Leewe Frind,

Wiels daut hiea omme Woahrheit jeiht, feehld etj mie jedwunge een N. B. auls Schlussautz unje auntoofieje.

Etj bedd om Vestendnis!

Emma, Hauns Thiesse!

Een Joonafesch em Nippa - von Jack Thiessen

Auls ruhm twee Joah tridj Kauspasch Hein mie vetald, daut siene Grootellre ähren Tjastdach omm een gaunzen Dach enn Chortietz veschowe haude, wiels kratjcht omm dee Tiet de groote Feschasch ut Elloag enn Roosendohl eenen joona-oatjen Wels jefonge haude, wea dann uck de Dach auls disse Jeschijcht eene Weaj jelajcht word.

Dee Grund ess eenfach. Kauspa jeheat too de gaunz weinje Mensche, enn Jrienthola noch doatoo, dem etj waut jleewe kaun enn dooh, enn doamett sie uck etj enjeschlohte. Wiels auls Resserieta doaf enn saul eena de Sälestrenj vonne Woahrheit strapazeare, uck sogoa soo seea utratjche auls 'ett jeiht. Enn daut well etj vondoag mol oppe Proow stalle. Vleijcht jletjcht mie daut, ohne den Sälestrang tweitooriete ooda äwatooklunje.

Enn soo's jesajcht: Kauspa ess doch een bätje opprejchtja, sesst wea hee nijch een bekaunda Bankier enn Steinbach jeworde. Wiels bloos ut Jrienthol too kohme, reatjcht nijch too omm enn Steinbach de Easchta Offiziea enne Credit Union too woare. Den eensjen Pries woohna Kauspa fe siene groote Konst tohle musst, ess daut ahm de Hoah utjinje. Enn mie uck, oba etj nauhm daut nijch mol haulf soo jeneiw mett de Woahrheit, weens bett nutoo nijch.

Joh, oba wie wulle vondoag doch fesche gohne, aunstautt bie de Resserietasch romm too dwaule. Aulso: Kauspa vetald mie, daut siene Grootellere enn Chortietz enne Ooltkolonie, doa nijch wiet vom Nippa auf, soo's aul jesajcht, ähren Tjastdach väavelajcht haude, wiels de Mensche eenen Fesch aune 1927 emm Somma jejräpe haude, enn dis Fesch wea soo groot, daut sijch een Gaustjebott doaraun saut äte kunn, enn dann noch haulf Elloag doatoo, enn gaunz Roosendohl sijch de Doarm uck noch vollheiwe kunne. Oba, soo's daut aul emma wea: wann een Fesch jejräpe woat, dann mott eena den oppe Städ oppäte, sesst woat de oolt enn stintjcht.

Daut easchte Mol auls soohn Maleea aul mol meist pessead wea, wea auls Jesus aum See Genezareth een poah Dusend Mensche ver sijch haud, enn den hungad, enn Hee enn siene Jinjajemeend kratjcht donn mehrere Fesch vonne Joonasort jejräpe haude, enn Hee dee oppdesche leet. O joh, enn wiels daut doa gaunz dijchtbie eene Batjarie jefft, woa dee Ua-Uagroottjinja von Goliath enn Simson Bultje noh de Resserieta Oat backe doohne, enn von soohne Bultjess reatjche fief bett sass too, enn dann ess uck aul eene Dutz voll (von dit wudd etj goanijch woage too räde, wann etj mie doa aum Heiljen See nijch selwst een poahmol de Kaldune mett een Simsonbultje volljeprommelt haud), enn doabie word mie aulahaund opp Uat enn Städ dietlijch, uck daut de Feschasch aul emma een bät meea Spälruhm mett'e Woahrheit haude auls de Golfasch ooda de Professasch, enn uck de Jrienthola.

Enn daut saul heete: Wann Jesus mie von dem jewaultjen Gausjebott vetald haud, wudd etj ahm aules jleewe, oba wiels mol wada aulahaund Tiet enn Mensche tweschen Fesch enn Oppschriewsel doatweschen kaume, saj etj: "Wäwaeet!?"

Na joh, oba wie send je meist biem Gaustjebott, enn de Joonawels ess noch deep em Wota. Oba soo's jesajcht: Kauspa vetald von dissem Fesch, oba uck mien liefhauftja Voda vetald soo meea kratjcht dautselwje, enn wiels hee doabie, daut heet biem jriepe doabie wea, well etj uck ahm ditmol jleewe, enn ahm too Wuat kohme lohte. Enn dann wea je uck noch een aundra een bät doabie, enn daut wea der Besten Einer, aulso Ohmtje Arthur Kroeger, eena von de Tjräjaschklocke Famielje, enn wann dissa uck tjeen diretjchta Zeij wea von dem gaunzen Unjanehme, wea hee oba doch dee Maun, dee een poah Minute noh dem dee Entjelwoage mett dem Rekord, aka Joonafesch, doabowe vom Nippa von twee tweedusendpundje Kuntasch jetrocke, noh Elloag jefeaht word, doa vebie kaum, enn sach, waut doa pesseat wea. Enn diss Arthur K. haft mie disse Jeschijcht aul dreemol vetalt (eenmol verre Tjoatjch, woa noch tjeen Mensch buta de Piano-House Leewe jeloage haft) enn jiedesmol ess dee Jeschijcht deeselwje, enn jiedesmol tjemmt Ohm Arthur doabie de Schweet oppe Stearn, enn daut Tetjre enne Stemm.

