Hiea send dee easchte twee Kapitel von Dien vetraflijchet Buak. I have no particular reason for having translated then aside from it being a labour of love, but otherwise I suppose I felt that same and strange compulsion of being drawn to the attraction of something beautiful, compelling and strange...like a first date.
It was well worth it because from pages 43 to 58 the reader witnesses something very rare, if not unique, namely for the first time in Canadian literature a thought in Low German, Plautdietsch, is bandied about among you and your two sisters in the make-shift tent suddenly comes into contact with the Divine Spark and a Little Bang ensues and the Thought before our eyes and mind becomes the Word and then the Deed. The creation of Life, the metamorphosis of Es werde Licht! and all on par with the Immaculate Conception. This scene is obviously the micro-cosmos of the macro-cosmos which the Divine Three in their day decided or chanced upon in their Allmacht to do what they did and which then led to:
Die Himmel erzählen die Ehre Gottes,
Und die Feste seiner Händewerk for all time.
There is no finer tribute to a dialect, the mother of all languages than the one you have erected via the word. "Stallgeruch hat diese Sprache" says Günter Grass of our Muttasproak and you have tuned our every sense to that epitaph like none other.
I am sending these chapters to the Plautdietsche FRIND for all the obvious reasons, to Al Reimer with whom I have had conversations over half a lifetime, the tone and tenor of which you speak and of which you write. Also, I am sending a copy to John Considine, your colleague and a classical Wunderkind: I hope he will encourage every colleague in all Albertan universities to submit your name and works for the ultimate honour in literature. I would very much like to submit your name to a Mennonite Central Authority, a version of the Vatican but we have none such. The only Mennonite office of common effort to date is dissension.
I wish you the success which this marvelous book "Of this Earth" truly deserves.
Cordially, aulso von Hoaten,
Jack
P. S.
Phonological rules state that Noagel, Hoagel and Zoagel become Hagel, Nagel and Zagel (nail, hail and tail although without a less explicit diphthong), but somewhere between O.H.G. and M.H.G. the Zagel dropped off, I mean disappeared. I have something to say about this fascinating handful under piesacke in the dictionary.
The stone paintings which you describe under WRATH also appeared in our home area with the advent of the Bergthaler from Jantsied. These were invariably biblical inscriptions and appeared, mysteriously, overnight. They were meant to scare and did. Today I would describe them and the artists as what they were and, in part, still are: schwiensdrieste enn proste Schietstrempe.
N. B.
I am not intentionally taking any liberties with your work, Rudy, but I very much hope that the powers that be will someday, preferably soon, negotiate an agreement with you so that a hundred thousand barely literate Mennonites will have a book to read of which they and God are proud of.
"Nu ess et Tiet," säd miene Mutta enn ons Ruschet-Mennonietischet-Plautdietsch, woohnt onse Famielje emma toop räd. Nu esss'et Tiet. Enn dann stund mien Voda opp omm sijch siene boafte Feet enne Footkoddre too wetjle enn dann sijch siene Burrsteewle mett Galosche doaräwa toostreepe, enn donn nauhm hee sien ditjchen Burnuss enn siene Winta Pelzmets vonne Hoakes hinjre Däah enn dann jintjch hee toop mett de Nohbasch, dee wie besochte, rut. Dann leide see Prince enn Jerry utem Staul and spaunde dee verrem Schläde, enn dann fuah wie biem Takt vonne Säletjlinjasch noh Hus; enn soo auls jeweehnlijch enne bleiwe Dunkelheit enn unjre Datje enn stiewjefroarne Rindsladasch emm Schlädebax.
Wie fuahre tweschen Wintapaple, dann tweschen ohpne Fletja, groote schwoate Wenj von Fijchtebeem; de Pead feehlde den Wajch, den see selwst verhäa em Schnee jeklunjt haude, enn soo een bät auls den schmaulen Stijch vom Himmel bowa ons; den dachen Himmel mett Lijcht besprentjelt enn nu jintjch'et noh Hus; oba maunjchmol, enn platzlijch flaumd dee opp soo auls eene explodearende Sonn; een Räjen von Fiea enn Angst bett'et aulatoop enn Walle wajchschwamt enn Räjenboages woat: doa, wohnt Gott enn soohnem Lijcht eewijchlijch enn soo wiet, wiet auf, daut etj vleijcht niemols nijch doahan kohme woa, doa hinjre Stearns. Oba miene Mutta, dee woat onbedinjcht doahan kohme, enn uck, vleijcht mien Voda..
See sinje. Mien Voda sien Lieblingsleed, woohnt see mettjenohme habe von äahre mennische Darpa Tus oppe ukrainische Stappe enn uck Russlaund, omm daut dann wiedahan hiea enne nuadlijche Weela von Saskatchewan too sinje.
Hiea opp Eade sie etj een Pilja;
Enn mien Piljre, enn mien Piljre
dieat nijch lang...
Enn dee tjristalne Kold fädeld miene Mutta äah Sopran derjch dee huage Noote soo's bie "Pi-il-ja" enn mien Voda sien Tenor soo auls Wind derjche Bläda vonne Somma Zettapaple. Miene elste Sesta, Tina ess befriet enn mien elsta Brooda Obraum, ess enne Bibelschool; see send nijch hiea enn Dohn steiht hinje emm ohpnen Schlädebax, lang enn stell; oba wie veea jinjere Jeschwista somme enn onse välschijchtje Tjleedie unjre Datjche, enn besondasch Mariejche, wiels see aul ähre Altostemm tweschen Ma enn Pa ähre Stemme hanennhäa derjchwäwe kaun; enn soo habe see aul eene dreestemmje Harmonie, enn wann Dohn mol bloos sien Mul ohpmoake wudd, soo auls Mariejche ahm foaken jenuag sajcht, dann wudd wie ein Famieljequartet habe, wann uck Leena enn etj noch too tjlien send auls buta de Melodie noch nuscht nijch wiedret too sinje.
Wie foahre noh Hus derjch den Nuadwoold, dee sijch ons omme Schulre von Nuadamerikau soo auls eene groote Toodatj ennwetjelt; enn dee aufjeläjne Städe, woa mien perseenlijchet Läwe aunfong. Eene rein physische Städ em wastlijchen Kanada, enn nijch schwoa too finje: nuade von North Battleford haulfwäajess noh Meadow Lake, waste von Huagwajch Numma 4 woa dee offizielle Laundkoat vonne Saskatchewansche Huagwäj gaunz ladijch ess buta eenje bleewe Ries, die doa aunfange enn dann enn aule Rejchtunge ranne; nijch eenen Nohme von eene Aunsiedlung nuade von Glaslyn, näjentijch Kilomeeta wiet enjedroagt; enn dem Ruhm enne Atjch von Turtle- enn Stony- enn Midnight Lakes. Dee Grund von dem waut etj wea, ooda senne wudd; Wartel enn Jeist.
Doa, eea etj irjendeene Sproak räde kunn, head etj Psalm 90, een Jebäd von Moses, lud väajeläst, enn Tus enn enne Tjoatjch utwendijch väajedroagt.
Harr Gott, Du best onse Schulinj emma enn emma wada...
Eea de Boaj weare, ooda eea Du de Ead aunjelajcht haudst,
vom Aunfong bett dem Enj best Du Gott.
Aul onse Doag veschwinje unjrem Schaute von Dienem Zorn,
Onse Joahre kohme too Enj soo auls een Seifza.
De Joahre von onsem Läwe send een Schock enn tien,
ooda, wann eena stoatjch jenuag ess, een Schock enn twintijch,
Enn de gaunze Tiet ess'et bloos Oabeit enn Kumma,
Enn dann woare se aufjeschnäde, enn wie fleaje wajch.
Een Schock enn tien Joah tridj fong mien Läwe opp disse steenaje, Gletscha utjeholtjade Ead vom wastlijchen Kanada aun. Zäwentijch Joah Schulinj, unjrem Schaute vom Zorn. Auls miene Mutta säd: "Nu ess'et Tiet."
-Aun Bord de MS Dnieper Princess
Oppem Schwoaten Mäa, aum 4 Oktooba, 2004.
-
Een Wotaboage stritzt vom Stohltjätel. Dee daumpt jäjen dee Dunkelheit unjre Bähndräjasch soo auls eene Kurv Lijcht. Enn dann een Schrie. Miene Sesta Lis-see ess fief Joah oolt, ooda sass- steajch too haustijch enne Famieljebodwaun kratjcht auls Leena, näjen Joah oolt, aunfong daut koakendjet Wota enn daut leiwoame, een bät jrintjche Wota too jeete, ut dem etj jrods rutjekrope wea. Daut koakendjet Wota troff Lis aum Been, enn doawäjen schreajch see, enn mett een Jeschrejch leet Lena den Stohltjätel oppe Flooa faule, enn daut Wota schoot rut, enn goot äwa dee onjlitjche Flooabräda; dee Tjäteldatjzel kullad wajch, enn etj fong uck aun too schriee.
Onse Mutta wea enn eene Sekund doajewast. Tjätels mett lange Piepe send eene jefährlijche Jeschijcht enn onse Famielje; sogoa auls Baby wisst etj, woo enn Russlaund mien elsta Brooda Obraum, auls hee sass Joah oolt wea, von bute nennjerannd kaum, enn onvestendlijcha Wies tjreajch hee dee Piep vom Tjätel oppem Head too hoole, omm een bätje too drintjche, oba daut Wota koakt, enn hee vebräjd sijch doabie de Tung enn sien Hauls soo oajch, daut hee meist doaraun storf. Stohltjätels stunde opp jieden Tjätjeheat, auls enn Russlaund ooda en Kanada, enn foaken koakde dee enn weare jefährlijch, oba see weare soo needijch auls daut stendje Fiea em Ross.
Dit mott opp onse CPR Heimstäd pessead senne eea etj dree wea, enn bestemmt em Somma auls wie ons emma aum Sinnowendzeowends bohde, wann wie uck jieden Owend ons de Feet verrem Schlopegohne wosche, wiels dee jries weare wiels wie den gaunzen dachäwa boaft romm rannde. Eascht betjcht etj mie enn dee blajchne Waun, dee wie uck toom Tjleeda wausche bruckte, enn dann bohde sijch miene dree Sestre, je nohm Ella, enn tweschen ahn word heetet Wota toojegohte wiels daut emma schwind auftjeeld wann sijch wada een aundra bohd. Bett opp Mariejche, drettien mett kruse blonde Hoah, dee maunjchmol de Waun aune Jräp toohoohle tjreajch, enn bett de Tjätjeschwal schlappt enn dee Waun, ooda uck Bett jenannt, utgoot; see wudd sijch leewa enn een Kuffel bohde auls sijch enne Schwienarie vonne aundre nennsatte; schwienschet Jucks!
Mien easchta Jedanke: Dee Wotaboage enn dee Plack aun Lis äah tjlienet Beentje, woa see sijch vebräjchd haud; woohnt oba nijch soo schlemm ess auls Obraum sien Hauls, oba waut habe de Bähnspoare doa bie aul dem too seatjche? Woarom wudd wie ons bowe oppem Bähn bie de Schlopstowe bohde? Woa ess Mariejche? Den seea heeten, seea schwoaren Tjätel wudd eena doch mau mett Meaj oppe Ladatrapp mett twee Henj noppschlappe tjenne -von Lena jedroagt, dee emma schaubijch, enn niemols stoatjch wea? Dit haud sullt enn onse Owesied- ausfschossje Tjätjch pesseare, dijcht bie den Holtheat woa Mariejche gaunz eenfach den Tjätel aune Jräp haud dreie kunnt, enn dann vom Ross nehme enn äwre Kaunt enne Bohdwaun jeete.
Oba bie dit Bild, daut easchte kloare Jedajchtnis von mien Läwe, es nuscht nijch fausta enn mien Jedajchtnis enjebeitelt auls dee läja, ohpna Bähn enn dee ohpnaa Rache vonne Bähnedräjasch enn woo wie dree schreaje. Dee Tjindheit blifft bloos daut, waut eena nijch vejäte haft.
-
Dee Dachspoare were in dem Lautehus, woohnt onse Famielje opp onse easchte Heimstäd enn Saskatchewan buhd. Daut Hus stund opp eenem Veadel Laund, woohnt mien Voda aune 1934 von dee Canadian Pacific Railway--dee CPR jehead jieda Section mett eene onjlitje Zohl enn de Jäajend- kofft, endem hee "Tien Dohla fe daut wille Bosch" auntohld.
Noh Gust Fiedler, miene Sessta Tina äah Maun fe äwa zasstijch Joah weare de easchte Mensche, woohne daut Laund roodboa fe de Foarmarie muake gaunz em Nuade von de Jäajend, dee den Speedwell Schooldistrikt jäwe sull, weare siene Cousine John Lobes. Dee Lobe-Fiedler-Dunz Famieljess weare nijch Mennoniete sonda Reichsdietsche uasprinjlijch von Bessarabien (nu Moldavien), die eascht noh Harvey, North Dakota verrem Easchten Welttjrijch trocke.. Oba doa weare see bettaoam enn see wulle bätret Laund enn uck dijchta von ähre emma jratawoarende Famieljes wohne, enn soo trocke een pah Sähns, doamang uck Gust wada nuade noh Kanada, woa Saskatchewan too dee Tiet Heimstäde omsonst aunboohd. Bett aune 1925 haude see daut jefunge, waut see sochte nuade von Glaslyn aum Huagwajch noh Meadow Laake, wastlijch enn nuade oppem Jack Pine School Road: een gaunzet Township Laund fe Heimstäde je-eajnet. Benna de näjchste fief Joah eajende see sijch twalf bett feftien Veadel nuade vonne Jack Pine School aun. Soo auls Gust säd: "Wie weare aula dijcht toop, enn daut Laund kost ons nuscht nijch; bloos Oabeit."
"Oba een grootet Stetjch, nuscht buta Boschwildness?"
