WEIGHT-WATCHERS mol äwaroasch - von Jack Thiessen

Em Oktooba aune 1976 kaum Professa Viktor Pijaschew enn siene Fru Marguscha ut Moscow aune Universität enn Kiel aun: hee sull doa rusche Jeschijcht enn Literatua unjarejchte, enn see sull mol em Waste daut Shopping gohne leahre, enn beid sulle se soo väl Mensche auls mäjlijch toom Kommunismus betjeare.

Mien Frind Viktor Peetasch enn etj kaume vonne aundre Sied enn Kiel aun: etj sull doa halpe daut Praische Weadabuak toopstalle, enn Viktor sull mie doabie too Haund gohne.Wiels etj eene Koah, een Jetta VW haud, wull Pijaschew schwind mett mie Frind woare. Ahm sach dee Koah schmock, enn butadem musst hee sijch jieda Wätjch eenmol biem ruschen Konsulat enn Hamburg malde, doamett see doa seehne kunne, daut de Dietsche ahm noch nijch jekidnappt haude.

Daut sijch opp dee Oat malde wea mie een bät bekaunt, wiels mien ellra Brooda wea too dee Tiet bie de Breeda enn Nuadkildona biejegohne, enn doa wea daut uck mood sijch een poah mol de Wätjch enne Tjoatjch, ooda uck noch feina, emm Bethus too malde, entweda toom Gottesdeenst, ooda too de Bibelstund, ooda too eenem ooda uck twee Fundraisers de Wätjch, enn uck woo eena daut äwaje Striepsel Welt noch verrem Joahresenj betjeare kunn. Enn butadem weare de Fundraiser-Banketts ahm wijchtijch doamett hee siene dreehundat Pund Läwendjewijcht oppe Wijchschol uck voll brinje kunn.

Daut easchte Mol auls Pijaschew noh Hamburg aumtlijch hanmusst, fruag hee, auls etj ahm doahan feahre wudd. "Auls Kapitalist woat Ahn daut leijcht faule, joh?" meend hee. Etj deed daut. Oba kratjcht soo auls daut mang sijchtje Mensche aul emma wea, wull hee dann uck wiedahans een Free Ride doahan habe. Oba etj säd: "Towarisch Vietja, de Dietsche Bundesbohn woat mie dann doll, wiels etj ahr Konkurrenz moak, enn daut well wie dann doch nijch doohne, nä?"

"Nä."

Oba etj nauhm Kollege Pijaschew jieden Dach uck wiedahans noh de Uni. mett, enn jieden Dach wundad hee sijch enn säd biem Kopp schliesre: "Ivan, waut ess hiea bloos los? De dietsche Mädtjess send je soo denn enn muckrijch auls wann see utem Gulag kohme, dee sitt'et aulatoop noh Hunjsfooda. Woo haft sijch daut? Etj docht bett nu, Dietschlaund wea een ritjchet Laund, oba disse Frulied send measchtens utjehungat, nijch?"

"Weit gefehlt, leewa Vietja, Gospodjien Tovarisch," säd etj, "Nohm Tjrijch aute de Dietsche sijch easchtmol aulatoop jehearijch saut enn voll, enn fonge aun soo auls een Schwitt Jans romm too wackle, daut wea de Fresswelle, oba dann kaum de Tiet, auls dee dietsche Mädtjches nijch meea soo auls arabische Haremmejalles rommulwere wulle, enn dann aute see measchtens Seloht, dreemol den Dach, bett see soohne Been auls Krohntjess enn Reiasch tjreaje. Enn doabie ess daut jebläwe; butadem tjenne de dietsche Mädtjess irjendeenen amerikaunschen Soldoht biem Gohne ooda uck biem Ranne utschluwe. Disse Mädtjess habe Konditsjoon jleew mie, oola Molodetjz!"

Oba dem Vietja Pijaschew sach siene Marguscha schmocka wiels, soo säd hee, dee meea Holt verre Däah haud. Waut dee Utdruck Holt verre Däah bediet, daut tjenne sijch de measchte Manna selwst utdentjche. Enn wann nijch, sulle see aun daut Schmettewief enn Barbados (toom Jletjch doot) dentje, dee zwoa eenen ladjen Bähn haud, oba een Buck voll Pelle enn soo auls Marilyn Munroe uck een haulwe Cord Holt verre Däah oppjefliet haud.

