Etj haud mienem Voda ("vleijcht ess dee em Himmel" word bie sien Bejrafnis von 95% jedocht, von mie uck) vetald, daut aum 12 Febeoa aum Klock dree nohmeddach em Steinbachschen Mennischen Museum daut mol wada noh de mennische Oat drock toogohne saul.
Waut ess, waut saul senne? Doa woat daut latzte enn jratzte Plautdietsche-Weadabuak von Jack Thiesse, aulso von dem jnodefeldschen Peeta Thiesses Hauns, enn sien Swaut Al Reimer, den steinbachschen Reima aulso, auls pienja Biestoaka (aulso field pitcher des Wortes, soo auls em Himmel emma jesajcht woat) jeschräwe, utjestalt.
Joh, enn? froag jie.
Bitte ruhe! De leewa Gott red nijch jieden Dach diretjcht mett enn too ons, aulso well'we ahm doch mol too Wuat kohme lohte, joh?
"Joh!"
Voda vetallt mie vom Himmel, hee haud jistre biem Freehstitjch mett dem grooten Starschie jered, enn ahm jefroagt, auls Hee sijch von sienem busy schedule vleijcht Tiet nehme wudd, enn doabie senne wudd.
"Nuscht wudd mie bäta gohne," haud de groota Oola jesajcht, auls Hee sijch de easchte Piep nohm Freehstitjch aunstetjcht.
See haude donn een Stootje toop jeschmeatjcht, enn doabie eenen Slivovitz jedrunke, enn wiels Voda daut noch emma soo jewant ess, haud hee dem Oolen jefroagt, auls hee soo auls jeweehnlijch oppe Ead, vom Aufrietskalenda eenen Tatjst opp Dietsch nohm Freehstitjchskoffe väalese sull.
"Daut ess nijch meea needijch, Petro, Du best je aul hiea; Du bruckst die nijch meea bie mie enschmeijchle," enn dann haud de Oola jelacht.
"Jeet mie noch eenen gooden Sturack Slivovitz enn, Petro, enn dann woa wie daut mett dem Weadabuak enn Steinbach räajle, joh?
"Joh."
"Soo's aul vesproake," haud de Eppaschte, den sien perseenlijcha Tjreis 'Oola' nanne doaf, wieda simmleat: "Joh, fe wesentlijche Sache nehm etj mie emma jearn Tiet.
"Wiels," haud Voda noh siene Oat mol wada doatweschen jered, "wann Du, Oola, doabie senne woascht, dann kohme uck Arnold Ditjch, Victor Peetasch, enn Al Reima - oba see kohme bloß wann Du uck tjemmst - daut motte de Plautzaunwiesasch verhäa weete, doamett see, aulso de ushers, sijch een bätje bäta auls Haulfsinndagsch auntratje, enn sijch de Schooh jrindlijch witjze.
Voda schreef mie wieda, de leewa Gott haud mett dem gaunzen Kopp "Joh" jeduckat, enn donn haud hee, aulso Voda, dee uck auls de Turtjscha enn de Hunjscha jnodefeldscha Thiesse bekaunt ess, uck aul mol wada aunjefonge too schachere. Soo auls dit: "Oola, etj head saje, daut'et opp Jantsied eenen ernoa bruckboaren Tjeadel jefft, enn dee saul Phlipp Ens mett eenem N heete..." De leewa Gott leeht Voda nijch utrede; Hee fuah doatweschen enn säd: "Joh, daut ess eena von de koasche enn oppjeriemde reinlaundsche Ense, nijch? Wie spälde je äwa Wiehnachte aulewäaje hiea em Himmel sienen CD 'Stimmt an', ess daut dee?
"Daut saul'a senne," sajcht Voda.
"Dem wudd etj jearn en Steinbach, wann etj doa aul sowesoo sie, perseenlijch tjanne leahre; lat sijch daut moake?" fruag de leewa Gott.
"Joh," sajcht Voda, "enn daut woa etj Hauns en Bottwell, leewa Kronsthol jesajcht, vetalle, enn hee kaun dann uck noch een poah wiedre Tjeadels soo auls Wilma Panna, Peeta Klosse, Peeta Wiens, Hauns Jiesbrajcht, enn uck Harry Löwe enlohde, joh? wann diss Löwe uck mau biem Plautdietsch rede zimlijch hintje deit. Oba hee ess sesst gaunz goot too liede, besondasch wann eene enn Betracht nemmt, daut hee een Brooda ess, joh?
"Joh!" sajcht de leewa Gott, "enn wiels daut soo ess, selle de aula mau ruhijch kohme, enn etj woa ahn von bowe bett unje de Betjze voll säjne, enn mett ahn Plautdietsch rede, daut gaunz Steinbach sijch wundre woat, joh?
"Enn noch eent, Oola" haud Voda wada doatweschen jered, "wiels eenje von disse Tjeadels, besondasch de Steinbacha, oppe Ead soo wijchtijch send, wudd daut vleijcht aum Plautz senne, wann eena ahn jleewe lohte wudd, daut see de Ehrenjast send, enn Du, leewa Gott em Himmel, soo meea auls Butendarpa doa oppduckst?"
"Daut sie etj sowesoo jewant."