"Wie haude nijch Angst verre Oabeit, Laund too roode.! Daut gauf goodet Laund, deepa unje enn Hai-Lemauns and väl Fijchte enn Tjiefabeehm, enn soo stald wie Fiedlers eene Soagmähl opp, enn John Lobe brocht een Daumptjätel mett, enn uck eenen Brätjpluag omm Soode too schniede enn Otto Dunz brocht eene goode Draschmaschien mett. Enn aune '26 enn '27 kaume väl Mennoniete hiehäa, Ennwaundera, enn een jieda wull Laund. Paple kaun eene dohlhacke enn de Wartle utriete."
De Jack Pine School haud aune 1920 de Joe Handley, Enjlenda, enn de Elie Naults, Haulfbrits, Famielje aunjelajcht fe de poah Heimstäda, dee aul oppem Township 52 wohnde, nuadooste von dem flachen Stony Lake, oba nuade von ahn opp Township 53, fonge de Lobe-Fiedler-Dunz Grupp aun auntoosiedle enn de Russlaunds-Mennonietische-Immigraunte ute Sowjetunjoohn kaume hinjeraun. Dee Beveltjerung woss donn schwind enne Depression, wiels Mensche tratjche dee Jäjend väa, woa see deeselwje Sproak- enn Jesallschaufts-Gruppe habe-enn soo haud Kanada daut aul emma jehaut, enn wull daut uck soo, wiels daut gauf Stabilität enn eene goode Entwetjlung-enn uck wiels dee Saskatchewan Rejierung Foarma enn ährem Papelwoold emm Nuade habe wull, enn wajch von dee utjedreajde Prärie em Siede. Aum 1. Aprel aune 1932 schreef Macleans Magazine enn eenem Artijel: "The Trek to Meadow Lake":
Aulmählijch em Fahrjoah fong daut aun, daut de Foarmasch emma meea, enn meea aunfonge nohm Nuade too tratjche, wiels aune 1931 fonge de Missarnte enn de dreaje Tiet oppe Prärie aun, enn daut nauhm too bett'ee de jratzte interne Veltjawaunderung gauf, woohne Kanada jeemols jeseehne haud... eea de Winta ensad haude 10,000 Mensche de Prärie velohte omm eene niee Heimat em Bosch em Nuade too seatje...toom jratzten Deel weare daut Mensche enne Meddeljoahre, dee eenmol vesajcht haude, oba nu noch eenmol äah Jletjch proowde. Huagwajch Numma Veea von Saskatchewan wea de Hauptoda oppe Wajch nohm Nuade.
Enn soo woss Township 53, woa de Speedwell School aune 1930 organisead worde wea, schwind too eene Sackgaus-Aunsiedlung von Laute en Blott veschmäde Hiesa, enn mett Sood bedatjchte Stallinja enn tjliene Fletjcha von Nuadweela omgowe nohm Waste, enn Nuade enn Ooste. Een eensja Stijch leed doa nenna, eenjamohte daut onjebruckte Wajchlaund vonne Rejearung soo jeplohnt, delenjd enn äwre Hewels enn omme Lemauns nuade von de Jack Pine Schoolatj. Auls miene Famielje vonne utjestowne Saskatchewansche Prärie em Mai, 1933 ankaum wea jiedet Veadel Heimstäd den eensjen Wajch delenjd de Jack Pine enn Speedwell Schoole (opp de Koat, S. vii aufjebilt), bett opp Joe Handley sient, vonne Lobe-Fiedlers ooda Mennoniete aunjesiedelt. Voda fung ons "CPR Veadel" soo auls wie too onse 160 Acka säde aum Enj vonne'm Boschstijch aundathaulw Miel wastlijch vom Hauptwajch.
De Nuadwoold trock sijch endloos wastlijch von ons oba wann eena opp "onsem" Laund enn irjend eene Rejchtung jintjch dann rankte de Paple, schwoate Paple, dee Boatjche, Klompess Fijchte äwa eenem, enn hiea enn doa stund dann noch eene Kujelfijcht ooda eene tjliene Lemaun von Wead omgowe mett Fahrjoaschwota fe Pogge enn Midje, doamett see doa sinje kunne.
Eene Veadel Miel em Quadroht von eenjemohte plautet Laund-fe Fletja jeäjent- mett Utnohm von eenem langen Hewel, dee äwa onsen Nohba Louis Ulmer sien wastlijchet Fletj rannd enn dann äwa onse Oostjrenz enn dann enn eenem flachen Somp veschwung. Een Borm dijcht aun eene Lemaun wea emma goot om Tjäj too drentjche: mien Voda enn miene Breeda roode den Pappelhewel enn daut word dann ons Hoff.
--
Soo auls de Thunderchild ooda de Saulteaux Indiauna ons haude saje kunnt, den ähre Väavodasch Tiere jejäjat haude enn wille Bäare enn Wartle enn Papelsauft oppem Laund aul hundate Generatsjoone jesaumelt haude, weare wie Russlaund Mennonietische Wiebe de easchte Mensche seit de Schepfung, dee een Hus ut Holt opp dee Städ buhde; enn vesochte doa vonne Foarmarie een Läwe too moake. Oba dee Cree enn de Saulteaux Mensche weare derjch daut Indiauna-Jesatz Numma Sass isoleat, enn musste opp ährem Reservoat twintijch Miel utenaunda läwe, em Bosch hinja Turtle Lake em Waste enn Midnight Lake em Ooste. Etj weet nijch auls irjendeena von miene Famielje dee jemols jetroffe habe, ooda mett ahn een Wuat jewatjselt habe wann see emm Somma opp dee Rejearungsstratjch, woa Wäj aunjelajcht woare sulle fuahre, ähre Woagess volla Tjinja. Etj weet, etj hab daut niemols nijch jedohne. Etj jreest, oba bloos dee Maun woohna de Pead kutschead weifeld noh mie tridj.
Wie wohnde aum Raund vonne witte Aunsiedlung mett eenem endloosen "ladjen" Bosch, soo kaum ons daut väa, waste von onsem CPR Laund, oba wie habe niemols wille Tiere enne Faule jejräpe ooda dee toom Äte jejäjat. Mien Ellre leehte daut nijch too, daut wie eene Flint em Hus haude, nijch mol eenen .22 Kaliba toom Hose ooda Raubheehna, dee sijch bie ons enne Jeträjdhocke vestuake wann dee Schnee ons em Hoawst erwischt eea Otto Dunz siene Draschmaschien bie ons drasche kaum, enn wie den Howa derjch den Schnee feahre musste fe Koohfooda, enn dann bett dem Fahrjoah wachte musste mett dem Drasche waut von onse Joascht äwrijch jebläwe wea bett dee Winta vebie wea. Een Fahrjoah head wie daut Alex Sahar, een ruscha Heimstäda hinja dee Oant Heinrichs dichtbie Huagwajch Numma 4, veeadusend Hose den Winta jeschohte haud enn daut Fall fe acht bett tien Cent vekofft haud, enn dann daut jefroahrne Hosefleesch siene Schwien oppjefoodat haud, oba Nä, säd ons Pa, we send mennonietische Foarmasch, wie tratjche ons Äte, wie laje Goadess aun mett Jetjätjs enn Fletjcha mett Jeträjd, tratjche Heehna fe Eia enn Fleesch, Schwien fe Fleesch enn Tjäj fe Maltjch enn Schaund. Daut Wille enne Wildnis ess nijch fe ons.
Oba kratjcht eendoohnt, soo auls de Cree enn uck de Saulteaux, aut wie Hejchte, dee em Turtle Lake jejräpe worde wann wie doa emm Somma mett dee Fiedlers Picnics muake; wie tuschte Eia enn Heehna fe jefroahrne Fesch wann Schachasch em Winta han enn wada vebie kaume om too schachere. Enn wie plocke onbedinjt Bleiwbäre enn Saskatoons, enn aute dee mett Schmaund ooda bakte Plautz doavon, ooda wie muake dee enn Jläsa toom Winta enn -wann wie uck nijch vestunde dee too dräje enn dee enn dräjet Fleesch nenntooschlohne ooda Pemmikan soo auls de Cree daut deede too moake om daut Fleesch enn uck de Bäre opptoobewoare. Enn, kratjcht soo auls see, groow wie Senekawartle.
Wie vestunde nijch von dee Medizin too moake, oba Voth ooda Schreeda ähre Stuasch tohlde dartijch Cent daut Pund fe dreaje Senekawartle, säde see, enn eene Company kofft dee von ahn, enn muak doarut Hoostmedizin. Robin Hood Mehl kost too dee Tiet twee Dohla fe hundat Pund Mehl, enn wann wie emm tiedjen Somma jenuag goode Senekawartle funge, kunne Mame, Mariejche enn Lena vleijcht acht Pund enn dree bett veea Doag utgrowe enn dreaje. Daut gauf eene Radnasack voll tjliene Wartle vonne Sonn vekrust, enn Lis enn etj weare noch too tjlien omm too growe, oba etj kunn kratjcht soo goot auls de Grootasch de Stieda finje; dee Bloomtjes weare eene Kullatje witte, tjliene Tjiemsels mang aul daut Jreens, soo auls twee Henj noh bowe sijch reatjend enn mett Bloomtjes opp jieda Finjaspetz. Enn enne Medd dee nijch sejchtboare Wartel: enn je dijchta dee Bloomtjess, de jrata dee Wartel.
Senekawartle wausse aum basten aune feijchte Kaunte von Papelboschtjess, enn auls etj groot jenuag wea dee uttoogrowe, haud Dohn ons Spodemtjess ut eene aunjeschoapte Koahfada aun eene tweenje Spoak von eenem Woageraut mett eenem Bolte aunjeschrowe jemoakt. Etj hab noch emma soohn Spodemtje wenn etj uck noch niemols wada eene Senekawartel wastlijch von Edmonton, woa etj nu romm waunda, jefunge hab. Etj weet, daut etj daut Bloomekulla fuats oppe Städ tjanne wudd, niedlijche witte Bloomtjes enn gaunz dijcht oppe Ead lidje; daut ess een Bild enn mien Jedajchtnis nennjeforwe soo auls daut Jesejcht von miene Mutta, dee sijch betjt, enn ähre breede Finjasch säwde derjch dee Ead, omm jiedet Stetjstje Wartel too finje, woohnt ahr noch eene Haundvoll Mehl tjeepe wudd, omm ähre Famielje too foodre.
#
Ons CPR Hus wea von aufjeschalde Fijchtebeem mett Blott beschmäht jebut. Daut eensje Bild mett daut gaunze Hus doabowe ess eent von wiet auf aufjenohme mett eenem Wintjel vom Siede: een kohla Hoff mett dem Bosch enn eene kruggelje Waund, dee äwa dem Schrohtsdach mett Laute eene Utsejcht haft. Een Maun mett siene Henj oppem Ridje enn een Hoot oppem Kopp steiht aum lintjchen Fensta; oppe rajchte Sied stohne fief Tjinja enn eene Fru mett een Schalduak enne Räaj jäjen eene Owesieddäah; doatweschen oppe Ead utjestratjcht lidje twee Manna oppe Alboages noh de Russlaund-Mennonietische Mood , wann Gruppe-Bilda aufjenohme worde, enn mett eenem witten enn schwoaten Hund verre Feet. Een tweepeadscha Kotta steiht dijcht bie den Wiedetun oppe rajchte Sied noh Väare; enn dissen Kotta bruckt wie seea needijch em Winta, oba etj hab den Hoff em Winta nijch em Dentjch; aules ess jreena Somma.
Dee Maun mette Henj oppem Ridje ess mien Voda. Daut Strieptje Witts vom Hamd aum wiedsten wajch von ahm verre Drohttochdäah sie etj, enn miene Mutta enn äah sinndagschet Schalduak steiht bie mie. Lis ess meist nijch too seehne, mett äah dunklet Tjleet jäjen dee Enjstetja von dee Husdtsm. Daaut jratere Mädtje aun äahre Sied ess Lena, dee väl too tiedijch storf. Ähre Henj haft see aun Leppe toopjefoljcht soo auls em Jebäd.
#
De Ead aum Hus delenjd ess greiw jepackt enn kohl, besondasch bie de Drohtdäah von onse Owesiedtjätjch. Enn etj weet, daut Onkel Foot, Ohmtje Wilhelm Voth, dee Stuamaun, gaunz dijcht bie mie ess. Nohbasch stohne opp onsem Hoffgraus, woohnt aufschossijch nohm Staul lijcht enn nohm Heituhn, enn de kruggelja Dauneboom hinjre Weid; see lache aulatoop, vetalle sijch Jeschijchte, oba Onkel Foot sett oppe Huck enn betjcht sijch enn hee tjitjcht mie aun. Langsom schifft hee siene rajchte Haund enn sien Mul.
Soo väle Mensche von jiedem Ella weare schienboa doa, daut ess dochwoll Sinndach Nohmeddach, Tiet toom spezeare, spezeare gohne. Enn Russlaund läwde de mennonietische Nohbach Sied aun Sied en Foarmdarpa, oba enn Kanada bestemmd daut Dominion Land Jesats, daut Heimstäda oppem Laund, opp dem see wohnde, een Hus bue musste, enn soo wea ons Speedwellasch, doa aufjeschlohte em Bosch, daut Spezeare soo wijchtijch auls Sinndach noh Tjoatjch too gohne. Vleijcht haud etj noch mien sinndagschet wittet Hamd enn miene korte schwoate Betjze aun oba Onkel Foot ess de Medd von onse Vetall. Hee haft een Stua mett aules, waut eena tjeepe welle kunn, enn uck den eensjen Truck, woohna daut enne Speedwell-Jack Pine Jäajend jefft; een jiedra horjcht too, woo hee von eene Städ vetallt, enn disse Städ heet Coaldale. Nohäa woa etj vestohne, daut Coaldale een Darp veea hundat Miel auf ess, enn emm siedlijchen Alberta lijcht , woa väle Mennoniete wohne, enn woar'et emma goode Oabeit em Somma jefft enne Zockabeetefletja, dee sijch bett meist aune Sonn aum Himmel tratjche, enn daut Onkel Foot eene Lohd junge Mensche doahan jenohme haft, too de uck mien Brooda Dohn jeheat, enn daut hee jrods tridjjekohme ess, oba opp vereascht vestoh etj bloos daut Wuat "Coaldale", een Wuat, woohnt etj niemols nijch vejäte woa.
