Dee Marion Jones ut'e Stäts, woohne meea Goldmedaulje fe Sport ommen Hauls bommle haft, etj meen haud, auls eene judsche Brut ut New York aune Finjasch, gauf vondoag too, daut see meea Steroids enn Lieneelj jedrunke haft auls etj enne easchte feftien Joah enn mien Läwe toop Bottamaltjch jesope hab.
Enn fuats auls see utjebeijcht haud, kaume de Lied aun, omm mie too froage, auls etj jleew, daut aulnoch väle Sportla Steroids nehme. Woo de Lied daut weete, daut etj enn soohne Sache mol wada soo meea de Expert sie, weet etj nijch. Oba see habe rajcht: etj weet väl meea auls de measchte aundre toop. Enn wiels etj soo meea emma bie de Woahrheit bliew, enn uck noch emma root woa wann etj biem Jeschijchte vetalle mol een bätje äwadriewe well, tjenn jie junt, kratjcht soo auls dee ruhm tweehundat nieschieje Jast von vondoag, opp miene Meeninj velohte.
Eene doaf Mensche nijch nertje enn uck nijch tjräjle, wann eena enn jewesse Stetja ahn wiet veropp ess, enn doawäjen woa etj je dann uck fuats vetalle, woo daut tjemmt, daut etj sogoa CNN, enn dree Tjoatjetjallasch volla Frulied waut daut Weete om Steroidsnehme aunbelangt, wiet äwaleaje sie.
Daut tjemmt aulatoop soo: Daut etj auls Haulwa-Pentathlon Champion aune 1960 in Rom bie de Olympiade oppduckt, daut wisst sogoa de väaja Pop, wiels wie je doa toop opp miene Koste Schisnitjworscht jeschmenjt habe. Enn Cassius Clay wisst daut uck, wiels mie auls Carte Blanche Beseatja enn Rom em Olympischen Darp aule Däahre opstunde. Enn soo kaum daut, daut etj daut enn Rom soo meea kratjcht soo drock, wann nijch drocka haud auls irjendwäa seitdem dee Apostel Paulus sijch doa fierijch rannd, ooda sijch den Wulf hohld, wiels hee onbedinjd de Reema bie de Dusende dommleahre ooda auck betjeare wull. Enn uck deed.
Enn donn, soo auls aul jesajcht, kaum etj meist tweedusend Joah lohta, enn riemd, waut Paulus een bät verhäa nijch jejletjcht haud, een bestje lohta eent fe aulemol opp. Daut etj too dee Tiet meea beschetje kunn auls twintijch Derjchnettelje ess bewesne Sach; etj haud meea Resarwe, waut Krauft, Utdua, Ducht enn Fantasie aunbelangt, auls daut haulwe Jantsied. Enn wiels etj mie doamett nijch puche wull, bleew etj eenfach opp Ditsied wiels eena saul auls Mennist deemootijch bliewe. Daut jletjcht mie donn uck meachtens, trotz aulahaund groote Versuchunge.
Na joh, oba nu wea etj je enn Rom, enn feehld mie, kratjcht soo auls dee Apostel Paulus schrift, nijch soo stiew aune tusje Räjle jebunge, enn kunn mol endlijch een bät noh de elloagsche Oat, aulso mien Oafdeel, vom Lada loostratje, enn de wijchtje Dinja vom Läwe rejchtijch stalle. Enn waut etj donn nijch deed, well etj vondoag hieamett nohhohle.
