"Jie Russlenda send relijeesa auls de Kanädja, oba wie Chortietza send tjristlijcha," säd Peeta Brun, eajentlijch Brune Peeta, wiels hee too dee Tiet nijch befriet wea. Daut säd hee tjeene feftien Minute nohdem wie ons tjanne jeleaht haude.
Waut noch von Bediedung wea, daut wie toop, jieda mett een Biel enn mett eene Soag, toop deep em kanaudschen Bosch saute, enn doa fe billjet Jelt Zellholt moake sulle. Oba Oabeit wea too dee Tiet knaup, daut Jeld noch knaupa, aulso waut bleef eenem äwrijch, wann eena ritjch woare wull auls gaunz unje, oppe unjaschte Rung, aulso aum Aunfang auntoofange. Enn enn onsem Faul meend daut Beem aufsoage, daut Weppelenj auftootjletjsche, den Staum Zellholt jeneiw twee Meeta lang auftoomäte, daut Stetjch auftoosoage, enn opptoofliehe. Enn dann jenietsch wada, enn dann noch eenmol, enn dann wada von Väre, dautselwje too wadahohle. Enn emma jicha!
Daut wea noch verre globaule Oppwoaminj, aulso schratjlijch kolt, oba wann eena soo seea oabeide deed auls een Mennist kaun wann hee too Jeld kohme well, dann jintjch daut aulatoop seea schwind, enn feftien Minute lohta wea eenem woam, enn eenem schweet, enn nijch bloos unjre Tung. Enn wann wie aul vom Schweete räde welle, dann noch eent: Eenmol auls de Steinbacha vonne Zeitung fe dee Peeta enn etj schreewe ons beseatje kaume, fruage see auls aule Holthackasch enn onse Grupp, ooda uck Bonsch, sijch eenen rooden Schlipps too de Rebbeoabeit ombunge? Wann eenem bie de schwoare Oabeit em Bosch de Tung bett aum Pojas ruthenjt, jleewe de bigschotsche Fulpelze ut Steinbach, eeena haft eenen rooden Schlipps ommen Hauls, uck aum Woatjeldach!
Wie weare weens feftien Maun, daut heet feftien plautdietsche Menniste em Bosch, oba Brune Peeta enn etj haude ons irjendswoo jefunge, enn bleewe toop. Enn wie vestunde too oabeide, joh, wann wie zemorjess em Bosch aunkaume, enn loosläde, daut de Schnodda Fiea foot, dann betjchte sijch jrodentoo de Beem em grooten Bosch, wiels see wisste, daut wie ahn seea boold de Tjapp bie de Dutz aufhacke wudde.
Daut Läwe auls Lumberjacks, auls Holtfella aulso, wea seea jesund, enn wie weare aul verhäa schratjlijch stoatjch, oba nu word wie noch stoatja. Auflentjung gauf'et tjeene, wie oabeide bloos, aute goot enn väl, vetalde ons zeowentz väl enn goot, spälde Schach, enn jinje schlope. Enn aum näjchsten Morje jintjch daut wada kratjcht soo wieda, von Väare loos!
Tjeene dartijch Meeta von onse Holtstaumkoht lach een langa, ditjcha Boom, enn dis Boom wea onse Setjreet. Woo sijch daut aufspäld, tjenn jie junt dentjche, etj weens woa junt nuscht wiedret vetalle, buta daut dee Schnee deep enn weatjch wea. Daut Toilettepapiea wea too dee Tiet noch nijch mood, Komstbläda gauf'et tjeene, enn vewant wea wie kratjcht soo seea auls de Menniste enn Kazakhstan, ooda de Mensche unjrem Kommunismus, aulso goanijch.
Joahre lohta auls etj, enn jieda dentjenda Mensch enword, woo schratjlijch vekohme de Menschheit ess, enn besondasch de Amerikauna, oba uck de rachullje mennische Tjriste enn Nuadkildoona, dee fief bett acht "Bodstowe" aka Rummelkohmasch enn jiedrem Hus haude, enn noch habe, enn eene strauma auls de aundre, enn daut oba Osama bin Laden kratjcht soo auls wie sijch eenen jefollenen Boom utsocht, enn doabie oba jletjelja wea auls Haulfhollywood ooda de gaunze Pritchard Farms enn Winnipeg toop, enn von sienem Boomthroon ut de haulwe Welt dommleat, dann foll mie bie, woo weinijch een Tjenstla ooda uck een ajchta Tjrist eajentlijch bruckt, omm jletjlijch too senne. Joh, enn dann bang etj mie noh de Tiet mett Brune Peeta, enn woo wie toop oppem Boom saute enn ons äwre Eewijchtjeit vetalde. Doabie schmustat Peeta emma soo weetend, schmustad doabie emma soo weetend...