Dit ess eene Städ, woa, soo schient daut weens, eena sijch nijch doot rackere mott, enn Beem roode mott om dann endlijch too eenem tjlienen Fletjch too kohme, Staum noh Staum von een Peadsjespaun rutjeräte, dee mett volla Krauft äah Jewijcht jäjen eene Tjäd schmiete, dee omm den Boomstaum jelajcht ess, enn während see tratjche, hackt eena soo auls aule Donna dee knackende Ankawartle auf. Coaldale, woar'ett tjeene Beem jefft, enn nijch eenmol een Steen enn uck tjeen Somp woohnt eenem soo langsom doot tjwäle kaun emm brunen, stintjenden Wota. Mensche zijchte bloos Zockabeete soo auls oppe Stap enn Russlaund---oba ohne den schratlijchen Kommunismus---enn Wota rannt twechen dee Räaj von Plaunte enn wann eena irjendwanneea well den Growe opmoake, enn een jiedra haft daut Rajcht den Bewotrungsgrowe volla Boajchwota den gaunzen Sommalang optoomoake, enn eene haft jiedet Joah eenen grooten Hupe Boajeld too de Eiwsttiet, Zocka, Zocka, enn nijch soo auls onse eewje Paple, enn tjeena woat jemols Fijchtesoagespohn sijch oppe Howajrett streie brucke! Oba enn Coaldale, daut Zockalaund, wiet auf, ess dee Welt gaunz seet.
Onkel Foot ess tjlanda auls Pa, enn dee ess nijch soo groot auls mnien elsta Brooda Abe, oba breeda enn etj weet, daut mien Brooda Dohn noch jrata ess: Wann Onkel Foot enn Dohn siene Tjleeda nennkrupe wudd, wudd äwre Halft von Dohn noch äwrijch bliewe. Etj weet, daut hee Dohn wajchgenohme haft; Ma sajcht, daut Dohn den gaunzen Somma äwa wajch senne woat. Etj tjitjch enn seeh, woo Onkel Foot Wota utem Schleef von dem Amma, dee opp onsem basten Stoohl em Schaute vonne Owesied steiht, drinjcht. Äwrem Schleefraund bewäje sijch siene Uage, tjitjche derjch mie derjch, tratjche wieda äwa onsem stobbjen Fletjch, jrods jerood, enn boold een Jetjräajdfletj, enn de Steena aul vom Fletjch jeläst enn aul ommen Raund vom Fletjch oppjefliet soo's Wenj.
Etj saj opp Plautdietsch: "Woat Dohn aundasch senne?"
"Na?" Mett eenem Rucks jitt hee daut Wota bie sied mie ut enn etj feel daut Spretze, enn dann hoakt hee den Schleef wada tridj aum Raund vom Amma. Mett eenmol tjitjcht hee noh mie rauf, auls wann etj von jistre sie.
"Aundasch," saj etj, "wann hee noh Hus tjemmt...Ahn sitt'et nijch aundasch."
"Du tjliena Tjnirps," sajcht hee too mie. Enn dann betjcht hee sijch wiet rauf bett oppe Hacke soo dijcht bie mie, daut etj den greiwen Stobbel von siene Wonse seehne kaun. "Kaunst Du dit doohne?"
Enn dann schift hee siene Henj, aule fief Finjasch enn sien opnet Mul. Enn dann langsom tratjcht hee daut Bennaschte von sien Jesejcht noh bute. Tähne enn roosanet Fleesch, eascht daut bowaschte, dann daut unjaschte. Siene breede Finjasch hoole aul daut unja miene Näs.
Hee sajcht: "Kaunst du daut doohne?"
Sien Jesejcht ess gaunz enjefolle, siene Weada zische. Gaunz vegrult, kaun etj bloos schriee. Miene Mame tjemmt uck fuats; de Lied vom gaunzen Hof tjitjche noh mie enn etj vesteatj mien Jesejcht jäjen ähre Schoot. See scheddad mie; äahre groote Henj tjriee mie aum Kopp enn aune Schulre toohoohle enn see scheddat mie.
"Sie stell, stell! Waut's mett Die loos?"
See mott mie wajch schuwe, enn miene beid Henj mie vom Jesejcht tratjche eea etj opphäa to hiele, enn sie mie vestohne kaun.
"Woarom kaun etj daut nijch doohne? Waut ess mett mien Mul moos?"
Hinja mie lacht Onkel Foot. Ma tjitjcht ahm aun, enn rund omm ons lache onse Nohbasch enn langsom fangt uck see aun een bätje too lache.
Etj froag: "Woarom kaun etj mien Mul nijch rutnehme?"
Wann miene Ma frintelt send ähjre Tähne nijch soo schmock rund auls dee enn Onkel Foot siene Haund. See haft measchtens mau brune Stobbes, meist greiw mett Lajcha; see schnitt äah Fleesch enn seea tjliene Bietatjess enn wann see keiwt, hab etj jeseehne, daut see äah Äte measchtens väare em Mul helt, enn wann daut wiede noh hinja enn ährem Mul tjemmt, dann vetratjcht see emma äah Jesejcht. Miene earnste enn leewe Mutta haft emma soohne groote Angst fe de Sind fe ähre Tjinja, helt ähre Oarms woam enn faust omm mie, enn see haft schratjelje Weehdoag wann see at, wann see uck nucht nijch sajcht. Maunchmol sajcht see: "Nu mott etj wada beize!", oba etj weet goanijch waut beize meent; mett mie haft see daut noch niemols jedohne, oba etj seeh, woo see een Stetjstje Solt nemmt enn daut opp eene bestemmde Städ enn ährem Mul lajcht enn etj weet oba nijch, daut see daut Solt jäjen eenen vefuhlden Stobbe em Mul dretjcht enn doamett veseatjcht ähre eewje Weehdoag too lindre; etj seeh bloos woo dee Weehdog derjch ähre Henj enn Walle jeiht wann see sijch doabie den Kopp fausthelt. Maunjchmol bruckt see sogoa een Lunz woohnt see verhäa enn Kerosien jeduckt haft. Dit ess Jeft, sajcht see mie, daut saulst Du niemols nijch utproowe! oba see helt daut enn ährem Mul mett äah Finja bett ahr de Trohne äwre Backe ranne enn dann spijcht see daut ut, enn dann wauscht see sijch daut Mul mett Wota vom Amma ut enn spijcht daut aulatoop ut: beize ess too schratjlijch omm doanoh too froage, ooda toom ertjläre. Daut bediet soowaut auls dootmoake.
Etj saj ahr, vestendlijchawies, "Etj well uck soohne. Coaldälsche Tähne."
Hinja mie sajcht Onkel Foot stelltjess, "Nä, nä, Du hast aul daut Jletjch. Enn Kanada jebure, dee jinjsta; dee woascht du niemols nijch brucke."
#
Eea see noh Hus foahre omm too besorje, woare onse Sinndachsjast noch Vaspa mett ons äte-de mennonietische Moohd sijch aum lohten Nohmdeddach too vebiete, woohnt, Onkel Foot ons vetald, de feine Enjlenda uck doohne, wann see doafäa uck eenen aundren Nohme habe.-ommzajcht ommen Tjätjedesch too sette, woa dee Drohtdäah weens een bätje Schutz jäjen de Sommamidje beede deit. Tweeback äte enn Pripps, jereeschte Joascht soo auls Koffe jekoakt toom drintjche mett Reboabastenjels too eene Läpelkostmoos jekoakt, dee easchte Plaunt emm Fahrjoah, dee eenem de Wintafuhlniss utem Mul vedrifft, oba mett eenem Läpel Zocka rundvoll bestreit, ooda vleijcht sogoa twee Läpelvoll-"Benjeltje! Dauts jenuag!" Du tjliena Donna, daut's jenuag! enn mett eenem Plinz äwre Kopp weifle, sootoosaje,- mett een ditjchet Schulps ditjchen Schmaund doatoo, doavon kunn eena eenfach nijch jenuag tjriee.
Enn Tweeback toom Vaspa, dee onbeschrieflijche tjliene Bultjess mett Botta enn Mehl jebackt, twee Kuffel von eenem enn tien von de aundre Sort enn aules toop von Ma ähre stoatje Henj jemenjt and jekoaktet Eadschockewota, dauts eene Ätessort dee aul veeahundat Joah von Holland noh Polen/Preisse noh Russlaund/Ukraine mettjenohme word, foaken jereescht fe lange Foahte äwa Laund ooda Mäa, dreajch geknoagt ooda enn Pripps jedeept ooda em Tee ooda Koffe, wann eena jemols Jeld haud Koffe too tjeepe. Enn nu wann de Nohbasch spezeare kaume em Bosch en Kanada, kunn eena Tweeback ohpmoake, ooda gaunz ohpmoake enn beide Deela mett wille Tjwitsche ooda wille Suretjoachejelee, ooda Bleiwbäajam bestritjche. Mien easchtet hoadet Äte: jereeschta Tweeback too Tjreemels jedretjcht enn mett woame Maltjch vemischt: Tjreemels send uck Broot enn dann daut enn aule Eewijchtjeit langende Sprejchwuat fe de Oarme: Broot schleiht den Hunga doot.
#
Ons Hus opp eene kohle Städ oppem CPR Hewel buhd wie von witte Fijchte, woohne mien Pa enn miene Breeda opp onsem Veadel Bosch muake. See sochte sijch de Beem, lang enn jlitjch von veschiedene Fijchteklompess ut, dee manke Papple wosse, schneede dee mett eene tweemaunsche Tjriezsoag auf, enn schlappte dee mett ons Peadjespaun bett opp den Hewel; enn aules omsonst buta
väl Schweet. Daut Aufschalle wea leijcht; dee Beem haude soo väl Sauft, daut wann eena eene Striep opp een Enj loos schneet, dann kunn eena de Striep von eenem Enj bett dem aundren rauftratjche, rundet, goldnet Holt enn enne Sonn toom dreaje hanjelajcht. Etj jleew, etj word donn kratjcht jebuare auls see dee jedreajde Boomstam oppem Enj utholtjade enn oppfliede, een Staum oppen aundren, bett see acht Schooh maute enn see donn de Bähndräjasch doaräwe laje kunne.
Opp een Famieljebild een poah Joah lohta aufjenohme, steatje dee Lauteenja vonne Huswaund väa, enn eena kaun seehne, daut de Dackdräjasch äwa dise Dräjasch uck dee aufjeschalde Past send, vleijcht schwoate Fijchte ooda Tjiefapostholt. Vonne Breed vonne twee Fenstasch kaun eena schatze, daut daut Hus entweda twee-entwintijch ooda vearentwintijch Schooh lang wea, mett eene achtschoohje Owesied-Tjäatj aum oostnen Jäwelenj aunjebut. Tjeen Bild wiest de Breed vom Jäwelenj. Daut Hus ess alf Beemstamm huag bette Bähndräjasch, enn entweda twee ooda dree Stam doabowe bett de Pastspoare enn bett daut Dack von Täapapiea enn ruche Schwoate, enn soo kaun miene Bodjeschijcht stemme; doa wea jenuag Ruhm unjrem Bähn toom schlope, enn mett sass Tjinja Tus (Tina befried sijch mett Gust Fiedler, enn see trocke enn siene Heimstäd nenn den Winta eea ons Hus jebut word) haude weens de ellste twee Jungess daut jewullt.
Miene Mutta vetald mie, daut see mie enn eene Boomstaumkoht druag, eene provisorische Serai mett eene Eadflooa, woohne doa oppe Städ jebut word eea see mett dem Husbuh soo schwind auls mäjlijch aunfonge kunne oppe Heimstäd aune 1934. Disse Serai stund enne Hollinj em Waste von dem Aunboaj enn lohta, säd see, word dee ons Heeehnastaul. Miene Jeburtsurkunde besajcht, daut etj oppe kanaudsche geographische Koordinatsjoon von "S.W.31-52-17 Wast 3rd" aum 4. Oktooba, aune 1934 jebuare sie, enn see motte sijch biem Husbuh seea jespoot habe, wiels daut aul soo loht enne Joahrestiet wea, vleijcht haude see mau afens Tiet dee Dackschwoates horizontal äwa de Pastdräjasch too laje, enn mett Täapapiea too belaje, enn dann dee Schwoatess von bowe bett unje wada too belaje enne Wenj mett Plosta veschmäht enn kratjcht too Tiet, doamett wie doa verrem Winta nenntratjche kunne. Wann see grootet Jletjch jehaut haude wea de Frost enn Schnee daut Joah eascht loht den Hoawst jekohme, enn miene dree Sestre, tien, säwen enn dree Joah oolt wudde jeholpe habe daut Plosta too moake kratjcht soo auls mien Voda daut oppe rusche Stap jeleaht haud, woa eena Wota enn Leehm mett Strooh enn Koohmest enn Grauss toopmischt enn dann enn eene Blottkuhl mett ähre boafte Feetjess derjchtraumpelde, enn mett boafte Been unja ähre Ratj hubbade; Ratj, dee see enne hejcht tratjche musste wiels de Hoafstloft mett dem nauten Blott enn Tjill soo kolt wea. Een Hus von Haund emm saskatchewanschen Bosch too bue ess eene onjleefelje Oabeit, doamett eena enn de lange Diestaness em Nuade sejcha läwe kaun mett eene Dochta, dee foaken krank ess, enn eenen Sähn, dee foaken hield.