Joh, enn soo vetalt ons Zeij Arthur Tjräja, een gottesferjchta Mensch enn soo opprejchtijch auls dee jenannda Bankier Kauspa, kaum daut, daut auls see aun de seea schoape Atj oppem Wajch bie Roosendohl kaume, enn dee Joonafesch weens dree Meeta hinje äwrem Woagebax rutstuak, dann haud mien Voda dee Kuntasch extra eent äwajeresst, doamett see mett de jewaultje Lohd omme Atj kaume. Uck haud Voda dee tjliene Jungess, dee dutzendwies hinja dem Feschwoage rannde, jesajcht, daut wann see nijch schuwe wudde, waut Zeijch enn Lada hoohle kunne, hee ahn woomäjlijch uck eent äwaresse wudd, wiels de Fesch mott nu stauntepee, aulso huppasch, noh Ungasch em Spitja oppe Wijschschol toom wäaje.

Joh, enn auls de Feschzoagel donn soo wiet hinje rutstuak, krautzd enn murjcheld dee eene Hollinj aune roosendohlsche Atj een Meeta deep, enn dree Meeta lang emm Haulfkulla, enn disse Rät ooda Holinj ess bett vondoag too seehne. Miene Uage laje hieamett Zeijchniss auf!

Na joh, daut ess aules scheen enn goot, oba eea de Joonafesch krautze enn murjchle kunn, enn eea dee bie Ungasch oppe Wischschol nopp, ooda bie de junge Freese biem Gaustjebott too de Tjast oppen Desch kaun, mott dee jejräpe woare, enn hiea word mien Voda toom easchten enn woll uck toom latzten Mol toom Held.

Etj fruag Voda Tus, aulso doa hinja Jnodefeld, auls hee emm Nippa wertjlijch soo goot haud schwamme kunnt auls hee emma säd. "Na," sajcht'a, "daut weet etj nijch, enn etj well je uck nich äwadriewe ooda puche, oba eent weet etj, enn daut ess, de Lied, oba besondasch de Jungess aum Nippa säde enn vetalde foaken, daut auls Obraum Thiesses Peeta aunfong jieden Dach em Nippa bie Elloag aun too schwamme, dann haude sogoa de Fesch Leah aunjenohme, enn dee schwomme von donn aun bäta, stoatja enn strauma. "Daut haud etj ahn biejebrocht," vetald Voda. "Enn daut wea auljemeen bekaunt," säd'a noch, enn dann wisst wie.

Auls etj Voda dann noch fruag, auls hee wertjlijch doabie jewast wea, auls de groote Joonawels jejräpe word, speajch hee ut, schmeet siene Metz enne Auschkuhl nenn, enn säd: "Toom Donna han, woo foaken mott eena de Woahrheit vetalle eea dee em Jedajchtnis backe blifft? Nijch bloos wea etj doabie, oba ohne mie wea de Fesch noch bett vondoag em Wota, wiels een Wels von äwa dusend Pund too jriepe, ess eene Sach, dem oba utem Wota rut too tose, enn noch een extra Kapitel fe sijch!"

Donn speajch sijch Voda noch eenmol enne Grauje, enn vetald wieda: "Joh, wann etj nijch de stoatjsta Scherwaunda tweschen Peetaborjch enn Odass jewasst wea enn den Fesch rutjetrocke haud, haud daut de roosendohlsche Hollinj mever nijch jejäwt, enn Freese haude uck nijch veeahundat Jast bie de Tjast soo schmock saut too äte jäwe kunnt."

"Na joh," meend Voda dann doch, "daut Mahla Ungasch ähre twee Kuntasch Orlik enn Starschie mie een bät holpe schod je uck nuscht, oba daut measchte bleef mol wada opp miene Schulre lidje, enn etj musst schuwe, schweete, tratjche enn retauje, daut de Schnodda Fiea foot."

"Daut kaum aulatoop soo," säd Voda: "Wie fuahre aul tiedijch zemorjess von Elloag nohm Nippa mett dem Entjelwoage mett Ungasch ähre twee Kuntasch aunjespaunt, enn wie haude uck aul boold eene gaunze Reaj tjliene Jungess oppem Woage sette, wiels de wulle aula mett. Wiels? Joh wiels, etj haud aul tweemol eenen Wels em Nippa jeseehne, dee mie soo groot auls een Huagseeprohm väakaum, wann nijch jrata. Enn dissen Joonafesch (soo nannd Jasch Wiebe, woohna nohäa enne Scheenwäsa-Tjoatjch Eltesta word), dee vestuak sijch, wiels hee dochwoll ohnd waut ahm jebrode wea.

