Etj wea vondoag enn Jrienthol, mien Jeburtsdarp. Enn woaromm erwähn etj daut? Gaunz eenfach. Nijch wiels etj jleew, daut etj waut butajeweeneljet sie, sonda eenfach omm too malde, daut etj daut nu endlijch rut hab, woo eena sijch doa vehoole saul.
Joahrelang bruckt etj mien ellren Brooda auls Väabild, oba daut ess vebie, enn doawäjen well etj mol beschriewe, waut fe niee Seide etj endlijch oppjelajcht hab, enn woo etj daut auls selwstendja Holthacka emm Noarenwoold wiedahans doohne woa. Wiels mien Brooda auls Väabild? Daut gauf nijch väl waut, eajentlijch nuscht nijch. Wiels, wann de Elimtjoatjch-Mettjlieda säde, daut hee too konservatiew wea, dann schloot hee sijch boold de Chortietza aun, enn auls disse mett eenmol uck noh de amerikaunsche Oat measchens Sarah Palin wählde, word hee uck noch moderna, enn wisst äwanacht gaunz kratjcht woa de Schwoata aulewäje Rosmack hoole deed, enn hee schloot sijch de Breedajemeend aun. Oba auls disse von ahm een Sindenbetjanntnis velangde, dann vekroop hee sijch bie de Nuadkildoona manke Tjoatjelje. Weens soo wea daut jistre.
Eenmol vekroop hee sijch uck tweschenenn bie eene ooltmennonietische Fru enne Stäts unjrem Rock, vleijcht uck Ratj, oba doaräwa well etj leewa nijch räde. Daut äwaloht etj leewa de Breeda, dee opp dem Jebiet meea Erfoahrung habe, aulso jenuag doavon, soos de Klosche emma säd, enn auls se mien Brooda jreepe, nauhme see den Bassem enn heiwde ahm de Huck voll. "Bie Mamme Tus bliewe, tjemmt uck ernoa billja," (dee Taunte mett de straume Been unjrem schwoaten Rock wea ut eenem Butendarp enn Ohio, head etj saje) säd Peeta, trock sijch de Pereestje bie sien Jenjelstoohl wada aun, enn predijcht wiedahans Tugend enn Schmocksenne. Enn wann hee äwa dee Bejäwenheit simlead, woa hee, soo's hee säd, "toom Lijcht unjrem schwoaten Rock jekohme wea" enn doabie soo tjitjcht auls ons Kohta Obraum wann etj ahm bie een Kommtje mett fatten Schmaund nausche erwisch, dann vestoh etj uck fuats den Psalmist Doft väl bäta.
Oba nu tjrie etj von James Urry ut Nieseelaund, aulso noch wieda vom Himmel auf auls Jrienthol, Nohrejcht, daut de groota Tjoatjevoda, Jeat App woohna emma soo derjche Näs mett väl Schwung enn Jefeel dietsche Jedijchta oppsäd, enn enn Volendam oppe Tweschenstatsjoon uck nijch emma eene jlitjche Striep jeseit haud, enn daut mien Brooda Peeta enn Jeat App doa aulnoch jehearijch mett de Polietitja enn eene Bocht sijch oppjehoole haude, aulso Kopp enn Moazh spälde, ooda sijch noch soo auls fuhle Kuntasch doabenne mett eene gaunze Tabun framde Mustangs aulatoop jesält habe. Soo vetald Urry mie, enn dee weet.
Joh, enn soo auls daut enne Politietj mood ess ooda uck aul emma wea, daut se aulatoop enne Wad luage, dann wea uck boold de näajchste polietische Partei aune Reaj. Enn boold de näjchste. Enn auls se dee aula utjeproowt haude, funge se wada von Väre aun. Mien Instinkt sajcht mie, daut sowaut enn Jesus siene Tiet noch nijch mood wea, oppe polietische Lada noppa enn raufa too krupe, foaken twee Runge opp eenmol!
Oba well wie doch mol toop schwind tridj noh Jrienthol gohne, enn tjitje, waut'et doa nijch aules jefft! Jie habe daut dochwoll noch em Dentjch, daut etj auls Tjind aul biem oppen Topp sette soo meea wisst, woo de Welt rand, enn biem mett Softly enn Tenderly wesche aul wisst, waut de Philosophie too saje haud. Daut heat sijch ooltnäsisjch, ess oba soo.
Jieda Sproak haft een Wuat fe een Mostatjind, enn daut mott etj je weete, wiels etj soohn Tjind wea enn vleijcht sogoa noch sie. Oba etj well beleib deemootijch bliewe! Oba doch: sogoa de Leahrasch enn Jrienthol säde uck noch Joahrelang nohäa, daut wea mett Peeta Thiesses äah Hauns meist nijch uttoolhoole, hee wea soohn feinet Jungtje. "Dem tjenn wie nuscht nijch biebrinje, hee ess aul lenjst aunjekohme. Een Enjeltje mett een Pud Vestaund emm Kopp, eene Seel soo jlei auls eene fresche Komm Mannajrett, enn een Hoat soo straum enn rein auls eene utjestraumde Oostapastje, enn doatoo noch Manneare, woohne sogoa Prädjaschfrues ve luta Aufgonst roode Backe gauf.
