Disse Jeschijcht fong kratjcht too dee Stund aun auls enn Jrienthol de Bottafebritj toojemoakt word, enn bie de Tjeesfebritj de Räda aunfonge too dreie.
Een jiedra red aul donn von aul den jewaultjen Fortschrett, enn von dem Wohlstaund, enn woo ritjch wie aulatoop woare wudde, wiels de gaunze Welt hungad noh onsem Tjees, enn nu wea Jrienthol daut biblische Laund, woa Maltjch enn Honijch enne Wad ranne wudd. Enn woo jletjlijch wie toop mett onse droagendje Tjnippsbiedels boold senne wudde. Meist soo word'et dann uck.
Oba daut stald sijch dann doch boold rut, daut dee Säjen mol wada een jemischta word. Waut wea?
De Sommasch enn Siedmanitoba woare soo heet, daut omm een Hepptjeshoah aul donn meist eene Bonsch Näajasch noh Jrienthol trocke wulle. Oba donn kaum em Oktoba Schnee enn see dreide omm, enn jinje noh Hus. See bleewe ohne äah Jletjch, enn wie vereascht noch ohne Banane vonne Stud.
Oba nu doch mol tridj noh de Tjeesfebritj...daut ess soo: Wann Schmaund een bät sua jeworde ess, jefft daut noch emma gotelje Botta, oba wann eena ut sure Maltjch Tjees moakt, dann woat de Menschheit fiestnäsijch, enn at dee Tjees ooda uck den Tjees nijch.
Aulso, waut nu? Wie haude noch nijch Elektrizität omm Wota toom tjeele too pompe, oba wie musste dee Maltjch äwa den Sinndach kolt hoole, wiels too dee Tiet wull Gott daut noch nijch habe, daut eena aum Sinndach oabeid. Joh, dee leewa Gott enn de measchte Menniste wulle too dee Tie aum Sinndach noch lenja Meddachschlop hoole.
Enn nu, soo auls jesajcht, waut nu? Gaunz eenfach: Wie musste aule Maltjch enn achtgeloonje Maltjchkaune nennjeehte, enn dee - emmahan hundat Pund de Kaun - aun eenem langen Strang aunbinje, enn dann dee em Borm nennhenje, woo see em kolden Wota den gaunzen Sinndach toobrochte. Enn doa wea daut soo tjeel, daut de Maltjch eascht goanijch opp sure Jedanke kohme kunn.
Bie ons Tus wea daut tjeen Probleem, wiels ons Voda "een Thiesse ut Elloag" leet de veea Kaune aum Sinndach em Borm nenn, daut'et bäta nijch bruckt. Bie eenje Nohbasch, woa de Manna mau schmajchtijch weare, enn nijch soo studijch jebut weare, word dee Maltjtjeelarie toom Probleem. Soo auls aunjediet: de Maunsmensche oppem Hoff haude eenfach nijch jenuag Loft enne Meiwe, omm de Kaune aum Mondach tiedijch utem Borm too hohle.
De Maltjkaune rauf too lohte kunn je meist een jiedra, wiels uck enn Jrienthol jintjch aul donn aules schwinda rauf als nopp, enn aun daut Jesatz jleewde soogoa soohne woohne sesst jleewde, daut de Welt veea Atje haud.
Na joh, oba de Maltjkaune henje noch emma em Borm enn selle rut, enn noh de Tjeesfebritjch jebrocht woare. Enn daut aulatoop een bät jicha! Enne Nohbaschauft sach'et soo's dit: Bie Wiense musste Voda enn mien Brooda enn etj han, wiels de Oola too oolt wea, enn siene Jungess eenfach too groote ooda tjliene Huppupps weare. Wie fuahre han, enn hohlde aule twee Kaune rut. Verhäa wull Voda ahn noch biebrinje, daut see sijch enne Grauje spiee sulle, dann jeiht daut leijcht'a, säd'a.
Bie Schusta Boajess wea daut nijch bäta, enn dee Schwitt haud sogoa vesocht too fleatje, oba "daut haud uck een Schiet jeholpe", säd Boaje; "fleatje ooda nijch, de Maltjchkaune wulle leewa emm tjeelen Schaute doa unje em Borm bliewe." Oh joh, wiels Boajess Sommafelda weare, wea daut fleatje doa nijch soo schlemm auls wann een Russlenda daut deed. Bie de Molotschna wea daut fleatje äwahaupt nijch mood; de Lied säde, dee kunne daut nijch mol, wann see daut uck han enn wada proowde.
Aulso fuah wie romm, enn holpe aulewäaje, oba auls wie donn noh dem oolen Grunzkujel Oole Jeat Niefeld kaume, jintjch dee Sposs loos, enn disse Jeschijcht fung aun.