Daut etj Cassius Clay leijcht em Boxe jewenne leiht, daut weet jie; enn woaromm nijch? Eachtens, wea hee wea goot too liede, enn wiels hee aul emma een oama Jung ut Kentucky jewast, enn doatoo noch een Schwoata, enn bescheide enn leeftolijch sowesoo, docht etj mie, loht ahm mol ruhijch jewenne; hee ess je sogoa noch een bätje jinja auls etj, enn etj, soo docht etj mie, wann etj mie eenes Doages jehearijch enne Grauje spiee wull, kunn etj je noch daut measchte nohhole, enn soo leet etj ahm ruhijch eene Goldmedaulj jewenne. Daut hee enn etj too dee Tiet nijch mol wisste, daut daut Steroids gauf, daut vesteiht sijch doch von selwst. Enn Cassius enn etj send je uck nijch Mensche, dee sijch mett soohn vekohmnet Jesindel oppe Hinjagausse rommstritjche ooda opphoole; daut äwaloht wie, kratjcht soo's de Krohnsche, daut Siedepack!
Wann mie dee Staudt Rom enn uck de vetrafelja Wien, enn de Architektur, enn de Forum Romanum, enn dee Sankt Petrus Doom nijch soo wundaboa jefolle haud, haud etj mie dann doch dolla aunjestrenjt enn woomäjlijch eene Fupp voll Goldmedaulje emm Fiefkampf soo's de Dietsche toom Pentathlon saje, jeholt, wiels emm Kugelsteete, enn emm Hohma, enn uck emm Diskusschmiete kunn sogoa aum Tiber tjeena mie nijch soo leijcht daut Wota reatje. Vom Javelinschmiete ooda vom Stabhuachsprung , auls Pole Vaultarie, well etj eascht goanijch aunfange, wiels etj wea emmahan soo goot, daut uck biem Woahrheitsberejcht sijch daut aulatoop noh Äwadriewnisse heat. Enn dauts nijch miene Oat. Na joh, soo auls measchtens emma, tjenn Jie seehne, daut Kultua enn Sportleistunge sijch nijch emma vedroage, dauts waut etj eajentlijch hieamett saje well.
Na joh, oba tridj nohm Theema, sesst meene miene jeneijchte Läsach, mie jeiht daut kratjcht soo auls mien Väajenja, dem leewen Apostel Paulus, dem daut en Rom uck maunjchmol jankad äwre Sälestrenj vonne Woahrheit too klunje. Soo auls jesajcht, biem Boxe wea Cassius Clay, nohäa Mohammed Ali en Rom vleijcht noch emma een Tucks bäta auls etj, enn em Kugelsteete weare Parry O'Brien, Dalles Long enn Bill Neider vleicht uck een bät forscha, oba measchtens wiels see soo groot weare auls ons Evangelist ut Ninga Tus, aulso den Big Abe.
Oba emmahan: wann etj mie mol eene goode Schisnickworscht toom Freehstitjch enne Kaldune schoof, enn doatoo een Lieta ooda uck twee italjenischen Rotwien hinjeraun ranne leet, wea mett mie nijch too sposse, enn daut haud sijch je doa dann uck schwind rommjeräd waut etj soo meea aules kunn. Enn waut pessead mol wada? De kanaudsche Maunschauft vonne Olympiade, measchtens Rejearungs-Scherniesels, soo een bät M.C.C. Type, vesteiht sijch, seea glaut enn emma sinndagsch, tjneepte sijch mie dann doch seea schwind väa, enn meende, daut sach doch nijch schmock wann "wie" too seea jewenne wudde, enn "wie" sulle doch uck dee aundre Lenda eenen Chance enrieme, "meenst nijch uck?" froage see mie? Enn etj, donn noch emma, soo seea omm mienen gooden Roop auls deemootja Mennist besorjcht, leeht mie äwaräde, enn vesproak uck fuats, jiede Dach tweemol eene Japps Anti-Steroids too nehme, doamett miene Krauft een bät nohleet, enn de aundre oame Donnasch vonne äwaje Welt eenen bätren Chance toom jewenne haude. Eene Oat Missjoohn too driewe, word mie dietlijch jemoakt. Enn daut word je dann uck uck soo.
Oba daut bruckt nijch doabie bliewe, enn eenes Doages, wann mie de Comeback-Trail seea jenuag jankat, dann nehm etj vleijcht doch uck eene poah Japps voll rejchtje Steroids, enn dann hea jie wada von mie, o.k?