn doa word ahm jesajcht, hee haud eene schlemme Krankheit, enn hee bruckt fuats een Lieta Bloot. Tjeen Probleem, oba doch een grootet...Moische haud eene gaunz seldne Blottgrupp. Enn dee haude se nijch enn Rochester, uck nijch wiet rundomm. Aulso word daut bekaunt jemoakt. Enn Wienepetj mald sijch uck tjeena mett Moische siene Blootoat.
Daut word aum Sinndach en Steinbach enne Tjoatje bekaunt jemoakt, enn aum Mondach leehte sijch achthundatentwintijch Mensche Bloot aufnehme. Enn wess woa...Joakob (Joap) Hiebat von Burwool, dee sesst mau weinijch haud, dee haud de seldne Blootgrupp. Dee Sonn wea aun dem Dach noch nijch unjajegohne aus Joakob sien, soo aus hee säd, "rooden Sauft" bie Moische enne Odre "tjrieseld enn schäld."
Dree Doag lohta wea Moische een nieea Mensch. Enn veea Doag lohta kaum hee bie Hiebats enn Berwool aun, enn leet doa eenen nieen Cadillac mett eenem "Dankscheen" stohne.
Daut Läwe rannd wada soo wieda.
Twee Joah lohta fong daut Kapietel wada von väare aun. Moische wea krank, seea krank, enn bruckt wada Bloot. Enn Hiebat leeht uck fuats eene Buddel voll stritze. Moische wea wada koasch enn munta enn schetjcht, aus Dank, dem Hiebat eene Koat enn feftijch Dohla.
Sass Joah tridj kaum daut wada väa, enn daut Gaunze wadahold sijch. Ditmol trjeajch Hiebat von Moische Gerstein eene Dankeskoat enn wieda nuscht. Hiebat wea sesst een bescheidna, deemootja Mensch, oba dit foll ahm doch opp, enn hee phoond Moische, enn fruag woaromm hee soo steil vonne Jnohdeslada jefolle wea.
"Daut's doch gaunz eenfach," meend Moische, "daut mennische Bloot satt sijch bie mie seea derjch."