Oba kratjcht eendoont woo lang enn schwoa dee Oabeit wea, eena bruckt meist nuscht tjeepe. Eena kunn sogoa bie Fiedler enne Soagmähl oabeide omm de Flooabräda enn Dackschwoate too vedeehne, enn soo bruckt eena buta de Fenstre, daut Täapapiea, dee Näjel, enn de Owetrubbe nuscht tjeepe. Enn, Gott sei Dank, eena bruckt uck nijch de Huswenj von Pautze bue, soo auls mien Voda daut aune 1917 nohdem de rusche Tjrijchsoffensieve dohlbruak, enn hee oppe Frachtziejch tridj noh de boomloose Stap noh daut Romanovka Darp foahre een gaunzet Hus ut Pautze auls laundloosa Oabeida oppem Enj vom Darp fe sijch, Ma enn de twee tjliene Tjinja bue. Enn wann uck daut kanaudscha Bosch seea schwoa fe Jeträajdfletja too roode wea, gauf daut Bosch oba seea goodet Holt fe Foarmjebieda, endloose Hettinj omm eenem em Winta woam too hoohle and Schulinj boot von dem Wind enn de driewende Schneestorms, woa eena nijch oppe ohpne Stap de Haund verre Uage seehne kunn.
Enn hiea enn doa opp onsem Veadel oppe Quadrot Miel von measchtens groote Zettapaple lage tjliene Wotasomplajcha von Wiede vestoake, dee em Fahrjoah aunschwolle enn dann selwane Pelzkohtasch worde lang eea daut Bläda gauf; enn uck Klomptjes mett Papieboatje. Boatje, säd Pa, soo's dee groote Weela, woa hee dree Joahlang auls een wäahloosa Mennoniet jedeehnt haud während den Grooten Tjrijch oppe Kiva Rie dijcht bie Zurskoi Lienichstvo enn Zentraulsibirien; Klomptess Boatje, dee etj mien gaunzet kanaudschet Läwelang seehne wudd, enn woo dee ute bleiwen Stellheit vom Schnee spretzte deede, soo auls Riepjeista manke Wintapaple.
#
Dee Siedwaund vom CPR Hus oppem Hewel wea dee Hinjagrund fe daut easchte Bild von onse gaunze Famielje aufjenohme.
Em Wintjel jäjen dee Beemstam, doamett see ennet Lijcht nenntjitjchte, sette Ma enn Pa opp Steehla mett huage Lehne, mett aufjedreide Runge, dee eena tweschen ähre Been seehne kaun. Wie säwen Tjinja tjreise omm ahn enn uck doatweschen unjrem Väadach von dem Post emm Schwoatedack. Dee Schwoatedäah vonne Tjätjch steiht ohp hinja miene Sessta Lena ähre lintje Schulla enn hinja ährem Jesejcht auls see enne Owendsonn nennzielt. Dee schwoara Schaute vom Photograph----wäa emma daut uck mucht jewese senne, schient enn eenem schwoaten Wannitj enjewetjelt too senne----ess ditjcha auls irjendeena von ons; dee Schaute reatjcht äwa dem kohlen Väagrund enn oppe rajchte Sied vom Bild, enn schnitt eenen schwoaten Wintjel derjch Lena äahre Been fuats äwa äahre Tjnejchels enn dee formloose runde, groote Form von sienem Kopp vestatjcht dee Atj von ährem Rock. Lena woat dee easchte von ons senne, dee stoawe mott, emm lohten Moaz auls dee tweedaWelttjrijch enn Europa endlijch too Enj tjemmt, enn dartijch Joah eea ons Voda, dee aun äahre Sied sett, dee näjchste senne woat. Dee Schullaknubbel vom langen Schaute traft meist Pa sien lintjchen Foot, soo dijcht bie Leena äahren rajchten, oba siene groote Oabeidahenj lidje opp siene Tjnees enn hee haft aul Fuste jemoakt, reed too de näajchte Oabeit.
Daut Tuckse von dee Bachskamera wiest miene nijch gaunz em Brennpunkt stohnende Famielje enne Loag, woohnt tjeen Jedajchtnis soo perfatjcht fausthoole kaun. Een Bildnis, woohnt emm Haundtalla nennpausst mett eenje oole Räte äwre Bowakaunt. Enn gaunz sinndagsch aulatoop enn onse Speedwell Mennonietische Breedajemeendsche Tjoatjch; Pa enn Obraum enn Dohn enne Aunziej enn Schlippse, Tina, Mariejche, Lena enn Lis enn Tjleeda enn Stremp. Ma enn eenem jebloomten Tjleed mett een dreekauntjet Duak enn een Topphoot, mett Tjneep, dee huach äwa ähre Stearn jehowe jäjne Sonn sejchtboa ess. Tjeena tjitjcht soo diretjcht enn daut läje Lijcht nenn auls see.
Etj stoh bie ahr aune Tjnee. Ooda, daut kaun uck senne, daut see mie seea faust jäjen äah rajchtet Been em Wintjel äwa miene Brost jedretjcht, enn äah rajchta Oarm omm mien Ridje, äahre rajchte Haund haft mien rajchten Alboage too hoole enn äahre lintje Haund helt miene rajchte Haund bett opp äahre Lenjd auls wann, wann see mie eenen Uagenbletj looslote, etj veschwinje wudd. Auls du tjleen weascht, vetald see mie foaken, hast du niemols nijch jekrope, du jinjst fuats loos, enn eea du acht Moonat oolt weascht ranst du aul.
Tjleene Tjinja klunje o'ppe Schoot,
Groote Tjinja klunje opp'em Hoat.
Enn onse denne Bildasaumlung ut veschiedene Tiede von twee Kontinente, ess dit Bild daut easchte opp dem etj oppduck. Daut mott waut wijchtjet jewese senne-vleijcht dee easchte Bachskamera?-wiels doa worde aun dem Dach veea Bilda oppe selwje Städ aufjenohme.
Oppe aundre dree Bilda, aule ohne Schaute, habe se mie loojelohte, tjliena etj, enn etj stoh opp eenem straumen Stoohl. Opp eenem Bild stohne Obraum enn Dohn bie mie, enn see send soo groot, daut mien Kopp knaup bett ähre Oarmwintjels reatjcht; enn dann, wada, stohne omm mie sass Mädtjess, woavon dree miene Sesstre send, oba de aundre dree send mie onbekaunt. Aule dree Mädtjess tjitjche enne Kamera nenn, buta Lena, dee kratjcht soo groot ess auls etj oppem Stoohl sie, enn see tjitjcht mie mett ohpnem Mul aun. Vleijcht vetald sie mie aul donn eene Jeschijcht.
Oppem veaden Bild aun dem Dach aufjenohme, stoh etj auleen oppem Stoohl. Mien Mul ess ohp, enn mien rajchta Oarm haulfwäjess enne Hejcht auls wann etj aunfange väatoodroage well. Em Vejlitjch toom Stoohl, sie etj eenjefäah fiewenzäwentijch Zentimeeta groot--- aulso dartijch Zoll-groot. Woo oolt ess daut?
Etj betjitjch mie dee Bilda wada; langsom feehl etj mie noh miene ellste Sesta hanjetrocke, dee bloos opp eenem Bild vätjemmt, opp dem Bild mett dem Schaute. Tina steiht hinje, soo schlank tweschen Obraume enn Dohn, äah Jesejcht noh unje jerejcht, enn daut schiend auls wann ähre Uage too send. Ooda kaun daut mäjlijch senne von dem Wintjel von ähren Kopp auftooschatze, daut see äwa Mutta ähre Schulla noh mie tjitjcht, enn dann fellt mie bie, enn mien Jedajchtnis, daut disse Bilda soo auls dee Onn-utspräjlijchtjeit vonne Leew ess, dee wie twee fe eenaunda habe. Dee Ellste enn de Jinjsta, emma jetrannt buta een poah Doag, ooda een poah Stund daut Joah wann wie ons beseatje; eene Leew, dee wie feehlde oba dee tjeen Kommentar ooda opentjlijcha Bewiess bruckt.
Doa weare entweda twintijch ooda näjentien Joah tweschen ons: twintijch wann eena "1914" aunnemmt, daut opp Ma ähre Flijchtlings-Loaga Papiere steiht, emm Feebeoa aune 1930 em dietschen Loaga, enn näjentien wann eena Tina biem Wuat nemmt. "Jedenfauls," sajcht see enn dreit mett de Schulla, "daut tjemmt nijch dropaun: een Joah soo lang tridj." See wea eenfach Katerina enn Obraum Wiebe äah eachtet Tjind, emm Darp Numma Acht jebuare, Romanovka, Orenburg, dee Mennonietiche Aunsiedlung, dijchtbie daut Uraljebirje im oostlijchen Europa, enn etj, daut latzte Tjind, word jebuare opp eene Städ, dee tjeenen Nohme haud, oba aulahaund Nummre haud, daut siedwastlijche Veadel von Section Numma 31, Township 52, Range 17, waste von dem dredden Meridian enn Saskatchewan , Canada. Jebuare oppem selwjen Breedengrod, 53.5 Grod nuade, oba oppen jäjensiedlijchen Boage vom Globus, see aum Oktooba 25, 1914 enn etj aum 4 Oktooba, 1934.
Enn dann jefft daut uck noch een Bild, opp dem Tina auls Baby opp eenem Stoohl steiht. Dit Bild ess oba enn eenem Studio, enn Russlaund aufjenohme. See balanzead sijch, oba nijch soo auls etj jäjen dee Stoohllehn, oba enndem see sijch mett de rajchte Haund aum Kummabund von eene Fru besied ahr enn eenem langen Tjleed mett witte Spetze utjestraumt, enn mett schwoate Hoah enn Uage, äah Jeseejcht ruhijch scheen, eene Fru, dee etj niemols nijch buta auls miene besorjchte Mutta tjanne wudd. Oba auls etj dit Bild aune 1997 vonn'e ellre Dochta von miene Mutta ähre Haulfsesta tjreajch, dee äah Läwe enne Vebaunung em "steenajen Tajikistan" jeläwt haft, soo auls see daut nannde, ertjläat see mie, daut disse seete, elegaunte Fru wertjlijch miene Mutta ess auls see twintijch Joah oolt wea, enn daut daut tjliene Mädtjstje oppem Stoohl miene ellste Sesta ess.
Tina wea vonne Socke auls see dit Bild toom easchten Mol enn ährem Jedajchtnis een Joah eea see storf mett vearentachtentijch Joah sach. Auls wie ons toop wundade, wua Mutta dit Bild emm Photostudio haud aufnehme lohte-word wie ons schlissijch, daut daut enn Orenborjch äwa hundat Kilomeeta auf haud senne musst; eene Foat bloos mett Pead enn Woage too dee Tiet mäajlijch- Tina docht, daut see daut Bild haud aufnehme lohte om onsen Pa too schetjche, dee too dee Tiet emm Easchten Welttjrijch biem Czar oppe Forstei deehnd, enn dee sien easchtet Tjind noch niemols jeseehne haud.
Dee junge, straume Fru enn Maun opp disse Bilda weare miene Ellre, dee sijch enn Romanovka aum 19 Jauneoah, 1914 befriet haude; Tina word em Oktooba 1914 jebuare, enn see befried sijch mett Gustav Fiedler aum 15 Jaunoa, 1934 em steenajen Bosch en Kanada. Etj word em näjschten Oktooba jebuare, enn daut bedied, daut meine Mutta mett mie droagend word eenjefäah too dee Tiet auls Tina Tjast haud. Säwen Tjinja enn twintijch Joah, enn aule schmock enne Reaj enn tjeent too Schohd kohme ooda Doot bie de Jeburt" woo brocht miene Mutta daut bie aul de Oabeit, enn foaken mett Buckweehdoag, enn Been- enn Tähne-weehdoag foadijch? De measchte von ähre Mettmensche haude feftien Jeburte enn twintijch Joah, enn measchtens läwde mau de Halft von dee Tjinja lenja auls äahre Tjindheit. Mutta räd nijch von soohne Sache soo auls Jeburtenkontrolle: dee Jeburt von Tjinja word nijcht "kontrolleat"; Tjinja weare eene "Gottesgow", enn auls etj donn selwst Voda word, enn etj soo bieaun meend, daut see enn uck Pa aulahaund doamett too doohne jehaut haude, dreid see sijch noh de Eadschocke, dee oppem Heat brohde, enn säd: "Jung, sie doch jescheit!"
Sogoa Tina haud tjeene Ertjlärung auls wie äwa den grooten Unjacheet vom Ella räde, nohdem onse Mutta jestorwe wea. See kunn sijch nijch dentje, daut Mutta enn Russlaund irjendeen Babie lang aune Brost jelajcht haud-daut gauf niemols nijch jenuag goodet Äte, oba see kunn sijch dentjche, daut see de Buddel fe Obraum jehoole haud auls hee dree Joah oolt wea, docht see, ooda meist veea-oba see kunn sijch aun eene Sach von mie kloa dentjche, eea etj jebuare wea. Enn dem Somma auls onse Mutta mie druach, schämd Ma sijch.
"Waut?"
"Sijch schäme noh Tjoatjch too gohne, enn jeseehne too woare? Hiea wea etj, ähre Dochta, jung enn säwen ooda acht Moonat befriet enn denn auls eene Wäd, nuscht nijch, enn hiea wea Mutta, eene oole Fru mett eenem grooten Knubbel"-Tina ähre Henj weese eenen grooten runden Kulla äwa ähre Schoot-"Du weascht groot!"
"Oolt? Sea afens näjendartijch Joah oolt jeworde."
"Dauts soo." Tina lacht huach enn platzlijch. "Aulso musst wie ons spoode."
Gust rocheld fideel."Oba wie hohlde daut noh. Säwen Tjinja, uck!"
Tinas Jesejcht vetrock sijch een bätje. Noh een Stootstje sajcht see: "Enn daut wea nijch soo leijcht. Fief Tjinja unja feftien enn dann mett eenmol noch twee enn aundathaulf Joah, auls etj aul meist veatijch wea."
Gust siene Allboagess send oppem Desch jestett, sien Kopp enne Henj. Oba emma goode Tjinja," sajcht hee, stelltjess, "Aule säwen."
Tony wea de easchta, emm Lohten August jebuare, 1935, meist alf Moonat noh mie. Oba hee ess nijch oppem Famieljebild, enn sien Voda uck nijch; bloos de schlanke Tina, dee tweschen onse breede Breeda steiht; äah Hoah strenj noh hinje getrocke, enn äah Tjarpa von dem Schaute, dee sijch äwa de Ead trock wajchjedreiht.