Wea oppe Rennlijchtjeit bedocht wea, trock sijch de Bowazube bute auf, ooda ut, enn reef sijch zemorjes mett Schnee den Schlop ute Uage, enn de domme Jedanke ute Seel.
Zeowentz soo's aul jesajcht, späld wie Schach, ooda Daumbratt, ooda wie vetalde ons äwa Tjoatjesache, ooda sogoa äwre Frulied. Han enn wada word wie ons uck doll, oba wann daut too lud word, säd Brune Peeta bloos: "Jungess, daut reatjcht aul too!" Dann word daut ruhijch, enn wann nijch, pust Peeta de Laump ut, enn säd bloos: "Enn nu goht schlope, enn vejät fuats aule Dommheite, enn woat wiedahans nijch lud, wiels daut oajat dem leewen Gott; enn mie uck een bätje." Donn späld Peeta siene Fiddel, jeweehnlijch Brahms Wäjeleed, enn donn kreiweld hee sijch hinjre Luck von siene lange Unjabetjze enn dann "Goode Nacht!"
Brune Peeta wea opp siene Oat Bauss, oba nijch bloos em Bosch. Hee wisst daut, daut siene Roll soo wea, enn maunjchmol säd hee sogoa: "Daut Baussenne ess nijch emma leijcht; eena haft kratjcht dee Probleeme hiea opp Ead auls de himmlischa Voda doa bowe," ess wees mett sienen aufjetjlamden Paussoppfinja nohm Himmel." Enn donn: "Doawäjen vestoh etj de Bibel soo goot, wiels Gott enn etj habe soo eensjefäah de selwje Probleeme, meenst nijch uck, Hauns?" Etj säd: "Joh!" "Haud etj mie soo jedocht!"
Dann word de Owe noch eenmol voll jefliet, aunjelajcht aulso, enn donn word jeschlope. Doabie schnoatjchte eensje von ons meede Holthackasch soo lud, daut tjeen Wolf, enn nijch eenmol een Boa sijch lang bie ons bute ophild. Besondasch Boare, dee tjande äah Frindschauft dann doch aulnoch goot. Reimasch Tjnals schnoatjcht soo lud, daut de Amerikauna äwre Jrenz von Middelbro onsem Bauss Gordon Plovey fruage, auls Reima den Wind biem rutpuste nijch een bät bäta vedeele kunn. Daut amerikaunsche Darp lach soo ruhm tien Miel hinjre Jrenz auf.
Soo auls daut dann soo ess: daut died je dann uck nijch lang bett sogoa frädfoatje Menniste sijch zeowentz fohte deede, enn aunfonge too rautze. Mol seehne, wea hiea de stoatjchsta ess, wea dochwoll daut Motto.
Etj wudd disse Jeschijcht uck goa nijch wieda vetalle, wann etj nijch seea boold de bowaschte Hohn oppe hejchste Floak jewast wea. (Daut wea toom Jletjch enn dee Tiet auls'et Wilma Panna noch nijch gauf!) Joh, daut wea etj, enn etj haud je dann uck boold jieden Owend Brune Peeta enn miene Atj biem Rautze. Hee gauf mie Roht, enn holp uck dentjche, enn säd doabie: "Oba fair biem Faite mott Jie Jungess senne, buta wann'ett seea dropaun tjemmt, dann tjenn jie uck een bätje äwre Fairness-Sälestrenj klunje. Oba fair senne ess auljemeen doch ernoa wijchtijch, wann uck sogoa de leewa Gott biem Faite nijch emma fair ess ooda wea, wiels wann Hee gaunz fair wea, wudd Dietschlaund den latzten Tjrijch jewonne habe."
Etj jleew, daut wea noch den selwjen Owend auls Boare Reimasch Tjnals sijch mett mie rautze wull, enn dann uck fuats sijch hantjrieseld, enn mie mett siene schratjlijch stoatje, korte Oarms omme Been foot, enn mie nijch loos leit. Auls etj nijch loos kaum, enn aul docht, auls etj noch mol wada, ooda uck nijch, ut Reima sienen Schruwstock kohme wudd, säd Peeta: "Du Hauns, puaks dem Tjnals mett Diene lenjste Finjasch von jieda Haud enn siene jriese Uahre, enn schuw, waut Du kaunst. Enn schuw weens veea Zoll von jieda Sied, enn dann woare sijch Diene Finjasch biem Obraum em Kopp, enne Medd traffe, enn dann wridjle een bät, daut ahm daut tjitelt, enn dann woat hee die looslohte."