Na joh, oba wie haude doch daut rejchtje mettjebrocht, omm den riesjen Wels de Nieaschiea opp den Hoake bietoobrinje. Etj nauhm von Tus eenen grooten Heihoake, eenen Strang, dumeditjch, enn uck een Stetjch Ohs mett, (dit wea een groota Herinj, dee noch ut Praisse staumd, word vetalt, enn etj jleew daut, wiels dee stentjad noch emma de haulwe Ooltkolonie voll), enn donn fuah etj mett de Lomm langsom, gaunz langsom, emma värewajch, emma lieseltjes värewajch, enn leet den Hoake mett daut Stetjch Ohs soo omme sass bett acht Schooh deep derjch daut Wota schlape. Enn soo jintjch daut schmock enn sejcha emma wieda, bett dem Joonawels dann doch dee Nieschiea too groot word, enn hee sijch entschloot den Hoake mett Ohs, wann nijch sogoa miene gaunze Lomm ennem Schlucka mett een Haups nenntooprommle, enn dann gauf daut eene groote Wall, eene seea groote Wall, auls de Joonawels full spied erreatjcht haud, enn mett dem Ohshoake oppriemd, enn doabie een poah vonne tjliene Jungess enne Lomm em huagen Boage rutschoote, wiels de Wels mett eene Krauft, dee eene vleijcht bie de Entretjung erläwe kaun aunsad, oba sesst nijch!

Toom Jletjch gauf daut dann noch nijch den Dneprestroj, den grooten Daum, aulso haud wie meea Spälruhm den Wels sijch uttoobe too lohte. Enn daut deed diss jewaultje Fesch dann uck. Hee haud daut Jebett tweschne Tähne, enn läd loos, daut de Walle hinja ahm boold haulf Elloag unja Wota sade, enn de Schwamasch bloos rut enn wajch stusde.

Na joh, wiels Tjinja enn uck groote Tjinja enne Welt soo sent auls se send, jletjcht mien Fada Peeta sien Peetatje daut, bie eenem grooten Boage, woohna de Wels muak, opp den Fesch biem schwamme oppen Ridje nopp too krupe, enn omsonst mett too foahre, soo bie de twintijch Kilomeeta de Stund, wann nijch sogoa meea.

Oba daut wea dem Joona dochwoll onmacklijch, enn soo pitscht dee eenmol mett dem Zoagel, daut Peetatje onjeheia huag enn wiet derjch'e Loft schoot. Aum näjchsten Dach auls de Wels dann endlijch sien Läwenszwatjch jedohne haud, enn bie de haulwe Ooltkolonie too de latzte ennere Ruh jekohme wea, vetald dis Peetatje mie, daut hee soo huag jefloage wea, daut hee de Lorelei haud seehne kunnt. Oba auls etj ahm dann fruag, auls daut uck wertjlijch soo wea, veläd hee de Lorelei enne Vetal noh Kiev, enn daut nauhm etj ahm dann uck eea auf.

Aulso wisst dis Jung von nu aun, daut eena bie de Woahrheit bliewe mott, uck wann eena Thiesse mett Famieljenohme heet, noh dem Motto: "Äwadriewe? Joh, oba leaje? Bloos, wannet senne mott."

Joh, oba wie wulle je dem Fesch doch noch weaje, wiels sesst jleewt je tjeena eenem daut; daut ess doamett uck nuscht nijch aundasch auls mett de U.F.O's. Aulwada een Probleem: Ungasch ähre Wijchschol tjlintjt bie sasshundat Pund ut, enn soo nauhm Ungasch Obraum enn etj eene Tjriezsoag enn schneede dem Joonah enne Medd derjch, enn fief Minute lohta wisst de haulwe mennische Welt dann uck, daut tweemol sasshundat Pund emmahan twalwhundat Pund jefft, enn woomäjlijch een Rekord wea.

Jenuag: daut jintjch dann uck fuats seea doll enn meea auls hundat Desche enne Nohbaschauft knoade enn stände, enn tjreaje kromme Been von aul de Komme enn Schiewe voll Joonawels.

Enn noch waut aundret too Schluss: De Grootsähn von dee Brutlied, aulso de Hermaun Freese, dee je kratjcht dann Tjast haude, ess dee jenannda Kauspasch Hein, woohna Jrienthol, enn uck mie een bät too de Woahrheit verholp, enn enne Credit Union de Easchta Offiziea word. Enn wann etj een bät meea vonne Fundraisers hild, wudd etj bedde, daut soo boold auls mäjlijch enne steinbachsche Credit Union een Dentjmol fe Henry Kasper mett dem Fesch oppstalle sulle. Wiels ohne de Joonawels enn sien wundaboaret Fleesch wea diss Molodetjs Henritj, dee Freese Grootsähn aulso, enn mien Frind nijch soohn vetraffelja Tjeadel jeworde!

N. B. Wiels wie enn disse Jeschijcht ons soo meea gaunz aune Woahrheit jehoole habe, sull etj noch erwähne, daut de Nippa goot dree Zoll flacha word auls de Joonawels endlijch von mien Voda enn dee twee Kuntasch rutjetrocke word. Daut saul sijch oba mett'e Tiet wada utjejlitjcht habe, head etj saje.


© 2008 Jack Thiessen