Wann eena enne Stäts nijch derjchnettlijch senne well, mott eena schratjlijch väl Jeld habe, enn wann eena noch doatoo eene stätsche Fru ess, mott eena een Figua habe "toom Aunbieten schmock"; enn een amerikaunscha Maun? Aum basten tjitjcht eena sijch den Arnold Schwarzenegger aun: hee ess daut Ideaul: haft een grooten Heispodem, meea Muskle aune Oarms auls Hei em Bähn, enn eene Fru, dee biem Woahrheitsvetalle vekolleat. Enn sass Koahre, enn Mettjlied von eene groote Tjoatjch. Oh joh, enn eene mott weens twintijch Stund aum Dach de Tähne spiele, enn schmustre, frintle, enn han enn wada, wann wäa tootjitjcht een bät lache.
Wann eena, saj wie mol enn Dietschlaund nijch derjchschnettlijch, sogoa waut Butajeweehneljet senne well, mott eena aum basten, buta Jeld, uck noch eene hejchre Bildung enn uck feine Manneare habe, enn wann eena doatoo noch Fru ess: een tjlienen Finja aune rajchte Haund, dee biem Koffedrintjche mett Meissnerporzelaun, ooda Limoges, aulso Teetijch, een Leed bieaun dirijeat.
Enn wann eena biem Vetalle enne Jesallschauft auls Maun Latiensch kaun omm soo bäta, enn wann nijch, dann soo doohne, auls wann eena eenen gaunzen Spitja voll Latien enne Owesied hinjre Tjeewe haft. Joh, enn uck buta Botta enn Konfitüre, aulsoo Wrenj, uck noch schmock ditjch Fraunzeesisch enn uck Enjlisch oppschmäre kaun, wann'et senne mott. Enn von lange Reise mott eena vetalle tjenne; von Mallorca, enn Andalusien, enn Rom soowesoo, enn Marakesh kaun uck nijch schode; enn wann eena en Paris mol eenen elegaunten Uchazhor dijcht bie dem Louvre ooda uck oppem Schepptje oppe Seine toofallijch jetroffe haft, enn dis Fraunzoos sijch een Unjaspaun aune schmocke Been, diene hopentlijch, saut jegrost haft, dann omm soo bäta. Boolt vejäte haud etj too erwähne, daut Honolulu uck emma aunjebrocht ess, enn uck daut eena Hawaii Havajie nanne saul; soo doohne daut de Jude, dee jieden tweeden Sinndach doa sijch de Lenjd aum Waikikistraund blank schiere. Daut Schmock-Doavon-Räde ess soowesoo wijchtja auls Doa-Jewast-Jewese-Senne; enn wann jie mie daut nijch jleewe, tjenn jie mie enlohde, enn dann woa etj junt daut mol vetalle enn uck väamoake, woo daut sijch haft.
Enn Kanada habe sijch de Räjle uck mett de Tiet een bät veschowe. Too eene Tiet reatjcht daut too wann eena em Winta enne Jesallschauft nijch von utjefoodade Unjabetjze biem Nähverein räd, daut heet wann eena Fru wea ooda ess. Enn auls Maun sull eena de Hinjadäah bie de lange Unjawausch, de lange Combinations aulso, em Winta nijch toom Äwajen "Luck" nanne.
Enn tjeena, nijchmol de Tjinja sulle, beleib nijch, von "Pischegohne" räde, wann doa Jesallschauft wea; "mie ess needijch" pausst bäta toom Tweeback ute Molosch. Enn kratjcht eendoohnt woo seea daut em Trejchta hinjre Schitz rummeld, daut Onwada em Bennamesch heet Derjchfaul; Schnerz enn Schietarie blifft, wann äwahaupt, fe de Nippaenja enn ähre proste Läwensoat.
Oba aum wijchtijchsten omm auls Mennist goot aunjeschräwe too senne ess de Fuppe mett Boajeld utjefoodat too habe, väl Jeld, Missjoon driewe, enn bie dree Fundräsasch de Wätjch sijch seehne lohte, daut ess wijchtja auls aulet aundre toop, woavon aul jerät worde ess. Wann Du aulsoo de Betjze voll hast, mett Jeld, meen etj, enn Dien Hoat voll Radasenn, dann kaunst Du ruhijch een bät noh Heehnaschiet ooda uck Schwiensmest ritjche: Du best enn bliffst "IN." Oh joh, Diene Tjoatj mott een jewaultjet Missjoonsprograum habe, de haulwe Welt mott bett Wiehnachte betjeat woare. Enn wiels Endruck, de Schein bediedend meea ess auls Sein, soo's de Dietsche doatoo aul emma säde, saul eena derjchut reed senne, daut gaunze Mennistentum, Plautdietsch, den Nohme Mennoniet, enn sesst aules toop opptoojäwe, wiels daut Läwe noh dem amerikaunschen Senn haft bloos eene Dimensjoon: noh väare enn ohne ethnische Vegohneheit. Traditsjoon ess aulso een Fleatjwuat!
Joh, joh, daut stemmd aules, oba woa bliew etj mett miene Jeschijcht, dee nijch bloos too Wiehnachte wijchtijch ess: Weet jie, daut de Thiessesstaum eajentlijch goanijch leaje tjenne? Daut ons de Läjnisse framd, joh onmäjlijch send? Daut ess schwoa too jleewe, oba soo auls aul jesajcht: jieda Natsjoon haft ähre Eajenoate, enn uck meist jiede Famielje, besondasch waut Mennoniete send. Oba daut weet jie selwst. Etj weet seea goot, daut daut Thiesses jeft, dee sijch doot jesope habe, enn Thiesses jeft, dee soo wundaboa schwamme kunne, daut dee Fesch emm Nippa neidish opp ahn weare, enn een poah kunne uck Arbuse tjnippse, enn aundre kunne Jeld talle, daut'et ruzht, besondasch wann daut nijch mol ähre äjne Rubels weare. Enn dann weet etj, daut'et uck Thiesses gauf, dee soo onjeheia stoatj weare, daut Mensch sijch Reajwies vestuake, wann een poah von dee Sort mol enn Elloag Rosmock hilde.