Enn kratjcht soo word daut, Reimasch Tjnals leet mie loos, enn von donn aun, kaum ahm uck biem Paparossieschmeatje de Ruak ute Uahre rut.
Etj wea Champion jebläwe, enn auls Peeta daut sach, kaum hee opp eenen grooten Jedanke. Soo auls dit: Daut Brune Peete een seea Oppjewajchta wea, daut tjenn jie junt väastalle, enn daut de Brune aul emma opp meea Zylindasch tuckade auls de measchte von äahre Nohbasch, wisst een jiedra.
Oba waut haft daut too saje? Gaunz eenfach: Diss Peeta wisst aul donn, waut wie aundre dree aulso, Kauspasch Henritjch, een vertraflijch kluaka Tjeadel mett een seea dachet Lijcht em Kopp, enn Schallenboajs Hauns, de tjleatja wea auls de measchte Schopsbatj, enn etj ons eascht lohta tjanne leahde, enn ennworde, daut Paul Bunyan ut Bemidji, von onse Oabeidsstäd, tjeene hundat Miel auf wohnd. Enn Peeta haud zimlijch jeneiwe Väastallunge, woor'et dissen Paul Bunyan sach. "Hee wea auls utjewossna Mensch soo meea soo groot auls de himmlischa Voda daut mett sastien Joah wea. Enn em Stoatjsenne uck doanoh."
"Enn wann Du, Hauns, soo wiedamoakst em Rautze, enn mett dem Rassle, enn met dem Fohte, dann foah wie noch dissen Winta doahan, enn dann kaunst Du Die mett dem Scherwaunda fohte, enn wann daut aulatoop soo utfelt auls etj mie daut väastall, dann kohm wie boold too eenem gooden Stopsel Fupptjejeld. Wesst?"
"Woaromm nijch?" säd etj, "enn de Fait enn de Fupp voll Selwajeld oba uck een poah Dohlasch stuak sien Kopp aul äwrem Horizont väah."
Waut deit een Mensch, wann hee sijch fe eenen Fait mett eenem grooten Onbekaunten reed moake mott? David em Oolen Testament nauhm eene Rehatka, oba daut wea lang tridj, enn wea een Jud, enn waut sijch doa aules enn emma aufspäld? Wea weet daut? Enn waut kaun eena von dem, waut eena weet, äwahaupt (Peeta, doa emm Bosch, säd emma äwaheipt) Enn besondasch wann hee ooda jana, ooda dee, oba en dissem Faul etj nuscht nijch von dem grooten Onbekaunten wisst? Enn wann, bloos daut de Paul Bunyan noch jrata, enn forscha, enn stoatja wea enn ess auls de Kaumpscha Klosse, dee jratzta Mennist ut onse gaunze Geneologie? Enn dissem Klosse kunn etj nijch froage, wiels dee ess aul feftijch Joah wann nijch sogoa meea opp Jantsied enn rautzt doa mett Goliath enn Simson enn sestjet Toakel.
Peeta haud Roht. Etj sull mie fe den Fait reedmoake, enndem etj mie Gordon Plovey sienen jungen Kunta Tarzan väanauhm, enn dissem jieden Dach opphäwe deed, enn dem een Stetjstje rommdruag. Daut deed etj. Daut Kuntafalm wuach vleijcht veeahundat Pund, oba boold schullad etj dem opp, enn druag dem Plästa doa oppem Holtwajch zemorjess enn zeowentz kortz spezeare. Wiels eena bie de Woahrheit bliewe saul, jäw etj too, daut etj den Tarzan niemols wieda auls dartijch Meeta opp mienem Ridje Huppanack druag. Oba ahm jintjch daut aulnoch goot. Enn mie? Daut foll mie de easchte Wäatj schwoa, oba dann haud etj daut rut. Woamett etj nijch jerätjend haud, wea, daut Tarzan jieden Dach soo omme fief Pund toonauhm, enn noh eenem Moonat haud etj doawäjen daut Droage noch emma nijch leijchta. Uck worde miene Been jieden Dach een bätje tjarta, kaum mie daut väa; oba gaunz eendoont: wann eena toom Ruhm enn too Jeld kohme well, mott eena Opfa brinje, daut weete sogoa de Reiseprädjasch, weens soo woat vetalt.