Na joh, dee menschlijche Jrimse kohme enn gohne, enn daut diead dann uck nijch lang bett de Amerikauna fatt enn ditjch enn drugglijch worde, wiels see bloos noch mette Koah fuahre, enn eenfach nijch meea gohne kunne, wiels see too fat weare, eenfach väl too fat, enn jeweehnlijch je fatta je domma noch doatoo. Enn boold haude de measchte Amerikauna dann uck meea Holt hinjre Däah auls verre Däah, weens dee Frulied, enn daut word soo groff, daut de measchte Maltjtjeaj sijch grodentoo schämde, wann see de Frulied mett ähre ditjche Bucks enn druggelje Been sage, dee mien Voda enn Arbuse Klosse emma Schietstendasch nannde.

Enn donn jintjch daut groote Jeschaft mett Weight Watchers loos, enn uck aundre Diet Kurse soo auls Shakers enn Quakers, enn aula koste se seea väl Jeld, oba halpe deede se jeweehnlijch een Schiet.

Joh, enn donn läde sijch de steinbachsche Tjoatje uck em Toch, enn derjch daut MCC holpe se fe biljett Jeld Mensche Jewijcht mett een tjristeljet Rezapt "Slim enn Trim" auftoonehme. Oba uck dit holp bloos toom Deel.

Joh, enn dann kaume een poah Frind enn etj opp foljenden Jedanke, enn wiels daut mang ons Menniste jeweehnlijch aulatoop nuscht nijch woat, wann de Tjoatjch nijch de Henj em Spell haft, organisead wie Jungess eene Jemeend, dee mau eene strenje Bedinjung haud: Wea nijch weens tweehundat Pund wuag, word nijch oppjenohme. Waut wie wulle wea eajentlijch gaunz eenfach: wie Jungess wulle derjch den mennischen Gloowe mol too Jeld kohme. Enn stalt junt mol väa: enn eenem haulwen Joah haud wie onse easchte Tjoatjch voll: Luta straume, forsche Manna, enn frindlijch auls eene Tabun freschbetjeade Breeda enn veeahundad Frulied, aula jestuckt, enn frindlijch auls een Darpvoll druggelje Frulied enne Dartjajoahre, enn aula vejneajcht enn utjelohte enn ohne Komplexe, enn ohne Psychologe ooda Social Workers, enn tjeene Neurose, enn aula mett eene Haundtausch voll jespoadet Jeld, wiels Weight Watchers haude se lenjst begrowt.

Eascht wea daut Sposs, oba donn birjad sijch daut enn, enn uck sogoa een ruscha Nohme fe onse Jemeend feahd wie enn: wie nannde dee kort enn eenfach de Marguscha Jemeend, enn dis Nohme bleef stohne enn uck sette!

Enn disse Jemeend (nu jefft'et uck aul eene Filiale enn Wintjla, enn twee enne Kildonajäjend enn uck dree enn Abbotsford, enn Clearbrook doa dijchtbie, enn noch eene haulwe Dutz enn Vancouver, enn twee enne Niagara-Jäjend, woa de Mensche derjch den Prosperity Gospel aule Henj enn Fuppe voll Boajeld habe, enn sijch saut äte tjenne enn uck doohne, enn measchtens een Schemedauntje ver sijch han enn häa schuwe, oba von sijch schäme? Tjeene Spoah, enn tjeene Räd!

Enn aule Jemeende send sijch eenijch, wiels see sijch aum Desch enn uck sesst nijch jäjensiedijch eegol aufbiete. Enn aule Marguscha Tjoatjche habe daut oole Motto: "De Wind blost den Kurrei toop, enn uck soohne Hinjarenjs!

P. S. Etj sull noch erwähne, daut wie, aulso dee Väastaund vonne Marguscha Jemeend jearn noch Franchises vetjeepe well; noch nijch besat ess haulf Dietschlaund, Curitiba enn Brasilien, Kazakhstan, Mexiko, enn China, enn woa de Menniste sesst noch nijch de Näs nennjestoake habe.


© 2008 Jack Thiessen