Wann eena miene Lenjd enn mien Tjarpabu enn Betracht opp dem straumen Stoohl nemmt, jleew etj daut auls de easchte Famieljebilda aufjenohme worde, etj em Fahrjoah ooda tiedijch em Somma aune 1936 mott jewese senne, enn etj aundathaulw Joah oolt wea. Gust haud dee Kamera jetuckst-hee woat dee jekofft habe-em tiedjen Owendlijcht enn Baby Tony, vleijcht näjen Moonat oold, wea irjendwoa hinjre Fenstagardiene, enn dankboa wea hee aul enjeschlope.
Saskatchewan proowd, soowiet auls mäjlijch, too vesejchre, daut aul ähre Tjinja tweschen säwen enn feftien Tootrett too eene effentlijche School haude, enn nijch wieda auls dree Miel auf von Tus; enn onse Sackwajch Aunsiedlung dijcht biem Huagwajch Numma 4, woa se noch emma meea Heimstäde enn Fletja utem Woold rutheiwde wea enn twee Schooldistrikte jedeelt. Dee Jrenz doatweschen wea de Oost-Wast Township Wajchdeel; een jieda, dee siede doavon wohnd em Township 52 jintjch noh de Jack Pine School, enn dee, woohne enn Township 53 wohnde, jinje noh dee Speedwell School veea Miel nuade (Laundkoat opp S. vii). Jieda School bestund ut eene Leahstow, mett Klausse eent bett acht, enn een Spälplautz, een Peadsstaul fe de Schiela, dee noh de School fuahre ooda riede deede, enn een tjlienet Jebied fe den Leahra ooda Leahrain, wann dee nijch enn Kost enn Quateea bie eene Famielje dijchtbie stund.
Dee Wajch tweschen dee twee Schoole wea aum bosijchsten enne Aunsiedlung, enn nijch bloos wiels doa Aunsiedla opp jiedem Veadel wohnde, oba uck wiels de Speedwell Mennonietische Breedajemeend, enn daut Speedwell Postjebied-woohne beid Schooldistrike bedeend-enn von de Postmeistasche, Lucille (Taunte Joe) Handley bedeent word, enn uck Schreedasch (nohäa Hoadasch) enn daut Footestuah opp dem Wajch stunde. Oppe Jack Pine Atjch dreid dee Wajch entweda nohm ooste nohm Huagwajch ooda feahd wieda siede derjch den Clarkesville Schooldistrikt, aune Heimstäde vebie enn de Evangelische Mennonietische Breeda Tjoatj, woa wie oba bloos toom Erntedankfast enn fe Missjoohnsaundachte hanfuahre, enn dann noh daut tjliene Darp Fairholme oppe Canadian National Bohn mett meist hundat Mensche, twee Jesträjdspitjasch enn een tjlienen rooden Bohnhof, enn näjen Miel eenem kruggeljen Boschwajch von Jack Pine auf lach enn drettien Miel von Speedwell.
Onse CPR Heimstäd lach eene haulwe Miel siede von dem Schooldistrikt enn donn, mett dem Fahrjoah 1934 aunjefonge, jinje Lena, Mariejche, enn Dohn noh de Jack Pine School. Auls etj em Läwe too Besennung kaum, fong Lis uck aun, oba Dohn wea nijch meea enne School: hee wea aul näjen Joah oolt auls see enn Kanada aunkaume, enn auls hee feftien word aum 26 Jauneoah, 1935 wea hee sass Schooh lang enn knoakijch, enn hee feehld sijch enne School nijch macklijch, enn haud'et uck nijch leijcht. Enn donn säd Pa, daut kanaudsche Schooljesatz leeht daut too, daut hee de School velohte durf enn opp Oabiet gohne kunn. Enn daut deed'a dann uck. John Lobe haud een Rejierungsvertrag omm Schwalle fe de Iesabohn too schniede, enn hee tjreajch Reliefsjeld fe $15.00 em Moonat fe jieden Maun, woohnen hee aunstald: $7.50 weare om den Oabeida Loohn too tohle, enn $7.50 fe Kost, Wohnung enn Quateea. Enn soo fong Dohn fe Lobe siene Maunschauft aun too oabeide, enn see hackte enn soagte Daunebeehm dohl enn soagde dee enn achtschoohje Stetja, enn dann heiwde see dee opp beide Siede jlitjch mett eene breede Atjs; eene näjenzollje Atjs fe eene Schwall Numma Eent, enn eene säwenzollje Atjs fe eene Schwall Numma dree. Daut wea schwoare Oabeit, dee eenen jungen Jung seea meed muak, oba John Lobe wea een gooda Mensch: hee tohld Dohn daut gaunze Jeld, enn gauf ahm Quateea enn uck too äte, enn soo haud Dohn dee gaunze feftien Dohla, dee hee noh Hus fe onse Famielje nauhm.
Dohn jintjch niemols wada tridj noh School. "Oba etj muak mie den Ridje toonijcht bie emma dee schwoare Stam opptoohäwe, enn emma aum schwoaren Enj," vetald hee mie, nu auls Pensionäa nohdem hee daut gaunze Läwe em nuaden Alberta opp siene Veehfoarm jeobeit haud. "Etj haud väl Trubbel. Etj jintjch emma nohm Trajchtmoaka bett etj fiewenzäwentijch Joah oolt wea, enn dann wea mien Ridje dochwoll eenfach toopjewosse, enn nu hab etj tjeene Probleeme meea mett mien Ridje, Gott sei Dank!"
De Schoolsproak enn beide Schoole wea natierlijch Enjlisch, buta Tus räd daut tjeena buta Joe Handley siene Fanielje enn vleijcht de Haulfbritte Brieres enn Naults-de oola Stewart, dee auleen enn siene onriemsche Koht wohnd räd een seea oppjeriemdet Enjlisch mett sien Hund enn Mensche haud ahm jeseehne, woo hee irjendwaut Onvestendlijchet too de Beem prädje deed. Dee Fiedler-Lobe-Dunz Famieljes kaume ut Bessarabien and räde meachtens Huagdietsch-ooda maunjchmol uck Schwobsch manke ellre Mensche---- oba sesst räd een jiedra von dee Aunsiedlung von eenjefäah dreehundat Mensche, dee aula Mennoniete weare, Immigraunte ute 1920 Joahre ooda Flijchtlinje ut'e Sowjetunjoon: ähre enn onse. Sproak räde wie Wiebetjinja daut gaunze Läwelang mett onse Ellre enn disse wea: Russlaund-Mennonietischet Plautdietsch.
Een koomischet, een bätje von bowe-raufet Jedijcht, noch ut Russlaund mettjebrocht word maunjchmol bie ons Tus väajedroagt, wann wie ons em Winta enne lange Owende toom spezeare troffe, enn wie väl too lache haude enn noch meea Jeschijchte tom lache oppdeschde. Etj kaun mie noch aun een Farsch dentjche:
MIENE MUTTASPROAK
Daut disse Sproak de baste ess,
Wea haft daut woll besträde?
Sesst haud dee Mutta gaunz jewess
See mie nie leahd too räde.
Dee mennonietische Oat vonne Europäische Nadalendschet Dietsch haft ähre Wartle emm Ooltsächsischen enn word von onse Väaellre von Frieslaund, Hollaund, wohan die Mennoniete während dee relijeese Striedariee hantrocke, enn aule Tjriej enn Mertyrariee vonne eachte Tiet em Sasstienden Joahhundat sijch aufspälde. Dee wäahloose Mennoniete, soo auls see sijch nannde wäjen aähre earnste Jinjaschauft aun dee Leahre Jesus enn ähre Wäahloosijchtjeit-woohne foaken eene Flucht vonne Vefoljung weare om eenfach läwe too bliewe-de läaje Lenda aune Nuadsee delenjd, ...enn emma liehde see sijch niee Weada enn Jewannheite von de Nohbasproake äwa veeahundat Joahlang, von Niederlaund bett Polen/Preisse, bette Ukraine enn Russlaund enn schliesslijch dann bett Nuad enn Siedamerikau. Dee Sproak entwetjcheld sijch too eene eajne Sproak enn soo dijcht mett Enjlisch auls mett Niederlaundisch enn Dietsch vewaundt.
Em Fahrjoah aune 1938 auls etj dree Joah oolt wea, wea onse Famielje acht Joah enn Kanada jewese, oba miene Ellre haude mau bloos een poah Weada Enjlisch jeleaht. Kratjcht soo's väle aundre kanaudsche Ennwaundra, haude see emma enn Aunsiedlunge mang äahre eajne Mensche jeläwt, mett Frindschauft enn Didsbury, Alberta, woo dee aune 1930 hankaume, dree Joah oppe Dreajchlaund Foarm von Mutta ähren Onkel Heinrich Tjnalse emm Stofftalla von Siedsaskatchewan jewohnt, enn nu fief Joah enn Speedwell. Enn enn aul de Framdheit von Kanada enn de Enjlische, woabie daut Enjlische aul dee woohne nijch Plautdietsch kunne betätjend ooda meend, funge see emma wada mennonietische Gruppe, mett dee see toop läwe enn oabeide kunne, enn, waut noch wijchtja wea, eene Tjoatjch, en dee see Aundachte hoole kunne. Dit wea dee stoatjsta Grund, woaromm see sijch enn Kanada tusijch feehle kunne.
#
Oba de School em wastlijchen Kanada ess bloos Enjlisch, enn wann Lena enn Mariejche loht aum Nohmeddach noh Hus kaume von ähren dreemieljen Wajch toofoot vonne Jack Pine School den Boschwajch delenjd, enn mie waut opp Enjlisch säde, vestund etj daut kratjcht soo goot auls waut miene Mutta den dachäwa mett mie räd. Wiels veschiedene Sproake mie nuscht bediede, weare Weada de Lud, dee eena mett dem Mul muak enn dee daut bediede, waut de Jansja säd, daut see bediede, enn etj schluckt dee dohl ohne doabie too dentjche. Fe een Tjind von dree ooda veea, send Wead eene stendje Openboarung von wellkierlijche Jeheemnisse, woaräwe sijch aulemaun eenijch ess, enn soo leahd etj, dee rejchtje Lude too moake, doamett mie een jiedra vestund enn tjeena mie utlache wudd: mien Ellre muake gaunz eenfach bestemmde Lude, enn miene Jeschwista too Tiede aundre.
Enn sogoa bäta: miene Sestre kunne mie wiese, waut ähre Weada enne ähre Schoolbeatja bediede, woohne see maunjchmol fe eenen Owend mett noh Hus brinje durwe. -see kunne daut Lesbuak nijch Tus lohte fe mie den gaunzen dachäwa too beseehne, niemols nijch! Schoolräjle! Etj kaun noch vondoag dee rebbje, ditjche bleiwe Datjsels von Highroad to Reading Buak Numma Twee unja miene Finjaspetze feehle, enn dee blanke, straume bunte Bilda benne em Buak, enn de kratjchte Form vonne enjlische Weada:
Wann de Mohn vom Himmel kaum,
Unjawäjess väl vetalde,
Waut wudd see ons too saje han,
Enn waut wudd see ons malde?
"Daut's moon," säd dee tienjoahsche Lena auls see mett dem selwjen Finja noh bowe wees mett dem see sootoosaje ähre Stemm enn mien Uag äwa dee Sied leid, enndem see äwaludes dee tjliene schwoate Spoare oppem schlockwitten Papiea räd. Em langen nuaden Owendlijcht vemeahd see de Bediedung vonnem Lud too de Sejcht enn wada tridj. "Dauts meist soo's Mohn, bloos een tjlien bätje aundasch."
Enn etj jleewd ahr aules oppe Städ; etj woah de huppaje Unjascheedunge fe mien äwajet Läwe vestohne. Fe Lena enn mie kaun irjendwaut soo väl Nohmes habe auls daut well: daut groote Kulla mett dachet Lijcht enn woo daut äwre schwoate Paple äwrem Fletj bie Louis Ulmer siene Heimstäd den Lud soo watjchsle kaun von Ma äah Plautdietschen de Mohn, enn dann dem Prädja sien Huagdietschen der Mond toom Schoolenjlischen "the moon" soo leijcht auls'ett well, enn daut weet etj aul woo dee groote Kulla siene Form von Nacht too Nacht biem äwrem Hiummel säjle endre kaun. Doa oppe Mohn send Teatjen oppem roosajälen Jesejcht, aulso orange-foawnen-ooda vleijcht uck Noawe, vleijcht vonne Tjwälarie soo's se daut enn Russlaund doohne, vleijcht haft dee Mohn uck eenen ruschen Nohme, Pa kunn den Mohn opp Rusch nanne, wann hee wull, enn Ma uck, oba daut doohne see niemols, nijch een Wuat en dee Sproak von dem kommunistischen Stalin enn nu sie stell doavon!
Vleijcht, wann Ma sijch woage wudd daut opp Rusch too froage, wudd de Mohn irjendwaut feinet von ährem jinjsten Brooda Heinrich Tjnalse vetalle, den schratjlijchen Kommunist, oba soo truje Uage haud, dee ons sien Bild von Russlaund schetjcht, opp dem hee de rusche Uniform druag mett een seea grooten rooden Stearn opp siene spetze Militäametz. Ooda ons irjendwaut von ährem ellren Brooda Johann vetalle, dee Stalins Polizei veschwinje leet. Wann see sijch bloos woage wudd-wudd Gott ahr eene Auntwuat jäwe von ähre Breeda enn den schratjlijchen Stalin, wann see opp Rusch bäde wudd? Daut deit sie niemols nijch, enn nijch opp Plautdietsch, miene Mutta bäd bloos opp Huagdietsch, enn hielt doabie.