Jenuag...auls wie aum 23. Moaz aune 1949 mol wada ons Loohn aum Friedach nohmeddach utjetohlt tjreaje, säd Peeta: "Nu ess'et soowiet. De Uträd jelle nijch meea, enn wea mett well, dee tjemmt tiedijch morje zemorjess mett. Wie foahre noh Bemidji, enn woare doa mol seehne auls de Paul Bunyan mau soo meea een russlendschet Grootmul ess, dee uck mol wada von eenem grooten Kuta ute Mololsch tjemmt, enn hiea sijch oba fuats emma seea schobbt, enn sijch Uträd utdentjcht, wann de stoatjsta Tjeadel tweschen Amerikau enn Jrienthol, soo auls mien Rassla Thiesses Haus, opp ahm tootjemmt enn ahm unjanehme well." "Mol seehne," säd Peeta, "auls Bonyans Peiwel Tus ess, ooda, wann ahm aul waut ohnt, hee sijch unjrem Bad vestoake helt."
Wie weare unjawäjess. Tjeene fief Miel von onse Boschkoht auf, kaum ons een amerikaunscha Trock opptoo, enn wie musste aulatoop rut nohdem Peeta siene Furd Koa eenfach rajsch emm Bosch nenna fuah. De Trock fuah vebie, enn wie steaje rut, enn druage den Furd sondasorj wada tridj oppen Wajch nopp. "Etj hop," säd Peeta, "dee Tjeadels em Trock tjanne den Bonyans Peiwel, wiels wann se ahm daut vetalle, wooväl Wind de Menniste enne Meiwe habe, woat dem groota Witjchza vleijcht aunfange too schweete, enn Hauns kaun ahm dann leijchta schmiete."
Unjawäjess vetald Peeta noch pienijch, woo hee sijch den Rassling-Match väastald, enn woo hee daut gaunze organiseare wudd, enn woo hee doaropp bestohne wudd, Raferie too senne. Enn woo hee aum Engang vonne Rautsstow daut Jeld kollatjchte wudd; "seea soo's bie ons Tus enn Weidefeld enne Chortietsche Tjoatj" meend hee. Ess junt Jungess daut soo goot?" fruag hee. "Joh!"
"Enn dann wann wie wada noh Hus foahre, woa etj daut groote Jeld soo meea noh mienem Gootdentje vedeele; ess uck daut junt Tjeadels goot?" "Joh."
Wie kaume kortz nohmeddach enn Bemidji aun, enn Peeta säd, wie wulle ons eascht mol rommtjitje, enn dann uck daut rommvetalle enn bekauntmoake, waut vondoag, aulso aum Sinndachnohmeddach en ährem Hockeyarena tweschen easchtem Period enn den tweeden "een Kanädja jäjen ähren stoatjsten Jung Paul Bonyan rassle wudd," enn "ess junt daut goot, wann eena von ons junen ruchen, hunjschen Onnoosel mol de Stars enn Straips utsteewe woat?"
De Mensche wundade sijch, säde oba: "Woaromm nijch?"
Oba, soo's de Dietsche saje, eena saul de Rätjnung nijch ohne den Weat moake. Daut heet gaunz praktisch, daut wie ons eascht mol rommtjitje musste, woa Bonyans Peiwel wohnd, enn auls hee äwahaupt Lost haud, sijch de Betjze utsteewe toolohte.
Wie funge noh kortet Seatje Paul Bunyan enn uck sienen grooten Oss, dee Babe heet, enn dem ut jieda Näsloch eene tjliene Woltjch Daump rutschoot. Oba, mein Zeit, soo's Funke Auna emma säd, wann see Donna Watta! meend, waut wea hiea oba bloos enn aule Welt pesseat?
Wann de Mensche mie vetald haude, waut wie nu seehne enn erläwe sulle, haud etj mie äwa de Flunkarie jeoajat, oba waut de Mensch heat, enn sitt, enn ritjcht...doaropp ess Veloht, sajcht de Weetenschauft aul emma. Aulso, waut wea? Paul haud dochwoll den Staul vom Babe utjemest, enn irjendwaut wea pesseat. De Babe haud Paul oppe Heahna jenohme, enn jintjch mett ahm oppem Mesthupe romm, dee emmahan goot väatijch Schooh huach wea. Wiels? Joh, wiels, enn dit doaw wie nijch vejäte: hiea biem Paul Bunyan word je aules noh eene gaunz aundre Moht jemäte. Toom Biespell, wea Paul Bunyan sien Biel soo groot enn schwoa auls Goliath siene Schweat, enn siene Schooh weare noch twee Saiz jrata auls dem Kaumpschen Klosse siene, enn dem siene Schooh ut oole Reife jeschustat, maute Saiz achttien.