Daut wiedre tjenn Jie junt dochwoll soo meea selwst dentjche. Gaunz kort jefoht, kaum daut Äwaje kratjcht soo auls daut aul emma kaum. Enn daut fong aul bie Eva (etj jleew de easchte Eva wea eene Reimaschdochta) aun, enn jintjch donn emma rejchtoo soo wieda mett de Frulied enne Menschejeschijcht, woohne onschuldje Wundatjinja emma wada vom Reinheitstopp stelpde. Joh, von de easchte Eva bett Delilah ess tjeen wieda Wajch. Uck de Obraum Krohne Dajchta von Jrienthol send aules Foatjel von deeselwje Säaj, enn daut disse Säaj alive enn well ess, weet een jiedra, woohnem dee Nohme Hollywood bekaunt ess. Enn disse gaunze Sippschauft Frulied haft eent emm Senn enn enne Feet, enn daut ess, soohne straume Onschuldstjinja soo auls etj eent wea, daut Beentje too stalle.
Enn daut ess je dann uck de Jeburtsstund vonne Literatua. Wea daut nijch jleewt, tjannt den biblischen Doft nijch. Joh, oba aule Ereajnisse enne Welt woare eascht bloos dann Jeschijchte, wann se korz verrem Enj mett eenmol haustijch lintjsch ooda rajsch dreie; eenjefäah soo auls een Darpsbenjel woohna stoatja ranne kaun auls de Wind, oba aum Picknicksdach ver daut gaunze Publikum dree Meeta verrem Ziel de Lenjd han handrascht, Kopp äwa Hinjarenj hantjeiweld. Ooda een Prädja bie de Tru von een Brutpoah soo rejchtijch looslajcht, enn dann ennwoat, daut hee de Brell Tus vejäte haft. Soo schlemm!
Oba soo's auls jesajcht, dann woat een Erläwnis eascht too eene Jeschijcht. Enn wann soohn Jeschijchtevetalla dann noch selwst entdatjcht, daut utjedochte Jeschijchte eajentlijch aula ut dee selwje Woahrheitstonn kohme, dann steiht soohn Schriewa mett Zettalempe aum Enj mett eenmol platzlijch sogoa hinjre bediedenste Kaunzel enne Welt: verrem Nobelpriespodium. Enn dann saje se aula: "Sitzt? Daut haud etj mie aul emma jedocht."
Daut oba een derjchschnettelja amerikaunscha Prädja, von de wilde Evangeliste mette ditjche Fuppe eascht goanijch too räde, ooda een republikaunscha Polietitja jemols ver dem Nobelthroon stohne woat? Ooda aum Enj verrem Throon hinjrem Perlendooah enne Ewijchtjeit? Daut ess eenjefäah soo goot mäjlijch auls een Foatjel ohne Tjreltje aum Zoagel.
Oba noch mol tridj noh Jrienthol: waut etj mau saje well ess auls etj eenes Doages ennword, daut etj een Wundatjind wea, enn daut se mie aun jieda Table Ronde aul toom Prädja ooda sogoa toom Polietitja bestemmt haude, dann musst etj de Wohl traffe: entweda auls Kaunzelfuchtla soo auls Huppstjeklosse beriehmt woare, ooda derjch eenen korten stiewen Schnurr mie selwst, enn de Mensche soowesoo, väaleaje wull, ooda oba een opprejchtja Jrienthola woare enn bliewe, dann bejreest etj mett eenmol aul de väle irdische Lausta enn word daut waut etj nu sie: een Kohta mett bunte Striepe, benne enn bute mett eene Adrass enn Kroonstol, uck Bothwell jenannt. Noch schlemma: dit Darp haft bett nutoo nijchmol eene Tjoatjch!
P. S. Etj mott waut tridjnehme, waut etj hiea bowe jeschräwe hab, nehmlijch, daut mien Brooda Peeta nijch mien Väabild wea. Daut stemmt nijch. Wiels bie ahm de Rachull aul emma de Darpsboll wea, enn ahm Jeld meea intressead auls de Bibel, word etj doch noch mett'e Tiet enn, woa hee enn George Bush enn de American Way of Life hanstiead. Enn dann fong etj aun too ranne, enn rann emma noch!
N. B. Enn noch eent. Enne akademische Tjreise hoole se väl von "Intellektuelle". Wiels etj tjeen rajchtschuldja von dee Brood sie, soohne oba uck bewunda, jleijch etj miene Cousiene äah Frankie. Hee ess een tjlienet Tjeadeltje mett een eewjet Froagetätjen oppem Bless. Nijch lang tridj troff hee een staumjet Wief ut Landmark, dee dreehundat Pund oppe Wijchschol brocht, enn baussijch ess auls een Kuhnhohn. Oba Frankie ess soo veleeft, daut hee meent, hee haft sijch Jesus siene Sesta jefriet, enn daut ess je uck goot soo. Oba auls de Elim Mettjlieda enn Jrienthol sijch von disse Stauntstje, dee Rhonda heet, (Busel wudd oba bäta pausse) nijch romm bausse leehte, nauhm see ähren Frankie, enn noch een poah aundre enn muak mol wada väaje Wäatjch eene niee Jemeend op. Oba etj woa doatoo leeewa nuscht nijch saje, wiels soohnt aulnoch foaken pesseat, wiels etj nijch reed wea, Prädja too woare, nijch?