#
Dee Papelbläda zettre soo auls de Angst ennem Nachtwind, ähre Asta stähne äwa ons em Mohnschien. Enn nu tjemmt mie daut soo väa, daut Lena enn etj, enn Lis uck, joh, wie send enn eenem Zelt unjre Beem enne Hollinj hinja onsem Holtstaumhus. Em Dunklen, woa irjendeen Jelud platzlijch enn eene aundre, jefährlijche Jeschijcht sijch vesatte kunn. Oba wie send je ähre dree enn wie send sejcha opp onse CPR Heimstäd, woam, wie habe onse Staulletoarn unjre jewintjelte Leiwend brenne; eene tjliene Flaum hinja Glauss mang onse goode Badspreede enn Datjche huag omm ons jefliet enn soo sejcha auls ons Bad. Sejcha von aules. Vondoag holp wie aule Famieljebadinj utem Hus too droage enn bett oppen Hoff, kratjcht soo auls wie daut jiedet Joah doohne, wie fuahre mett de Finjasch äwa enn delenjd jieda Datjch enn jieda Tjessebianoht delenjd, enn dann muak wie aule Medrautze ohp enn scheddade aul daut Howastrooh doarut-plautjedrejcht von eenem gaunzen Wintaschlop-opp een Hupe enn tjitjchte too auls daut Fia aules enn Lijcht, Loft enn Ausch vewaundeld. Den gaunzen Dach äwa oabeide, enn nu kaun dee Jeschijcht aunfange, eene Jeschijcht een tjlien bätje grulijch, oba nijch too seea, okay, nu fang aun:
Nu ess'et Tiet. De Mutta Ent mott utem Hus gohne, omm Äte too hohle. See woarnt ähre sass Entjess noch eenmol wäjen dem rooden Foss: see motte benne bliewe, see motte de Däah hinja ahr tooschlute enn dee nijch ohp moake, nä niemols nijch, bloos wann see tridj tjemmt, enn see ähre Stemm heare, oba bloos ähre Stemm. Enn dann jeiht see rut, enn fuats oppe Städ knaule dee sass tjliene Entjess de Husdäah hinja ahr too. Enn dann schlute see dee too!
Ons Hus haft tjeen Schlott, bloos eene Tjlintjch, oba wie send je uck nijch benne. Em langen Tweediesta em Somma drenje wie dree, Lena, Lis enn etj ons toop unja dem Lijchtschien, soo sejcha enn macklijch unja onse Bading em Zelt, dijcht biem Tjala oppjestalt, enn uck dijcht bie aul de Borremlajcha, nu wada aula oppjefellt, wiels miene Breeda doa tjeen Wota benne funge; eajentlijch send wie dijcht unjre groote Pappelbeem dijcht biem Betjhus, dee Setjreet; dann bruck wie nijch wiet gohne, wann eenem von ons mol needijch senne sull. Ons Boomstaumhus ess soo dijcht auls mäjlijch vesiejelt; jiede Retz mett Blott ooda Koddre toojemoakt, enn doa woat nuscht nijch Läwendjet benne senne, nijch mol de Mies, dee bett nu aula utjestoake send, sajcht Lena wiels dee schratjelja Jestank von Formaldehyde langsom enne Ammasch brennt, daut mott weens dree Doag brenne omm aul de Waunstje enn de Lies, enn daut Onjezeffa enne Bade, enn aulewäje enne Retse sijch vesteatje, enn uck enne Beemstam, enn uck em Plosta, woa daut Onjezeffa sijch opphelt enn dann de Nacht ruttjemmt omm ons too biete, enn Bloot vonne tjliene Folj aum Hauls enn ennem Jenetj too sue, enn von hinjre Uahre, enn omme Uage, wann wie jäjen enn opp de Stroohmedrautze schlope, enn de ditjche Tjesses vonne Fadre von onse Heehna jeplocke, jemoakt send.
Mien Strooh enn Fadabad ess weatjch enn seea woam, oba de Lies enn de Holthuppsfleaje send schlemma auls de Midje, wiels de nenna krupe, sajcht Ma, enn de send nijch opptoohoohle, dach enn Nach eon dem Bosch ohne Enj, woohnt aulewäje om ons wausst. Dee Lies jleijche uck dee woame Nohte von onse Badinj, enn see vesteatje sijch enn jiede Fold, enn wachte opp ons woamet Bloot; maunjchmol woak etj de Nacht opp enn hiel fe Weehdoag. Oba tjeen Foss kaun sijch utem Boosch enn een Hus nenn schlitjche, wann dee Däah toojestett ess, enn de tjliene Entjess woare dee nijch ohpmoake wann een Foss aune Däah puttat, enn gaunz bestemmt nijch wann see siene Stemm heare. Niemols nijch!
"Schäah Die!" schriee see aulatoop. "Onse Mutta haft eene seete Stemm, oba Diene Stemm ess groff! Du best dee rooda Foss, schäa Die!"
Enn de rooda Foss jeiht wajch-nohm Stua opptoo. Hee sajcht too dem Stuamaun, "Jeff mie een grootet Stejch Tjried, daut well etj oppäte.!" Dee Stuamaun ess besorjcht, hee dentjcht, daut de Foss wada irjendwem äwaleste well. Oba hee haft uck seea Angst, enn dann jefft hee ahm, waut hee well. Soo ess daut mett Mensche, dee Angst habe.
Dee rooda Foss keiwt dee Tjried dohl, enn jeiht wada tridj noh de Entjess. "Moakt de Däah ohp, miene Schmaundenjeltjess," enn siene Stemm ess nu weatjch enn seet. "Etj hab een Jeschentjch fe jieda eenen!"
Enn de Entjess weete je, daut bloos ähre Mutta soohne seete Stemm haft, enn dann schlute see dee Däah ohp enn moake dee ohp-oba doa send dee schratjelje Tähne vom Rooden Foss! See ranne enn aule Rejchtunge, enn vesteatje sijch mankem Brennholt, ennem Owe, sogoa hinjrem Nachttopp, enn unjrem Bad, oba dee Rooda Foss finjt ahn aula, woa emma see uck send, enn frat de aulatoop opp; rumms!
Joh, enn jiedret-na, nijch gaunz, bloos fief, wiels daut tjlanste Entjche ess soo kluak, daut'et oppe Fenstakopp huppst enn sijch hinjre Gardien vestatjcht. Dem rooden Foss sien Buck ess voll jestoppt mett fief fatte Entjess, oba hee well uck noch daut sasste; Fass lohte niemols een Stetjstje äwrijch, enn uck nijch eenmol eene Fada, oba daut tjlanste Entje blifft soo muckstjess stell, enn odemd mau knaup, wann äwahaupt, daut de Rooda Foss sijch schliesslijch dentjcht, woaromm sull eena sijch wäjen soohnen tjlienen Tjnirps baudre; dee woat sowesoo nijch mol goot schmatjche.! Enn soo wackeld hee utem Hus, hee haft sijch soo-ooo-ooo voll jepanzt, enn hee lajcht sich opem Graus bie de Rie dohl; dauts soohne schwoare Oabeit daut Meddach too jriepe, hee stratjcht sijch ut enn dann schlapt hee em woamen Sonneschien enn.
Etj sie de tjlansta Tus enn onse Famielje, enn doawäjen nanne see mie foaken du Tjnirps, enn etj sie mie sejcha daut etj daut kluake Entje jewast senne wudd enn etj wudd ahn aula jerad habe, enn tjeen Foss wudd mie jemols hinjre Fenstagardiene jefunge habe. Etj hab noch niemols eene rejchtje Rie jeseehne. Maunjchmol em Fahrjoah, wann de Schnee schmelte deit, rannt daut Wota bie ons een poah Doag lang vebie soo auls eene tjliene Rie unja onsem toojeschlohtnen Hus, woa de Formaldehyde reatjat. Dee eizhje wridjelnde Waunstje woare benne aulewäje rauffaule, vonne Retse enn vom Blottplosta tweschne Stam soo auls Schnee, enn miene Mutta enn Sestre woare dee toop fäaje soo auls schwoate Diehne enn dee rutscheffle, wann wie de Däahre enn de Fenstre wiet ohpmoake, enn de Wind derjchet Hus fäaje lohte enn den Jestank vedriewe.
Etj heah disse Jeschijcht enn onsem Waunztjezelt hinjrem CPR Hus oppem Hewel. Wie wohnde doa mau veea Joah; wie haude noch nijch dartijch Ackalaund toom Jetjräjdseie jerood-aule Maunslied oabeide so foaken auls mäjlijch omm Jeld fe den Unjahault fe de Famielje too vedeehne, enn soo bleef weinijch Tiet äwa daut Bosch too roode; vleijcht haud wie dee CPR nuscht nijch meea auls de Auntohlung jetohlt- enn wann'et uck soo schiend, daut onse Mutta nijch wajchtratjche wull, bestunt Pa aune 1938 doaropp, daut wie wajchtratjche sulle. John Franka haud sijch opp een Veadel dijcht bie Speedwell derjchjesat, oba hee trock wajch: daut gauf bätret Laund, meea jeroodet, enn wie sulle doahan tratjche.
Dit pessead eea etj veea Joah oolt wea, enn etj kaun mie aun nuscht dentjche von Heehna oppe Floake enn woo see enne Lautekoht Eia läde, enn dee de Häwaum Mary (Taunte Gottlieb) Biech miene Mutta behelplijch wea auls etj jebuare word. Etj hab nijch de blausseste Ohnung von eene Stow enn dem gooden CPR Hus, nijch eene Gardien, nijch een Fenstakopp, uck weet etj nijch auls de Bennawenj äwaschrots mett denne Wäde benoagelt weare ooda mett Plosta denn beschmeat enn dann aunjewitt. Kratjcht eendoont, disse Jeschijcht mett aule Einzelheite ess mie soo schoap emm Dentjch jebläwe auls etj von onse Heimstäd hab: Entjess, een Foss, een Zelt enne Hollinj unjre Paple, ons Hus aufjedijcht fe den Jefftgaus, enn daut Boschonjezeffa enn von meine Mutta jehosst: Waunstje.
#
Disse Jeschijcht ess soo auls eene oole Vetall, dee miene Mutta ute Huagdietsche Mädtjesschool enn Russlaund bekaunt wea, oba de eensje Jeschijchte, dee see ons vetald weare äwa äah Läwe enn Russlaund ooda ute Biebel, enn enne Biebel räde Ente nijch, enn besondasch nijch enn een mennonietischet Darp. Daut tjemmt mie soo väa, daut bloos Lena de Jeschijcht von dee Entjess vetald habe kunn; see mott dee Jeschijcht enn eenem Jack Pine Schoolbuak jefunge habe. Tjand etj aul soo väl Enjlisch eea etj veea Joah oolt wea?
Woo uck emma, de Jeschijcht muak soo wieda Fortsetzung:
Mutta Ent tjemmt too ärem Entsatze tridj noh de Däah, dee wiet ohp steiht, enn daut Hus ess ladijch enn de Meebel send soo's Fadre vestreit, oh,oh,oh, see hielt ähre schlemmste Trohne fe ähre Tjinja, opp emma wäjen dem Rooden Foss veloare-oba daut sasste Entje schurjeld lieseltjess jäjen dee Gardien, enn fellt mett de tjliene, korte, ditjche Flijchtjess, dee auls een Zoageltje pienijch weifle, oppe Flooa. Oh, daut kluake tjliene Sasste! Hee woat Mutta aules vetalle, toop gohne se den meeden Stijch delenjd bett den Eewa aune Rie woa de Rooda Foss lijcht enn schnoatjcht. Enn mett eenen ditjchen Buck....enn see seehne, woo enn sienem Buck tjliene Waltjess dreie, joh, daut jefft doabenne tjliene Waltjess too seehne.
Mutta Ent deit, waut eene Mutta doohne mott: see nemmt ute Schalduaksfupp ähre Scheea, enn ähre Notel enn Twearm. Enn seea jenietsch fangt see aun dem Rooden Foss sien Buck ohp too flerre, enn nu haft uck aul daut easchte Entje den Kopp rutjestoake, enn dann schnitt see noch meea enn aule fief huppse rut, eena nohm aundren. Enn dann schetjcht de Mutta ahn noh de Rie omm Steena too hohle.
De easchte Jeschijcht woohne etj mie dentjche kaun haft een Schluss mett Steena. Mien Voda gromsaujd, daut wie opp ensem CPR Laund mea Steena auls Lies haude, enn sogoa auls tjliena Butzat wisst etj, daut auls hee enn miene Breeda endlijch de eachte tien Acka jerood haude, enn de Beem enn daut Struck dohl jehackt haude, enn de Wartle utjegrowt haude enn lange Stobbes stohne leehte, doamett eena omm dee bäta lange Tjäde aunlaje kunn omm dee mett de Pead mett aule Macht ruttootratjche, sogoa nohdem John Lobe mett sien Daumptjätel, woohna Räda breeda haud auls etj lang wea, daut Laund beoabeit haud; doaräwa jedonnat wea, enn de jewaultje Schoare dee Sood oppjebroake haude, enn de lange, groote Striepe Ead doa lage mett väl Wartle enn Leehm, enn Pa dann dee Soode noch wieda mett onsem tjlanderen Pluag enn mett de Disk beoabeit haud, wudde noch emma meea Steena äwadäl kohme. Wie heade daut Stohl oppe Steehna den gaunzen Dachäwa knacke, enn schiere, enn tjriesche.
Dartijch Acka weare tooväl eewje Oabeit, woo kunn eena doa eene Arnt toom Vekoop tratjche? Miene Sesta Mariejche haft daut Laund niemols nijch vejäte; see docht doaraun, enn wea noch emma doll; fe nuscht goot buta Midje enn Steenasupp!
"Etj jleew," säd John Lobe trurijch too mienem Voda auls hee bie sienem Daumptjätel stund,"Du hast een Veadel mett wertjlijch goode Steehna jefunge, kratjcht soo auls etj. Näjen Joah hab wie aul jepläajt, enn jiedet Joah jefft'et eene niee Arnt Steehna toom oppläse. Dee wausse noch bäta auls Onkrut!"