Aul dit haft mien Voda mie vetald, enn seit siene baste Joahre auls Resserieta, tjenne de Thiesses nijch meea leaje. Doamett well etj nijch saje, daut see nijch proowde, oba nä,...oba daut bleef biem proowe, de Woahrheit sad sijch oba fuats emma derjch.
Boold vejäte haud etj too erwähne, daut mien Grootonkel Johaun Thiessen Missjoonoa enn uck een haulwa Dokta enn Indonesien wea, enn hee doa seea schwind enn em Grooten mett Tiejasch enn mett'e Sind opprieme deed. Enn nu, daut etj soo meist enne baste Joahre aunjekohme sie, woat daut vleijcht Tiet, daut etj uck mol doahan goh, enn doa een bätje jrindlijch tjoatje dooh; daut wudd mie uck jankre wiels mien oola Frind Karl Peetasch sijch enn Bangkok berooplijch opphelt, enn daut's nijch aul too wiet auf, enn dann kunn etj, soo auls daut foaken bie de Missjoonoare Mood ess, doa jieden Moonat mol Urlaub moake, enn mie von mienem grooten Opfasenn vepuste. Joh, joh, mien Missjoonsenn schrieft junt mau schmock enn jun Missjoohnskalenda opp, wiels seit mien Grootonkel, Papa Doc Thiesse enn Bandung aune 1953 storf, habe de Wetjeltjapp doa wada bediedent toojenohme. Enn daut daut jefährlijchet Toakel ess, weet sogoa Bosche Jeat, enn dee ess je nijch seea fetjz vom Bejriep. Joh, enn wann mie bieaun biem Jäjere enn dee Jäjend dee Osama bin Laden verre Loop oppducke sull, dann hohp etj opp June Unjastetung too reatjne, wiels wea wudd nijch enne Versuchung kohme fe fiewentwintijch Milljoon Dohla sien C. O. Status een bät oppe Duck too satte? Stalt junt mol väa: den Osama eent verrem Bless too plintze mett eenem Dartijch Dartijch enn eena fuppat sijch $25,000,000.00 enn. Joh, enn dis Säjen ess tweefach: Osama ess dann endlijch biem Diewel, enn mett dem Hupe Boajeld kunn eena haulf Russlaund weens een Veadel betjeare.
Eena saul daut oba uck ruhijch toojäwe, daut dee Thiessesstaum uck een poah Fehla aun sijch haud. Oba Leaje? Daut tjenn wie nijch, weens nijch meea. Enn daut tjemmt soo: Oole, gaunz oole Famieljechronika besaje enn belaje aules waut etj hiea jeschräwe hab. Uck bestätje see, daut een Thiessen auls de Sonn noch gaunz fresch wea, enn noch dacha auls vondoagdendach schiend, wiels de Batteries, aulso aul de Duracells enne Sonn noch nijch een Tucks vebruckt weare, donn wea mol een Thiessen woohna siene Bestemmung auls Resserieta nijch nohkohme wull; hee wäahd sijch eenfach, hee stiepad sijch. Enn de Strof bleef je dann uck nijch lang ut. Waut pessead? Daut Jerejcht derjch Gott sienen langen Oarm enn siene Finjahoakess schluage fuats too, enn hilde bie ahm em Gorjel Rosmack, enn bruake ahm aule Knoakes enn uck aule Grode, soo auls een Fesch dee haft, enne Tung twei. Eenfach twei, enn wann jie mie daut nijch jleewe, dann woa etj junt miene Tung wiese, enn dann uck fuats een poah Resseriete, wiels han enn wada deit mie de Tung emm Hoawst doch een bät jäatje, vleijcht sogoa een bätje weeh, enn daut meent natierlijch daut mie doa mol wada noh aul dee lange, lange Tiet, weens soo jleew etj, de Knoakes, wann uck mau emm tjlienen, tridj wausse welle.
Daut ess mien Loos; enn eena haft daut nijch leijcht: Leaje kaun eena nijch, äwadriewe mau een bät, oba Resseriete saul enn mott eena, wiels daut ess mien Loos, miene Nische emm Läwe, mien Tjriez.
Auls vondoag dree jewaultje Odlasch, biblisch groot enn fuchtijch auls wille Evangeliste bie mie äwrem Hus fluage, enn daut fuats oppe Städ soo schwoat enn diesta word auls bie eene Sonnevefinstanis, dann beschwijcht etj miene Hunj enn säd: "Daut ess selden, oba daut jefft hiea uck han enn wada sogoa emm Winta Dunkelheit. Oba: grult junt nijch: Etj hab den Orda von bowe, soohnt too vetalle besondasch too disse Joahrestiet, enn dann tratjcht dee Diestaness wada auf, enn daut Lijcht tjemmt tridj."
Aulso, fuats weare de Odlasch, aule dree wajch, de Diestaniss veschwung, etj musst miene Jeschijcht vetalle, enn aules wea em Loot!
Enn daut hab etj hieamett jedohne, enn nu Froohe Wiehnacht!
Frind,
Jack mett eene noch emma jleie Tung!