Daut Niefeld een tjniepaja Scherniesel wea wisst etj aul mett fief Joah, enn etj hilt mie nijch enn siene dijchte Nobaschauft toom Äwajen opp. Etj truhd ahm daut too, daut hee junge Benjels em Jeheemen tjniepe wudd, eenfach wiels ahm daut scheen jintjch wann hee Hunj enn Tjinja koojintjre heare kunn. Auls bie disse Niefelds de Heehnastaul aufbrennd tjitjcht dee Oola sijch een haulwet Joah measchtens äwre Schulre, enn auls hee donn noch sienen Vesejchrungsscheck tjreajch, schmustad hee sogoa wann'et reajend.
Butadem wea hee een ditja Scherwaunda, dee sijch mau selden em Staul opphild, wiels, soo's hee säd, "daut Maltje ess Fruesoabeid.."
Na joh, oba disse Niefelds haude uck eene Kaun Maltjch, dee aum Mondach zemorjess utem Borm sull. See weare onse Nohbasch, sesst wea wie doa nijch too Help hanjefoahre.
Soo auls jesajcht, ooda weens aunjediet: Ons Voda, dee ut Eloag, predijcht uck opp siene Oat dolla enn bäta, wann hee een vollet Hus verr sijch haud. Enn doamett meen etj, daut ahm daut scheen jintjch siene Muskle späle too lohte, wann hee een Publikum haud. Enn wann doa dann noch een poah Langhoaje doabie stunde, dann druag ons Voda, dee vom Nippa, uck ruhijch twee Kaune Maltjch, enn weppad doabie noch sogoa mett dem Hinjarenj.
Oba wann tjeena tootjitjcht, dann foll ahm daut sogoa schwoa eenen mässjen Nachtopp zemorjess bettem Mesthupe too droage.
Na joh, oba de Kaun mott je noch utem Borm bie Grunzkujels Jeat Niefeld. Kratjcht auls Voda sijch aul den Strang omme Grauje jewetjelt haud, enn dee Kaun ruthewe wull, kaum tiedijch zemorjess dem Jungen Jeat Niefeld siene Brut ute Tjäatj rutjedaunzt, enn looht toom Freestitjch enn. Auls Voda dee too seehne tjreajch, schwoll ahm de Kaum aun, enn hee sad sijch sien Garry Cooper Jesejcht unjrem Hoot opp, enn donn huppst hee soo auls een Hohn oppe Floak, enn stald sijch breetbeensch äwa dem Borm, enn wull de Kaun gaunz schmeissijch Haund äwa Haund nohhejcht tratjche.
Etj freid mie aul emm stellen, daut mien Voda, wann'et senne musst, soohn schratjlijch stoatja Donna wea, dee aul eenmol dree Chochole mett eenem Drusch daut Lijcht utjepust haud.
Oba aul daut Jewesne holp ahm platzlijch nuscht nijch, wiels de Schortinj enn Niefelds äah Borm vefuhlt wea, enn noh gauf, enn Voda, Hoot, willet Jesejcht enn tien Sekunde rusche Fleatjweada aulatoop enn Grunzkujel Jeat Niefels äah Borm hinjenaunda veschwunge.
"Bozhe moi," säd de Niefeldsche, enn Niefeld säd bloos: "Schinda em Schiet!" enn donn speajch hee ut, enn säd noch hinjeraun: "Wann diss Sposs bloos nijch noch too diea tjemmt!"
Wie stunde aula aum Borm enn tjitjchte rauf, enn reatjende mett een Bejrafnis, ooda weens mett een Krankenbad mett Voda doa benne.
Oba waut wea? Doa unje oba nu aul oppe Kaun saut Voda, doll auls een nauta Hohn, enn schreajch: "Na, opp waut wacht Jie, von auleen kohm etj nijch ut disse Bredulj. Niefeld, woa ess Diene Lada?"
Soo auls Jie weete, läwd Voda noch achtefeftijch Joah lenja nohdem Niefelds äah Borm ahm breedajemeendsch jedeept haud, aulso mott hee doa dochwoll irjendwoo rutjekohme senne.
Bett de Nobaschauft "doa bowe" von Peeta H. (Heehna) Jaunze de Braundlada jeholt haude, enn Voda daut Lijcht wada erläwd, weare meist dree Stunde vegohne. Waut Voda nijch vetald, de oola tjniepa Niefeld oba fuats enword, ess daut Voda em Borm dochwoll aunjefonge haud too darschte, enn hee doa een Schruwglaus Schmaund fe de erwähnde Brut äahre Tjast enn eenem Amma jefunge, enn daut ladijch jedrunke haud.
Auls wie donn endlijch lieseltjess mett eenem stellen "Gott sei Dank!" utenaunda jinje, jintjch Niefeld noch noh mien Voda opptoo, enn säd too ahm: "Du Thiesse, dee Schmaund woohnen Du doa unje utdrunkst kost feftijch Cent. Aulso bitte..."