Zasstijch Joah lohta finj etj wada daut Tjallaloch von onsem Hus oppem Hewel. Aule Foarmjebiede send lenjst wajch: daut Uabosch ess tridjjewosse soo vezoddat enn groot auls Paple woaret tjenne. Waut too eena Tiet Hoff, Heiweid, Fletja wea ess nu soo dijcht mett Beem bewosse, soo daut etj mie mau siedwoats derjche Beem drenje kaun. Mien Sähn Christ finjcht eenen enjebuhlden verrostaden Stelco Wotaamma, woa dee Wädetun eenmol dee Kaunt von dem Fletjch, woohnt mien Voda enn miene Breeda eenst ons Veadel roode deede siedlijch von onsem Hoff: een dreekauntja Steenahupe mett Paple derjchjewosse, enn eene Laundridje trock sijch wiet enn eenen Woold emm Nuade soo's een eewja steenana Boajch von eenem menschlijchen Gletscha, dee sijch jrods vebei schoof.
Dee Entjess, dee tjliena Sassta uck, brinje jieda een Steen, soo groot auls see den droage tjenne mett vonne Rie. Dee laje see schmock eene Reaj biem rooden Foss em ohpnen Buck nenn, enn Mutta neiht daut soo schmock too, daut dem Rooda Foss niemols nijch dreeme woat, daut hee doa jemols eene Schmoah jehaut haud. Enn dann gohne see loos, oppen Boajch enopp, em Hus enenn, see schlute de Däah too enn räde, oh! aula opp eenmol!
"Etj bleef haulwwäjess bie ahm stäatjche..."
"Hee's soo jierijch, hee schluckt bloos..."
"Mie wea doa tweachen gaunz macklijch..."
"Daut Gorjele, ujujuj! Sien Buck..."
"Etj feehld mie gaunz enn goa sua!"
enn doa, bie de Rie woakt dee Rooda Foss opp. Ahm darscht gaunz schratjlijch, enn koomisch, sien Buck feehlt sijch soo schwoa, enn ess soo hoat. Hee stuckad noh de Rie opptoo enn dann betjcht hee sijch, enn moakt sien langet Mul ohp omm Wota too supe, oba dann rutsche de schwoare Steena noh väare, enn hee schitt heistakopp, enn dann fellt hee han, enn vesippt.
Opp onse Heimstäd hab wie väl Heehna oba niemols Ente ooda Jans soo's de rusche Darpa emma haude, säd Ma. Uck weare enn onse Jäjend tjeene Fass. Oba, wie enn aule onse Nohbasch doa emm enn biem Bosch haude Foarmhunj, dee bute bleewe, oba niemols auls Schoothunj em Hus; daut weare Oabeitshunj, dee bute bleewe kratjcht soo auls aule aundre Foarmtiere. Maunjchmol jäjen Owend deed ons schwoata Hund Carlo-ooda Louis Ulmer ooda Doft Leewess ähre Hunj opp äahre Häw wiet hinjre diesta woarende Beem- dee julende Coyoten, dee oppe ohpne Stape em waste von ons em vezoddaden doodjen Bosch enn oppe Hewels enn enne Lemauns, dee miele wiet sijch delenjd stratjchte, soo word vetalt, bett dee dann schliesslijch emm witten, saundjen Straund von dem jewaultjen Turtle Lake veschwunge, enn doa jäjade Auntwuat jäwe. Auls etj veea Joah oolt wea haud etj den Turtle Lake noch nijch foaken jenuag jeseehne aun dem em Dentjch too hoole, oba etj tjannd aul daut huagstemmje Lache enn daut Jeyodel vonne Coyoten, kratjcht soo etj aul dee poah Kooohtjlinjasch von onse Tjäj tjand, emm Somma wietauf oppe ohpne Weid. Etj wisst, waut onse Koohtjlinjasch bediede, enn waut daut too bediede haud, wann onse Tjalwa enn onse Tjäj bloade; ahn hungad, enn ahn darscht, enn dee wulle sijch jäjensiedijch habe. Oba waut haud dee Coyotes too saje, enn ähre piepaje Sproak, enn waut haud ons Carlo ahn too saje?
Äah willet Jule steajch enne Hejcht soo auls Näwel wann de Tweediesta jäjen dee wastlijche Woltje veschwinjt; etj goh nenn, enn moak de Däah too. Enn vleijcht ess daut, wiels Mariejche äwalud von ährem bleiwen Buak Highroads to Reading, daut Veade Buak, jeläse haft enn etj mien Ooah jäjen dee Bennasied von dee Schwoatedäah lehn:
Irjendwäa puttad
Aun miene tjliene Däah;
Irjendwäa puttad,
Enn doa wea wäa, joh wäa;
Eascht lauscht etj, donn tjitjcht etj,
Eascht rajsch, dann lintjsch, enn etj wacht
Doch doa read sijch tjeen Nuschtnijch
Enne stelle diestre Nacht...
Etj häw nijch dee Tjlintjch opp omm de Däah ohp too moake, enn etj tjitjch uck nijch lintsch enn rajsch. Etj horch noh eenem puttre: ons Hoff ess soo eensaum enn auleen oppem Enj von eenem kruggeljen Wajch, daut niemols nijch irjendwäa bloos soo toofallijch "vebietjemmt"; tjeena tjemmt ons jemols beseatje buta aum Sinndach, enn etj weet, daut wann etj de Däah ohpmoak dee Sommanacht nijch stell senne woat. Bute odemd waut huach manke Papplebläda, tjliene Tiere ranne eenem äwre Feet; irjendwoa enne Diestaheit schella een poah Rootbucks eene Uhl enn send seea wuttijch, enn dann, eea eena den Odem aunhoole kaun sajcht'et Husch! Enn dee groota Uhletjarpa veschwinjt manke Asta. Eena truht dee Dunkelheit ommet Hus, dee ess emma oppe selwje Städ, deeselwje Form enn Jestault, Diene boafte Feet feehle den hollen Stijch, woohnen eena nohm veschiedne Dachheit ooda nohm Greiwen too gohne, enn sejcha Väare ess daut schwoate Betjhus, daut Hiestje, woa eena sijch betje mott, mett twee ovale, aulso haulfrunde Lajchs oppe Sett fe groote Mensche, enn eene tjliene Beintjch besied mett een rundet Loch kratjcht fe mien tjlienet Hinjarenj enjerejcht.
Foaken bruck etj goanijch soo wiet nohm Zetjreet gohne; etj sie een Jung, enn fuats omm'et Hus reatjcht'et aul too omm mien Stenjeltje, mien Zoagel, mien tjlienet Schwenjeltje, mien tjliena Klaupa; Plautdietsch haft aulahaund Weada fe daut; enn jiedet Wuat brinjt dee Jeschwista toom lache; vleijcht soo väl Weada, wiels dee sijch emma aundasch enne Haund feehlt; koomisch, daut daut sijch emma veschieden feehlt wann eena uck mau emma dautselwje deit, eena steiht doa, schifft, drentjcht een bät, enn lat daut ranne. Du best een Jung, enn wann du die voll feehlst, dann bruckt eena sijch nijch een Bosch finje, soo's de Sestre enn sijch hanhucke, dach ooda Nacht, dreiht eena bloos den Ridje, enn wiest, weifeld enn schitt, spretst irjendwoahan manket Onkrut enn de läje Bescha, enn dann jeiht eena schlope enn feehlt sijch rejchtijch goot, enn eena haft daut kratjcht soo diretjcht enn soo maunlijch jedohne auls irjendeen groota Brooda.
Soo auls Ma sajcht enn frintelt doabie een bätje: " Doa räjend daut auls haulf Maun huach."
#
Dee Foss enn Entejeschijcht tjemmt natierlijch von Die Märchen der Brüder Grimm. Jacob enn Wilhelm Grimm saumelde twee hundat von soohne Märchen, enn leehte dee aune 1812 dretjche. "Disse onschuldje Husmärchen..." dee Sort Reinheit woabie ons de Tjinja soo wundaboa enn seelijch väakohme."
Eascht laus etj nu enn eene Saumlung von Märjchen, dee etj aune 1958 auls etj enn Tübingen enn Dietschlaund studeat kofft. Enn nu wann uck mien Jedajchtnis doaropp besteiht, daut dee dree Tjinja macklijch unjre Datjch rund omm eene Letoarn em Zelt em nuadlijchen Woold enn Kanada vestoake, veseatjch etj utenaunda too kloare, waut etj nijch vejäte kaun: de veade vonne Grimms äahre Jeschijcht ess "daut Märjchen von eenem, dee loossad, om sijch daut Ferjchte too leahre," enn Numma fief ess onse Zeltjeschijcht, oba aundasch: "Dee Wulf enn dee säwen tjliene Kozze."
Doa kohme tjeene Fass noch Entjess väa, bloos een Wulf enn dee säven junge Kozze. Dee Wulf tjemmt enn daut Hus nenn endem hee nijch bloos den Stuamaun fe Tjried dreiwt om siene furjchtboare Stemm weatjcha too moake, oba hee dreiwt uck den Darpsmahla, doamett hee ahm Mehl jefft om seine schwoate Poote auntoowitte; daut säwende tjlannste Kozztje jeiht dem Wulf derjch endem daut sijch vestatjcht enn nijch hinjre Gardiene, oba huach enne Klock, dee aune Waund henjt. Auls de Wulf oppwatjcht enn sien Buck toojeneiht ess, stuckad hee auf nohm Borm (nijch noh eene Rie) omm too supe, enn biem Gohne stuckre bie ahm benne dee Steena toop. Enn dann fangt dis Beesewijcht noch onbejriepeljawies aun too singe:
Waut rummetl enn grummelt
Enn mienem Buck eromm?
Etj docht, daut weare Kozzetjinja
Oba nu send daut luta Steenadinja.
Toom staune. Biem stoawe woat dem Beesewijcht een himmlischet Tätjen vejennt; eea hee vedrinjt, sinjt dee merdarischa Wulf een Leed vonne deepste Selwstertjanntnis.
Etj jleew nijch daut onse leeftohlje Lena daut Rummel-grummel Leed vom Wolf sung. Oba dee jespeajelde, ommet väle vejratade Unjascheedunge tweschen miene Erinnerung aun dem Tatjst send een perfatjchtet Echo, een perfatjchta Schaul von onse Pionieraunsiedlung von dreehundat Mensche aufjeschlote derjche Laudschauft, Sproak, Gloowe enn Jewannheite. Doa wisst een jiedet Tjind instinktiv daut, waut uck emma sijch wertjlijch aufjespält haud, wudd dee doavon vetallde Jeschijcht, wann Du tooheare wullst, wudd von irjendeen Mul enn irjendeen Ooah enn irjendeene von dree veschiedene Sproake vetalt woare; een endloose Schmoasel em Drei von Pludararie enn Sposs enn "Schisch!" ooda "Stell!" enn Aundiedung, enn Beesoatijchtjeit ooda Aufgonst ooda loosbrädajet Lache sprinjcht romm derjch eene Jewaultijchtjeit von Eenzelheite woohnt bloos een wuatwortelja Pejautz wudd proowe well tridj enne Form von Ordnung too brinje. Jeschijchte weare Tautsache, dee wieda vetallt woare musste.
:
Daut Lijcht enn dee Diestanees ooda uck Dunkelheit enn dee etj aul auls Jung läwd weare dee Dach enn dee Nacht vonne Sonn; daut watjseld mau seea weinijch derjche Stauleletoarns ooda dee eensje Kerosienlaum, mett dem elegaunten Glauschorm opp onsem Tjätjedesch. Oba wua etj uck wea, wea etj enne Famielje, enn de Tjätjch auls belijcht ooda ohne Lijcht, schoof den Schaute woaemma etj uck wea, hinjrem Heat ooda den Holtklompe doa eppjefliet, enne Atje bie de Schaups mett Gardiene vehonge, enn unjre Beintjche ooda den Desch ooda dijcht biem Wotaamma enn Wauschdesch bie de Däah; daut Lijcht enn de Dunkelheit vom Hus, benne ooda bute, muak tjeene Angst. Nijch eenmol dee Knack! von eenem Waundstaum, dee biem dräje enne Wintakold plautzt ooda von auleen oppspoold. Woaemma etj uck jintjch ooda saut, waut uck emma pessead, haud etj daut aules aul verhäa jeseehne ooda jeheat, ooda jeritjcht ooda weenstens aunjefoht.
Oba jiedet Tjind, kratjcht eendoohnt woo sea beleeft, finjcht irjendwaut Onbekauntet ut, ve daut daut Tjind Angst haft, enn daut easchte aun woohnt ooda waut etj mie dentjche kaun wea nijch dee Dunkelheit, ooda daut wille Wada von Jewittastorms ooda Schnesstorms, enn bestemmt nijch daut Ruzhe vonne nuadlijche Weela; nä, dee Angst wea verrem Boll. Opp eene Heimstäd enne Dartjajoahre wo daut tjeene Elektrizität gauf, enn uck tjeene Inzhens rande, kunn eena Sposs habe mett de Oabeitstiere, oode soohne, dee wie toom Äte feehde; entweda een Hund dem eena toom Sposs hinjeraun ranne kunn, ooda dee koakelnde Heehna, dee emma waut too schelle habe, enn läwendje Tjalwa, woohne eenem de Finjasch noh Maltjch besue, ooda eene Kaut, woohne sijch nohm Muse bie eenem omme Been tjrellt, oba eensje Foarmtiere send ditjch enn jedrunge, enn nijch too bewäje soo's Schwien, ooda jewaultijch groot soo auls Tjäj enn Pead. Eene tjliene Bewäjung von ähre groote Tjarpasch ooda Tjapp, von ähre jewaultje Tjarpasch eascht goanijch too räde, kaun onverhoffs enn meist doodlijch fe een Tjind senne. Auls etj de Pead eascht jewoah word , weare dee measchtens oppjescherrt, verrem Woage oode eene Foarmmaschien jespaunt, enn emma haude dee eenen Haulta oode een Toom opp enn kunne soo enne Jewault jehoole woare, enn eena leahd ohne daut too weete vonn'e jratere Jeschwista, oode vonne groote Lied, ooda de Ellre, enn woo see sijch bewäjde, enn woo Voda ooda de Breeda dee behaundelde enn woa Mutta enn de Sestre eenen grooten Boage omm de Pead ähre Tjapp muake eea see eenen Woage bestäje oodea doanopp kroope, wiels de Pead emma mett de Tjapp schliesade wann see sijch jäjne Fleaje enn Midje enn Bramse wäahde, enn mett de Heefta traumpelde enn daut eewje Fäaje mett äahre Zäjel; dann vestund eena seea boold, waut fe eene schratjele enn platzlijche Krauft dee haude, enn eena niemols nijch opp den Jedanke kohme wudd derjch den Stacheldrohttun oppe Weid too krupe, woa dee Boll em Frieen grosd. Sogoa mett dree Joah wea eena nijch soo domm.