Oba soo intressaunt daut uck aules wea enn ess, daut jintj nu doch omm den Paul Bunyan, dee tweschen Himmel enn Ead biem Babe oppe Heahna jedroagt word, too Help too gohne.
Doa weare uck aul Nohbasch jekohme, dee noh de amerikaunsche Oat berohtschluage, waut nu aules too moake wea. "Vleijcht mett eene Kanoon raufscheete?" Eena säd: "Looks like Neighbor Paul is between a rock and a hard place" woohnt ons Baus Peeta fuats soo äwasad: "Hee sajcht, dee Peiwel ess soo een bät tweschen eene Groow enn den Mesthupe." Oba daut wisst wie je doch selwst. Nu jintjch daut doaromm, Help too besorje, enn daut sogoa seea jicha. Wie weare soo iewrijch dem Paul vonne Osseheahna too halpe, daut wie sogoa vom grooten Fait een tjlien bestje vejäte haude. Weens soo meend etj, wann uck miene Chance aunfonge bäta too lohte, je lenja Paul doa dijcht biem Himmel haulf doot frooah, enn hopentlijch uck morschijch Schizz tjreajch, enn schluddaje Unjabeen tjriee wudd!
Mett eenmol säd Peeta, hee kunn sijch noch ut Paraguay dentjche, daut wann een Oss nijch soo wull auls de Mensche wulle, dann musst eena soohnen Plästa mett eene onjeheire Äwarauschung kohme, enn dann muak soohn Oss emma eene domme Frautz, enn word jehorsam. "Mol seehne," meend Peeta, enn donn, gaunz Biznizz, gauf Peeta Ordasch: "Paul, daut woat Die vleijcht nijch billijch kohme, oba fe fetijch Dohla In God we Trust, woa etj Die von Babe sienen feften Stock raufhohle; waut meenst?" "Joh, jearn," kaum vom Himmel Auntwuat. "Bizniss ess emmahan Bizniss" tjreaj wie too heare, uck aum Sinndachnohmeddach doa enne Stäts.
Peeta haud je aul lang tridj een Lasso jeholt, enn den schmeet hee nu sondasorj dem Oss Babe äwre Heahna, enn kroop uck fuats nopp; klautad soo's ne Op dem Lassostrang nopp, word von ons jeholpe, enn jeschowe, enn Peeta wea uck boold bowe aunjekohme. Eascht hilt Peeta mett dem Peiwel doa bowe oppe Heahna pienijch Unjaräd; mie wudd daut nuscht nijch wundre, wann Peeta sijch aul eene tjliene Auntohlinj haud jäwe lohte, eea hee sien Jletjch mett de groote Äwarauschung utproowd.
Waut nu? Sogoa Boare Reimasch Tjnals stund seea aundajchtijch doa oppem Mesthupe, dreid siene Wintaschlubb drall, enn meend, "de Tjoatj wea doch emma too wiet auf, wann eena dee brucke kunn." Wie aundre weare bloos noch schmock enn tjitjte too, waut Peeta doa bowe woll aunstalle wudd. Mett eenmol head wie wiet enn breet opp Plautdietsch: "Babe, wann Du Dienem Bauss, dem Peiwel nijch fuats oppe Städ rauf latzt, woa etj noch vondoag Die unja dienem Zoagel een Fiea satte, daut Die Heare enn Seehne vegohne woat; hast Du daut vestohne, Du grootet Diewelstjind?"
Dee Sproak wea dem Babe dann doch soo nie, enn soo framd, daut hee, wertjlijch woah, seea domme Frautze reet, den Kopp schliesad, enn Paul heistakopp emm Osseschiet too lidje kaum.
Peeta kaum ahm hinjeraun, enn leet mie kohme, enn nu word dee Fait berät. Jenuag: Paul Bunyan wull nijch meea faite, hee säd, hee haud sowesoo tjeen Chance meea, enn etj haud "by Default" jewonne, wann etj uck donn tjeene Ohninj haud, waut daut bedied.
Jenuag: dee groota Fait word oppjeschowe, Peeta tjreajch soo meea aules waut hee von Paul aun Jeld wull, dem Oss gauf Peeta eent mette Burrsteewel aum Bless, daut dissem de Schnodda ute Uage fluag enn ute Näs stritzt, enn wie fuahre tridj noh Hus. Enn de gaunze Tiet äwa schmustad enn frinteld Peeta von eenem Ooah bett daut aundre, dann rund ommen Kopp enn dann noch eenmol vom aundren Ooah noh daut rajchte.
Noch aun dem Owend schreewe Peeta enn etj fe de Carillon News enn fe de Steinbach Post onse Artitjel mett dem Schlusswuat: "And a good time was had by all!"