Trotzauldem, weare Foarmtiere nijch leijcht too bandje. Wie wohnde aune wiede Butakaunt von de Aunsiedlung enn em Somma kunn een jiedra sien Veeh opp dee onbewohnde Weid wastlijch von ons weide, woaemma see eene ohpne Läajcht ooda een Hei-Lemaun ooda eene ohpne Weid funge. Maunjche Mensche leehte äah Veeh doagelang ohne Aufsejcht grose, wiels daut gauf Wota ooda Somplajcha fe daut Veeh toom supe, enn doa weare tjeene groote Tiere, dee daut Veeh tooriete wudde, enn uck tjeene Deew. Enn soo hab wie wada Jletjch, säd Voda oppem CPR Veadel; emma de Optimist; een Veadel fuats besied kohlet Laund, enn wie brucke ons Veeh nijch mielewiet joage; eene ohpne Weid fuats diretjcht opp Nobaschauft. Na joh, waut oba onse Ma wea? See docht von Natua ut enn uck vonne earnste Erfoahrung, daut eena mett dem Schlemmsten räatjchne musst, enn soo kaum daut, daut wie een endlooset Jetraumpel vonne Nohbaschtjäj äwa onsem Laund haude, dee entweda noh dee friee Stap jinje, ooda tridj kaume. Enn beid, aulso miene Ellre, haude see rajcht.
De eenzelne Foarmheade aun Veeh weare tjlien, hejchtstens feftien Tjäj enn dee jeweehnlijche Oamheit vonne Depression, enn jieda Koohhead haud ähren eajnen Tjlinja. Jieden Morje moltjche miene Mutta enn Sesta onse twee ooda dree Tjäj, enn dann trocke see de Laute utem Koohhock, enn leehte onse gaunze tjliene Head rut, enn dee jinje dann opp eenem Stijch omm den gaunzen dachäwa too grose. Wie tjannde aule Eajenheite von onse mehrere Koohtjlinjasch, enn den Dach äwa head wie, woa dee Tjäj sijch opphilde, enn woo wiet see auf weare, enn woa see grosde. Too Tiede veschwung daut Tjlinjajelud, besondasch wann de Fata Morgana äwa dee bewossene Hewels lach enn wann de Midje enn Bramse ahn toosade, enn daut Veeh dann ohne sijch too muckse unjrem ditjchen Wädestruck lage, enn wadakeiwde. Dann kunn eena oba uck rein nuscht nijch heare, enn aum tiedjen Nohmeddach trock Ma ähre Leiwendschooh aun, dee see ohpjeschlitzt haud doamett de Knubbels ahr aune Feet nijch soo toosadde enn dann jintjch see em Wasten nenn oppem Koohstijch mett een Stock von een Saskatoonbosch jeschnäde, enn dann haud see entweda Mariejche ooda sogoa Lena mett omm ahr horjche too halpe enn de Tjäj too finje. Enn maunjchmol, enn dem willen Laund, fruag sijch, wäa dann vebiestat wea, daut Veeh ooda de Seatjasch?
Enn onse Famielje deed onse Mutta waut too doohne wea, emma. Fe ons tjliene Tjinja, wea dee Jedanke, daut onse Mutta nijch weete wudd, waut too doohne wea, onjleeflijch; daut see nijcht doohne wudd, waut needijch wea, wea ons onbejrieplijch. Oba see haud de easchte fiewendartijch Joah von ährem Läwe enn eenem mennonietischen Räjendarp oppe jewaultje Stappe jewohnt, aun de breede Romanovkaboaj delenjd, enn foaken kunn see dee Eajenheite von dee kanaudsche Laundschauft hiea emm Nuade nijch tjanne; daut wea aulatoop opp eene Oat soo ladijch, oba uck soo endloos wild enn trotzdem dijcht, eena kunn fe luta Bosch nuscht nijch seehne! Gohne, horjche, sijch aunstrenje biem äwrem doodjen Bosch enn Beem too mulwere enn derjch Sompmoos enn rundomme Lemauns enn opp Boajreaje wada nopp, velooah see jieden Senn fe de Rejchtung enn woa ons Hus stund. Daut Seatjche noh de Tjäj word dann Nootsach, wiels see musst dee finje, doamett dee Tjäj ahr den Wajch noh Hus weese. Woa ähre Tjinja wachte.
Oba nu kaum een Boll! Ma enn Mariejche enn Carlo sochte ons Veeh mol wada enn bloos wie dree Jinjste weare oppem Hoff, enn spälde Jriepa enn lachde, enn dann stund wie stell, enn horjchde noh dee Koohtjlinjasch, dee wie wisste onse weare, enn horjchde dee emma nohda, komm noh Hus, kohmt noh Hus! Enn mett eenmol head wie een Boll brelle, enn sage den uck, enn wie rannde enn daut Hus enn haude morschijch Schiss.
Dee Boll rannd äwa Louis Ulmer sien Fletjch enn derjch den Wädetun aune Sied von onsem Hus, auls wann'et den Tun goanijch gauf, enn brelld, enn haud eenen jewaultjen Kopp, siene Heahna noh Veare äwa sien drohtjen, witten Bless jedreit, enn mett een rooden Tjarpa, jestuckt enn ditjch auls een Daumptjätel, dee äwa onsen Hoff reatjad, schnoof aun onsen Staul vebie enn aum Mesthupe, schmeet jewaultje Stetjcha mett siene Heahna enne Loft, de Leppe äwa siene schratlijche Tähne jetrocke auls hee een Jeruch nohhejcht schnoof; wie kunne den Stohlrintjch enn siene Näs seehne, enn woo hee den nohhejcht schoof auls wie derjch dee denne Fenstarute zielde. Wann hee ons sach wudd hee jäjen ons Hus steete, de Tjäatjedäah wudd mau jrodsoo tjreemle, wann hee dee een Buchel jäwe wudd, enn wie wudde soo auls een jeschmäda Blitz oppe Trapp e'nopp flitze-oba Ma! Mariejche!-wann dee toop mett de Tjäj noh Hus kohme wudde, wudd hee dee too Dood traumple enn mett de Heahna too Stoff mohle, enn wie aule dree hielde enn proowde ons nijch vom Boll seehne too lohte, oba wie musste ruttjitjche omm too seehne woa hee wea, omm too seehne, waut daut wille Tiea deed, enn donn-Pa wea doa!
Hee jintjch jlitjch von doa woa ons Woagestijch krugglijch vonne Beem kaum enn äwrem Hoff leid nohm Staul, mett een langen Papelpost enne Henj. Dee Boll dreid, stieahd, hoakt een Stejch Sood mett sien lintjchen Hoof enn Pa drascht ahm eent kratjcht äwrem Rintjch enn siene Näs soo seea, daut wie den RUMS em Hus heade, en dann dreid dee Boll, enn Pa resst ahm eent äwre Huck, enn dann huppad dee Boll auf, enn hassad mett'e Hacke auls wann hee kratjcht daut deed waut hee doohne wull enn dann rannd hee-hee kaum ons aum Fensta toodoak!-enn aune Atj vonne Tjätj vebie, enn donnad derjch den Tun enn wada hinja Louis Ulmer sien Fletjch, sien Zoagel huach enne Loft biem bocke enn mett dem jreenaen Sommaschata beschnerzt hee nochmol sien beschmädet Hinjarenj. We rannde ut de Däah, Pa wea Tus enn Ma enn Mariejche kaume aun mett Papelasta omm de Midje too vejoage, enn wie kunne de Koohtjlinjasch fuats von hinjrem Staul heare enn Carlo balld, enn wie lachde enn hielde tooklitjch.
"Jie brucke goanijch Angst too habe," säd Pa. "Daut wea bloos Leewess äah Messjeburt von eenem willetblootjen Mejchel!"
Mejchel, Prejchell loht mie läwe
Dee baste Kooh woa etj die jäwe...
Daut plautdietsche Riemseltje haft soo väl Farzh auls eena sijch utdentjche kaun, oba wie rannde wild vom Hewel von onsem Hoff rauf noh dem Koohhock opptoo enn schreaje enn schliesade de ladje Maltjchammasch äwre Tjapp.
#
Onse Mutta sung bie ähre Oabeit, ohne Enj enn ohne Hault, besondasch dee Bolleleeda jinje ahr niemols ut. Äah Sopran wea kloa, huach auls eene Tjinjastemm, enn de Stemm jintjch bie aule hundade huachdietsche Leeda spezeare, enn nohbad bie jiedet Leed; see tjannd dee aula utwendijch, soo's jesajcht: bie de Hundade! Measchtens sung see truje Heimatleeda, Leeda vom Bange noh dee himmlische Ruh woohne aule eadjebungene Tjriste habe motte, weens soo säd see, oba too Tiede jintjch ähre Stemm eenfach mett ahr derjch enn leesd sijch von aula dee Foarmtrubbels soo auls bie:
Allelujah! Schöner Morgen:
Ach, wie schmeck ich Gottes Güte
Recht als einen Morgentau,
Da mein sehnendes Gemüte
Wandelt auf der Grünen Au;
Da hat wohl die Morgenstund
Edlen Schatz und Gold im Mund.
See sung opp dee plaute Städ opp onsem Hoff dijcht biem Staul, manke dusende Graussorte enn Unkrut doa enn dann plock see tjliene jäle Bloomtjess, woohne see Kamille nannd, enn von dee koakt see sijch eenen Tee enn bloos see drunk den fe ähre Buckweehdoag, säd see, enn daut wea uck mau eene von ähre veschiedene Krankheite, dee ahr emmawajch ploagde. Dee golde Kamillestiedatjess oppe tjliene Haulms ritjchte soo auls äah Mul, enn schmajchte uck doanoh, dee tjliene Tuckatjess funkelde opp ähre Finjasch enne Sonn soo auls ähre Leeda enn de schratjelje Ladijchtjeit em Bosch, soo's see säd, dit Kanada, woa daut Jesatz bestemmd, daut eene jiede Famielje opp äah eajnet Laund läwe musste enn fe sijch auleen, enn ons näjchsta Nohba wea een eentletstja, Louis Ulmer, dee een seea gooda Mensch wea, enn hee leeht ons eenen Stijch fe onsen Woagewajch derjch sien Laund uthacke, enn diretjcht derjch enn äwa sien Hoff doamett wie den tjartsten Wajch nohm Wajchstijch haude, oba hee wea tjeen Mennoniet enn hee ess uck niemols noh onse Tjoatjch jekohme, nijch mol toom Bejrafnis.
Wea wäa hee, mett soohnen framden Nohme auls Louis Ulmer? Daut haft hee niemols nijch jesajcht, enn wann doch, dann haft daut tjeena meea em Dentjch. Siene tjliene Koht wea ut jesoagdem Holt jebut, enn nijch von Beemstam, enn mien Voda säd, daut de Koht aul doa wea auls wie ons Veadel koffte, enn wie ons Hus fuats aune Kaunt von sien jratstet Fletjch buhde, woohnt nohm Ooste vom Hewel lach, woa jieda Boom eene veadel Miel wiet aufjehackt wea, enn soo kunn wie dee Somm äwa sien Howafletjch oppgohne seehne, enn em Hoawst kunn wie de Nuadlijchta äwa siene Jeträjdhocke brenne seehne.
Enn soo wear'et dann uck: opp dem Bild von ons Hus oppem Aunboajch bewiest, daut onse Tjätjche-Owesied weinja auls tien Schooh von Louis Ulmer sien Jeträjdfletjch stund. Dee Jrenz tweschen ons wea een Lautetuhn mett äwaschrohts jeflochtne Wäde, woa eena Wausch aum Wauschdach toom dräje äwahenje kunn enn woa Suarompsbläda fe Supp, enn de seetsuare Reboabastenjels fe Plautz; daut easchte Jreens em Fahrjoah woss den Tun delenjd woa de Aprelsonn aum basten dee Wartle unjre Ead oppwoame kunn.
Mie dentjcht, daut Louis Ulmer een korta, jestuckta Maun wea, dee ons foaken Foarmmaschiene lied, wann wie ons Jereetschauft opp ons steenajet Laund tweebruake. Wiels hee "Louis" heet, docht wie een Stootlang, daut hee vleijcht mett de Haulfbritte Briere-Famielje Frintschauft wea, dee eene Miel Nuade von ons wohnde, enn dee meist soo lang auls wie em Speedwell Distrikt bleewe, ooda sogoa Frindschauft wea mett dee Naults wieda siede, oba "Ulmer" pausst nijch manke Haulfbritte Nohmes, enn Louis veschwung eea etj mie aun ahm perseenlijch dentjche kunn. Enn dennoch blifft mie siene Nohme faust em Dentjch enjebeizt, enn wann etj "Louis" "Ulmer" hea, tjemmt mie dee Nohme hinjeraun soo 's daut plautdietsche "Wacht noch een tjlien bätje" enn dann tweschen dem Schliesa vonne Tjapp von onse Pead seeh etj den dachen Wintjel woa dee Boschstijch äwa dem Hempel-Aunboajch noh siene Koht leiht, enn daut kaun senne, daut de Himmel brennt enn sijch veschift von aul daut Nuadlijcht, enn etj weet, daut de Woagejleis, dee opp sien Hoff aunfangt, eene haulwe Miel wieda waste oppheare woat, deepa enn dem diestaden Woold oba daut dee Himmel dach met Lijcht senne woat. Tus:
Tus ess Tus,
Enn hinjrem Owe
Ess tweemol Tus.